Azərbaycan Prezidentinin ictimai-siyasi məsələlər üzrə köməkçisi Əli Həsənov Azərbaycanla korrupsiya əlaqələrində ittiham olunan, AŞ PA-da Avropa Xalq Partiyası deputatlar qrupunun sədri olmuş Luka Volonte barədə İtaliyanın Milan məhkəməsinin bəraət qərarını şərh edib.
Əli Həsənov “Trend”ə bildirib ki, Milan məhkəməsinin 2018-ci il 13 fevral tarixli qərarı ötən ilin ortalarında məlum anti-Azərbaycan mərkəzlərin və şəbəkələrin sifarişi ilə Mütəşəkkil Cinayətkarlıq və Korrupsiyaya Qarşı Jurnalistika Layihəsi (OCCRP) adlı qeyri-şəffaf və bəlli məqsədlər üçün yaradılmış qurum vasitəsilə yayılmış məlumatların əsassız, qərəzli olduğunu və Azərbaycanın sağlam beynəlxalq imicini ləkələmək məqsədi güddüyünü təsdiqlədi: "Qeyd edim ki, anti-Azərbaycan mərkəzlər və şəbəkələr bu kimi çoxsaylı feyk-məlumatlarla həm Azərbaycan dövlətini, həm də ölkəmizə dost münasibəti bəsləyən, onunla bağlı pozitiv fikirlər bildirən tanınmış şəxsləri - ictimai-siyasi xadimləri, ekspertləri, jurnalistləri və s. hədəfə götürmək və qınaq obyektinə çevirmək istəyirdilər. Təsadüfi deyil ki, həmin vaxt OCCRP-nin “Azərbaycanın pulyuyan maşını” adlı qondarma materialı dünya mediasında sürətlə tirajlandı, məsələ ilə ayrı-ayrı ölkələrin rəsmi instansiyaları maraqlandı və orada adları keçən şəxslər, o cümlədən də guya Azərbaycandan 2 milyon 640 min dollar almış AŞ PA-da Avropa Xalq Partiyası deputatlar qrupunun sədri olmuş Luka Volonte barədə xüsusi araşdırma başladıldı.
Xatırladım ki, həmin dövrdə də biz açıqlama yayaraq OCCRP-nin imzası ilə dövriyyəyə buraxılmış bu iddiaların qərəzli, əsassız, təxribat xarakteri daşıdığını və Azərbaycana qarşı bəlli dairələr tərəfindən təşkil edilmiş çirkin qarayaxma kampaniyasının tərkib hissəsi olduğunu bildirmişdik. Göründüyü kimi, Milan məhkəməsinin obyektiv araşdırması da bunu bilavasitə təsdiqlədi".
Əli Həsənov deyib ki, Azərbaycan hakimiyyəti dövlətin və onun tərəfdaşlarının imicini ləkələmək məqsədilə həyata keçirilən belə qarayaxma kampaniyasının təşkilatçıları və icraçıları haqqında kifayət qədər məlumatlıdır və yalnız Milan məhkəməsinin qərarı ilə kifayətlənmək niyyətində deyil: "Biz bu çirkin əməldə əli olanlarla bağlı müvafiq qaydada hüquqi prosedurlara başlamaq niyyətindəyik. Məsələ ilə bağlı artıq Azərbaycanın aidiyyəti dövlət orqanlarına tapşırıqlar verilib. Hesab edirik ki, demokratiya və söz azadlığı pərdəsi altında gizlənərək beynəlxalq miqyasda ayrı-ayrı dövlətlərə, qurumlara, şəxslərə qarşı kampaniya təşkil edənlər bunun məsuliyyətini də dərk etməli və cavabdehlik daşımalıdırlar".
Əli Həsənovun açıqlamasından aydın göründüyü kimi, əslində, Azərbaycan beynəlxalq aləmdə öz adını qorumaq və ona qarşı qurulmuş məkrli planları alt-üst etmək üçün uzun və çətin yol keçməli oldu. Etiraf edək ki, ləkələyici planın müəllifləri uydurulan korrupsiya hekayəsinin dünyada və Azərbaycanda sadə adamlara inandırıcı görünməsi üçün səylə çalışmışdılar. Guya dərin araşdırmalar aparıldığını sübut edən “sübutlar”, guya konkret detallar “araşdırma materialına” əlavə olunmuşdu. Onu da deyək ki, uydurma ittihamnamə o qədər səylə hazırlanmışdı ki, hər şeyi sonadək araşdırmaq imkanı olmayan çox sayda sadə insan buna az qala inanmışdılar, ancaq məsələyə məntiqi təfəkkürlə yanaşanlar və bir də adları uydurma korrupsiyada ləkələnən Azərbaycandakı və xaricdəki şəxslər özləri bilirdilər ki, hər şey uydurmadır və Azərbaycanın təmiz adı bir çirkab mexanizminin hədəfinə qoyulub. Məntiqlə düşünənlər “Avropanın ortasında bu qədər geniş korrupsiya əməllərini necə aparmaq mümkün ola bilər” və ya “Azərbaycan bununla nəyə nail oldu ki” kimi suallar qoyurdular. Bax İtaliyanın Milan şəhər məhkəməsinin 13 fevral qərarı həm Azərbaycanı vurmaq istəyən beynəlxalq “çirkab mexanizmini” ifşa etdi, həm Azərbaycanın bu üsulla dünyada heç bir iş aparmadığını təsdiqlədi, həm Volontenin təmiz adını özünə qaytardı, həm aldadılmış sadə adamları çox istədikləri həqiqi yola qaytardı, bir də məntiqi suallarla lap başlanğıcdan məsələni götür-qoy edənləri bütün şübhələrdən qurtardı. Milan məhkəməsi gələcəkdə Azərbaycana qarşı bu sayaq “ləkələmə materialları” düzüb-qoşanlara aydın bir xəbərdarlıq da etdi: “Saxtakarlığın və saxtakarların sonundan ibrət alın”.
Baki-xeber.com
