Ermənistanda son hakimiyyət dəyişikliyindən sonra ölkə daxilində yeni qarşıdurmaların olacağı barədə verilən proqnozlar özünü doğruldur. Nikol Paşinyan iqtidarı hakimiyyətdə uzun müddət qala bilməsini təmin etmək üçün ilk növbədə əsas təhdid olaraq gördüyü “Qarabağ klanı“ndan yaxa qurtarmaq istəyir.
Bunun üçün həmin klana məxsus olan və maliyyə imkanları geniş sayılan şəxslərin həbsə atılması həyata keçirilir. Hətta iş o yerə çatıb ki, sabiq prezident Serj Sarkisyanın qardaşı, qardaşı oğlu belə həbsə atılıb. Serj Sarkisyan özü isə hazırda Avropadadır. Bildirilir ki, o, İtaliyaya yollanıb və Avropada tibbi müayinədən keçməlidir. Lakin hesab edilir ki, Sarksiyan əslində ölkədən qaçıb. Ondan fərqli olaraq, digər keçmiş prezident Robert Köçəryanın isə həbsə atılması gözlənir.
Məlumat üçün bildirək ki, Ermənistanda 2008-ci il martın 1-də 10 nəfərin ölümü ilə nəticələnən etiraz aksiyalarının dağıdılmasına dair cinayət işi çərçivəsində Robert Köçəryana qarşı konstitusion quruluşun devrilməsisinə cəhd ittihamı irəli sürülüb. Ermənistan Xüsusi İstintaq Xidmətinin məlumatında fakt təsdiqlənib. İrəvan şəhərinin birinci instansiya məhkəməsi Köçəryan barəsində qətimkan tədbiri qismində həbsin seçilməsi barədə vəsatət verib. Bütün bunlar Köçəryanın istintaqa ifadə verməsindən sonra baş verir. Yaranmış vəziyyətdə konstitusion quruluşu devirmək cəhdi ittihamı ilə dindirilən Köçəryan daha istintaqa ifadə verməyəcəyini bildirib. Köçəryan İstintaq Xidmətindən çıxandan sonra “Yerkir media” telekanalına müsahibəsində barəsində irəli sürülən ittihamları saxta, qurama, istintaqa cəlb edilməsini isə “siyasi təqib” adlandırıb: “İndi onlar mənim həbsimə nail olmaq istəyir. Yəni “Dağlıq Qarabağın“ birinci prezidenti, Ermənistanın ikinci prezidenti olmuş şəxsi həbsə atmaq istəyirlər. İttihamlar quramadır. Azərbaycanda hansı təntənə, sevinc hiss etdiklərini təsəvvür edə bilərəm. Məni onlara belə hədiyyə edin”. Bununla belə, Köçəryan bildirib ki, təslim olmaq fikrində deyil və axıra qədər mübarizə aparacaq: “Kütlələrin əhval-ruhiyyəsini hüquqi məkana daşımaq istəyirlər. Belə çıxır ki, 2008-ci ildə cəmi 21.5 faiz səs yığan Levon Ter-Petrosyan əslində həmin seçkiləri udubmuş. Bu, reallıqdan tamamilə uzaqdır və sevgi, həmrəyıik şüarları altında baş tutmuş məxməri inqilab tərəfindən siyasi təqiblərdir. 2008-ci il 1 mart hadisələrinin arxasında hakimiyyəti gözdən salmağa çalışanlar dayanır. Məlumdur ki, “yüz dəfə təkrarlanmış yalan həqiqətə çevrilir” prinsipindən istifadə edilir. 1 mart ssenarisinin reallıqla heç bir əlaqəsi yoxdur. Bu, siyasi təqibdir, vendetta, hüquq sürrealizmidir. Prosesin on insanın həlak olması şəraitinin aydınlaşdırılması ilə əlaqəsi yoxdur. Siyasi qərar qəbul edilərək günahkarlar “müəyyən edilib”. İki-üç məsələni həll etməyə çalışırlar. İlk növbədə, mənim siyasi proseslərdə mümkün iştirakımı neytrallaşdırmaq, ikincisisi isə, martın 1-də işin açıldığını bildirmək”. Köçəryan vurğulayıb ki, istintaq bu cür ittiham irəli sürməklə Konstitusiya Məhkəməsinin qərarını və 2008-ci il prezident seçkilərinin nəticələrini rədd edir.
Bəzi mənbələr bildirir ki, Köçəryanın Ermənistana qayıtması heç də özünün dediyi kimi, yalnız istintaqa ifadə vermək məqsədi daşımır. Əslində, Köçəryanın gəlişi Moskvada hazırlanmış bir siyasi planın tərkib hissəsidir. Belə ki, Rusiya onu yenidən böyük siyasətə qaytarmaq üzərində düşünür. Çünki Rusiya artıq nə Serj Sarkisyana, nə də Nikol Paşinyana güvənir. Ona görə də Kremlin hazırladığı plan baş nazir postunun Robert Köçəryana ötürülməsini nəzərdə tutur. “Məxməri inqilab” yolu ilə devrilmiş Serj Sarkisyan siyasi nüfuzunu tamamilə itirib və qeyd olunduğu kimi, artıq ölkəni tərk edib. Nikol Paşinyan isə açıq şəkildə Qərblə yaxınlıq nümayiş etdirir. Bu da Rusiyanın bölgədəki geostrateji maraqlarına təhlükə yaradır. Bu şəraitdə Köçəryan amilindən istifadə olunur. Bunu görən Paşinyan isə onu həbsə atmaqla Köçəryan kartını tamamilə neytrallahşdırmağı düşünür. Amma arxasında Rusiya dayanan Köçəryanın da bəzi gedişlər etməsi gözlənir ki, bu da Ermənistan daxilində vəziyyəti daha da kəskinləşdirəcək hal sayılır.
Xatırladaq ki, bundan əvvəl Ermənistanın keçmiş müdafiə naziri Mikael Arutyunyan 2008-ci il 1 mart cinayət işi çərçivəsində konstitusion quruluşun devirməsi ittihamı ilə təqsirləndirilən şəxs qismində istintaqa cəlb edilərək barəsində axtarış elan edilib. Həmçinin Kollektiv Təhlükəsizlik Müqaviləsi Təşkilatının (KTMT) baş katibi Yuri Xaçaturov da Ermənistan Xüsusi İstintaq Xidməti tərəfindən dindirilib. Bütün bunlar hərbçilər arasında da Paşinyan iqtidarına qarşı narazılığı artırır. Bu vəziyyətdə Köçəryanın hərbçilərlə birləşməsi də gözlənilən hal sayılır.
Nahid SALAYEV
