Qabil Hüseynli: “Dünya silah bazarında satıcı yox, alıcı tapmaq çətindir”
Ermənistanın baş naziri Nikol Paşinyan "Radio Europe”yə müsahibəsində Belarusla münasibətlərdən danışıb.
O, Belarusun Azərbaycana silah satmasından ciddi narahat olduqlarını dilə gətirib: "Belarusla yaxşı münasibətlərimiz və əlaqələrin inkişafı üçün böyük potensialımız var. Bundan istifadə etməliyik. Lakin Belarusun Azərbaycana silah satmasıyla bağlı böyük narahatlığımız var. Bu əlaqələrimizdə böyük problemlər yaradır. Bu narahatlığı Lukaşenkoya da bildirmişəm. Bilirsiniz ki, Ermənistan və Belarus Kollektiv Təhlükəsizlik Müqaviləsi Təşkilatının (KTMT) üzvləridir, hərbi-siyasi partnyorlarıq. Bu baxımdan problem daha da böyüyür".
Paşinyanın bu mövqeyini necə xarakterizə etmək olar?
Politoloq Qabil Hüseynlinin fikrincə, bu narazılığı dəfələrlə ifadə etmək Paşinyanın siyasi savadsızlığından irəli gəlir: “Xatırladaq ki, Azərbaycanın Belarusdan ümumi dəyəri 170 milyon dollar olan silahlar aldığına dair məlumatlar yayılıb. Hətta anlaşmaya əsasən, Belarus "Polonez" raket sistemini də Azərbaycana satmağa razılıq verib. Bundan sonra İrəvan Minskə reaksiya göstərdi. Ermənistan Milli Təhlükəsizlik Şurasının baş katibi Armen Qriqoryan Ermənistanın narahatlığını Belarusun İrəvandakı səfiri İqor Nazaruka çatdırdı. Ermənistanın baş naziri Nikol Paşinyan Soçi səfəri çərçivəsində Belarus Prezidenti Lukaşenkio ilə də görüşü zamanı bu məsələni ayaqüstü onun diqqətinə çatdırıb. Görünür, erməni təbliğat maşını yeni qüvvələrin hakimiyyətə gəlməsindən sonra lap biabırçı işləməyə başlayıb. Mən həmin görüşdən təqdim olunan görüntüləri izlədim. Lukaşenko Putinin yanında onunla görüşdü. Onların arasında geniş tərkibli, nümayəndə heyətlərinin iştirakı ilə görüş keçirilməyib. Lap götürək ki, Paşinyan Belarus rəhbərinə bu iradı lazım olan format çərçivəsində edir. Nə olacaqdı? Bəyəm bir sözə görə təcrübəli Lukaşenko milyonlarla qazancından keçəcəkdi? Bu dəqiqə Belarusa pul hava ilə su kimi lazımdır. Azərbaycan da real alıcıdır. Silah alveri elə sahədir ki, əvvəlcədən bağlanmış müqavilə əsasında həyata keçirilir. Azərbaycanla Belarus arasında elə razılaşma varsa, bunu Paşinyanın bir narazılıq ifadə etməsinə görə pozarlarmı? Çox gülünc və bəsit yanaşmadır. Bir faktı da qeyd edim ki, dünya silah bazarında satıcı yox, alıcı tapmaq çətindir. Yəni Azərbaycan alıcı kimi istənilən silah ixrac edən ölkə ilə analoji məzmunda razılaşma əldə edə bilər”.
Məhəmmədəli QƏRİBLİ
