Vüqar Qədirov: “Onlar hesab edirlər ki, Dağlıq Qarabağı və ətraf rayonları boşaltmaqla canlarını Azərbaycanın əlindən qurtara bilməyəcəklər”
Prezident İlham Əliyevin Yeni Azərbaycan Partiyasının 6-cı qurultayı zamanı İrəvan, Zəngəzurla bağlı verdiyi bəyanatlar Ermənistanda əməlli-başlı qorxu yaradıb. Prezident İlham Əliyev həmin çıxışı zamanı bildirib ki, biz tarixi torpaqlarımızı da unutmamalıyıq və unutmuruq:
“Bu da gələcək fəaliyyətimiz üçün istiqamət olmalıdır, necə ki, biz bu gün də bu istiqamətdə iş görürük. Bizim tarixi torpaqlarımız İrəvan xanlığıdır, Zəngəzur, Göyçə mahallarıdır. Bunu gənc nəsil də, dünya da bilməlidir. Mən şadam ki, bu məsələ ilə bağlı - bizim əzəli torpaqlarımızın tarixi ilə bağlı indi sanballı elmi əsərlər yaradılır, filmlər çəkilir, sərgilər təşkil olunur. Biz növbəti illərdə bu istiqamətdə daha fəal olmalıyıq və dünyanın müxtəlif yerlərində sərgilər, təqdimatlar keçirilməlidir. Çünki İrəvan bizim tarixi torpağımızdır və biz azərbaycanlılar bu tarixi torpaqlara qayıtmalıyıq. Bu bizim siyasi və strateji hədəfimizdir və biz tədricən bu hədəfə yaxınlaşmalıyıq”
İlham Əliyevin bu bəyanatından sonra Ermənistanda ciddi narahatlıq yaşanmağa başlayıb. Xüsusilə də belə sərt bəyanatın Ermənistanda keçiriləcək seçkilər öncəsi verilməsi bir sıra sualların yaranmasına yer qoyur. Prezidentin səsləndirdiyi bəyanat Sarkisyanın Ermənistandakı seçki öncəsi planlarına, ümumən seçki prosesinə necə təsir edir və edəcək?
Ekspert Vüqar Qədirovun sözlərinə görə, ölkə başçısının bu mesajı ATƏT-in Minsk Qrupunun həmsədrlərini qəbul etdikdən bir gün sonra verməsi onu göstərir ki, rəsmi Bakı dünya ictimaiyyətinə və Ermənistana ciddi xəbərdarlıq edib: “Bu mesajdan Ermənistanın ciddi narahatlıq keçirdiyi göz önündədir. Onların mətbuatında yazılan məqalələrin ruhundan da bu hiss edilir. Bu xüsusda Ermənistan mətbuatı isə yazır ki, Azərbaycan rəhbərinin açıqlaması rəsmi Bakının strateji hədəflərinin göstəricisidir. Buna görə də Ermənistan 2016-cı ilin aprelində cəbhədə yaşadığı məğlubiyyətin acısını çıxarmamış ikinci zərbəni yemiş oldu.
Onların ən böyük narahatlığı Azərbaycanın müəyyənləşdirdiyi strateji hədəflərlə bağlıdır. Təbii ki, bu cür iddianı irəli sürmək üçün güclü orduya, dayanıqlı iqtisadiyyata malik olmaq lazımdır. Ermənilər bunun fərqindədirlər ki, belə parametrlərə layiq olmasaydıq, İlham Əliyev məlum bəyanatı səsləndirməzdi. Onlar dərk edirlər ki, hazırda Ermənistandakı siyasi və iqtisadi sistem bu iddiaların qarşısında durmaq gücündə deyil.
Ermənistanın dövlət orqanları və ekspert çevrələri İlham Əliyevin çıxışını təhlil etməklə belə bir qənaətə gəlirlər ki, bəyanatın mesajı bəllidir. Anlayırlar ki, İlham Əliyevin sözləri sırf seçkiqabağı kampaniya deyil, onun bəyanatında çox ciddi əminlik var. Bu əminlik onu göstərir ki, hərbi gücü artan Azərbaycan nə zamansa Ermənistanda olan əraziləri geri almağı bacaracaq. Təbii ki, bütün bu narahatlığın Ermənistandakı seçkiqabağı vəziyyətə ciddi təsiri olacaq. Çünki Ermənistanın hazırkı hakimiyyətinin qurduğu seçki şousunun başlıca təbliğatı əldə etdikləri müvəqqəti hərbi uğurlarla qürrələnməyə hesablanıb. İlham Əliyevin verdiyi mesajlar isə bütün bunları alt-üst edir. Yaşanan narahatlıqdan hiss olunur ki, sadə əhali də təşviş içindədir. Onlar hesab edirlər ki, Dağlıq Qarabağı və ətraf rayonları boşaltmaqla canlarını Azərbaycanın əlindən qurtara bilməyəcəklər. Nəticə etibarilə bu mesajlar Sarkisyan hakimiyyətinin itirilmiş nüfuzunu daha da bərbad hala salacaq”.
Məhəmmədəli QƏRİBLİ
