Rəsul Cahangirli: “Xəzər, Qara və Aralıq dənizləri ətrafında yerləşən ölkələrin iqtisadiyyatlarının əlaqələndirilməsində tranzit ölkə olaraq Azərbaycan mühüm rol oynaya bilər”
“Azərbaycan üç dənizin iqtisadi potensialının inkişafında yeni səhifənin baş qəhrəmanı ola bilər”. Məlum olduğu kimi, bunu İtaliya Prezidenti Sercio Matarella Azərbaycan-İtaliya biznes forumunda çıxışı zamanı deyib.
Onun sözlərinə görə, Azərbaycanın mövqeyi strateji baxımdan çox önəmlidir: “Belə ki, ölkəniz bundan uzunmüddətli şəkildə istifadə etməlidir. Azərbaycan da Xəzər dənizi regionunda nəqliyyat idarəetməsinin mərkəzini təşkil edir. Bu təşəbbüslərlə italyan mühəndisliyini, avtomobil yollarını, limanlarını, ümumilikdə, infrastruktur sahəsini əks etdirən geniş bir işin əsasını qoyduq. Cənab Prezident, bu gün biz münasibətlərimizə uzunmüddətli və strateji yanaşma ilə baxmalıyıq. Bizim müştərək iqtisadi maraqlarımız bizi ölkənizlə Avropa İttifaqı arasında olan əməkdaşlıqdan irəli gələn imkanlardan istifadə edərək dialoqumuzu daha da inkişaf etdirərək genişləndirməyə yönəldir. Məhz ötən günlərdə tərəfdaşlıq prioritetləri ilə bağlı danışıqların yekunlaşması ilə əhəmiyyətli irəliləyiş qeydə alındı. Strateji baxımdan regionda önəmli rola malik olan Azərbaycan Xəzər dənizi, Qara dəniz, Aralıq dənizi üçlüyünün iqtisadi potensialının inkişafında yeni bir səhifənin baş qəhrəmanı ola bilər. Biz tarixi dostluğumuz və tərəfdaşlığımızın potensialından istifadə edərək dənizlərimiz arasında bu körpünü birlikdə tikməliyik. Çünki bu, istər indiki, istər gələcək münasibətimizə təsir edir”.
Görünən odur ki, Azərbaycanın iqtisadi, tranzit sahələrində önəmli mövqeyini Avropanın inkişaf etmiş aparıcı dövlətləri qəbul edir və buna dəyər verir. Bu baxımdan, İtaliya Prezidentinin məlum yanaşmasını ekspertlər necə şərh edirlər?
Məsələyə münasibət bildirən ekspert Rəsul Cahangirlinin sözlərinə görə, Sercio Matarellanın Azərbaycanla bağlı dəyərləndirməsi reallığı əks etdirir: “Həqiqətən də Azərbaycan üç dənizin iqtisadi potensialının inkişafında yeni səhifənin baş qəhrəmanı ola bilər. Ona görə ki, son illər ölkə çox uğurla və dinamik şəkildə inkişaf edir. Azərbaycan regionda önəmli və əlverişli mövqedə yerləşməklə yanaşı, həm də böyük nəqliyyat infrastrukturuna malikdir. Bakı-Tiflis-Qars dəmir yolunun istifadəyə verilməsi, “Şimal-Cənub” nəqliyyat dəhlizinin tikilməsi, Ələt qəsəbəsində böyük Dəniz Ticarəti Limanının inşa olunması üç dənizətrafı regionların birləşdirilməsində mühüm rol oynaya bilər. Ona görə də Xəzər, Qara və Aralıq dənizləri ətrafında yerləşən ölkələrin iqtisadiyyatlarının əlaqələndirilməsində tranzit ölkə olaraq Azərbaycan mühüm rol oynaya bilər. Məsələ ondadır ki, tranzit nöqteyi-nəzərdən Azərbaycan regionda ən əlverişli mövqeyə sahibdir. Özü də Azərbaycanın bu sahədə imkanları get-gedə daha da genişlənir. Hesab edirəm ki, nəzərdə tutulan layihələr reallaşandan sonra Azərbaycanın iqtisadi imkanları daha da genişlənəcək. Bu zaman ölkənin statusu daha da böyüyəcək”.
Vidadi ORDAHALLI
