Elşən Həsənov: “Livan Ermənistanla eyni cəbhədə vuruşmağa deyil, öz daxili probleminin həllinə nail olmağa çalışır”
Ermənistan prezidenti Serj Sarkisyan ölkəsinə rəsmi səfərə gələn livanlı həmkarı Mişel Aounla görüşüb. Bildirilir ki, prezidentlər görüşdə bir sıra məsələləri müzakirə ediblər.
Danışıqlar zamanı Sarkisyan həmkarını Dağlıq Qarabağ münaqişəsinin nizamlanması prosesində son durum barədə məlumatlandırıb. Sarkisyanın sözlərinə görə, tərəflər danışıqlar prosesinin davam etdirilməsinin vacibliyinə dair ortaq məxrəcə gəliblər. Ermənistan KİV-inin verdiyi məlumata görə, tərəflər yaranmış konfliktlərin xalqların öz müqəddəratını təyin etmə prinsipini əsas götürərək həll olunmasına dair ortaq fikirlər də səsləndiriblər.
Livanın bu mövqeyini necə dəyərləndirmək olar?
Ekspert Elşən Həsənovun sözlərinə görə, Ermənistanın xarici siyasət kursunda bir qədər yeniliklər nəzərə çarpır: “Ən əsası da onlar Azərbaycanın atdığı addımlara adekvat davranırlar. Məlum olduğu kimi, Azərbaycan xarici siyasət kursunda çox balanslı davranış nümayiş etdirir. Bizim bu cür manevrlərimiz Ermənistanı çaş-baş salır. Azərbaycanın haqlı mövqeyini əksər müsəlman ölkələri birmənalı olaraq dəstəkləyirlər. Hətta onlardan elələri var ki, məhz bizimlə bağlı olan məsələyə görə Ermənistanla diplomatik əlaqələr belə qurmurlar. Ermənistanın Livanla yaxınlıq etməsində əsas məqamlardan biri də bununla bağlıdır. Onlar göstərmək istəyirlər ki, heç də bütün müsəlman ölkələri Azərbaycanla eyni mövqeyi bölüşmür. İkinci məqam isə Livanda çoxlu sayda erməninin olması və onların həmin ölkənin siyasətinə təsir etmək qabiliyyəti ilə bağlıdır. Livan və Suriya ermənilərin ən çox yaşadığı müsəlman ölkələridir. Dağlıq Qarabağ konfliktinin tarixində biz məhz Livandan gəlib Ermənistanın işğalçı siyasətinə dəstək verən çoxlu sayda muzdluya rast gəlmişik. Başqa bir səbəb isə Livan-İsrail münasibətlərinin gərginliyilə əlaqəlidir. Ermənilər bilirlər ki, Azərbaycanla İsrailin münasibətləri strateji müttəfiqlik səviyyəsindədir. Məhz buna görə də Livanla daha da yaxın olmağa cəhd edirlər. Bir növ, gözdağı kimi. Görüş zamanı xalqların öz müqəddəratını təyin etmə məsələsilə bağlı tərəflərin ortaq mövqe bildirməsinə gəldikdə isə, bu gülməli görünür. Cünki məhz bu mövzu uzun müddətdir müzakirə edilir və ali tribunalardan Ermənistanın haqsız olduğu bildirilib. Birmənalı olaraq belədir ki, xalqların öz müqəddəratını təyini ölkələrin ərazi bütövlüyünə xələl gətirilməklə mümkün ola bilməz. Bu, beynəlxalq konvensiyaların ali tələbidir.
Məncə, erməni xalqının tarixinə və Qarabağ münaqişəsinin səbəblərinə az-şox bələd olan belə mənasız fikrə inana bilməz. Ən başlıcası isə Ermənistan mətbuatı çox vaxt ora səfər edən rəsmilərin fikirlərini təhrif edir. Hətta Livan prezidenti belə mövqedə olsa da, onun prosesə təsiri sıfıra bərabərdir. Çünki Livan Ermənistanla eyni cəbhədə vuruşmağa deyil, öz daxili probleminin həllinə nail olmağa çalışır”.
Məhəmmədəli QƏRİBLİ
