Hələ bir neçə il öncə Avropa Sabitlik Təşəbbüsü "Kürü diplomatiyası: Avropa bataqlığı” adlı araşdırma dərc edərək burada ilk baxışdan da əsassız görünən və əsas etibarı ilə Azərbaycana qarşı yönələn bir araşdırma dərc etmişdi. Araşdırmada Azərbaycan parlamentinin üzvlərinin Avropa Şurası Parlament Assambleyasının deputatlarına lobbiçilik əvəzində pul verdiyi iddia olunurdu.
Xüsusən də Azərbaycan parlamentinin deputatlarının italyalı deputat Luka Volontenin müxtəlif adlar altında olan bank hesablarına 2,4 milyon avroyadək pul köçürmələri barədə məlumat yer alırdı. Eyni zamanda həmin araşdırmada Volontenin Milli Məclisin iki deputatı ilə vəsaitin necə idarə edilməsi barədə mesajları olduğu vurğulanan məqamlar da yer almışdı.
Daha sonra məsələyə İtaliyanın “İl Fatto” qəzetində dərc edilən yazıda daha geniş toxunuldu. Burada iddia edilirdi ki, İtaliyanın AŞPA-dakı nümayəndə heyətində təmsil olunan deputat Luka Volonte 2013-cü ildə Azərbaycan hökumətindən 2 milyon 390 min avro həcmində rüşvət alıb. Bu məsələdə Azərbaycandan olan deputat Elxan Süleymanov və deputat Müslüm Məmmədovun adı keçirdi. Elə o vaxt rəsmi Bakı bəyan edirdi ki, Azərbaycan hökumətinin italiyalı deputat Luka Volonteyə rüşvət verməsi ilə bağlı iddia əsassızdır. Bu, yalan və iftiradır, Azərbaycana qarşı olan çirkin əməliyyatların bir hissəsidir. Təsadüfi deyil ki, o vaxt bu məsələ anti-Azərbaycan qüvvələr, xüsusən də erməni lobbisi tərəfindən aktiv şəkildə gündəmdə saxlandı. Üstəlik, təəssüf ki, Azərbaycan daxilində bəzi qüvvələr də onlara dəstək verməyə başladı. Hətta AŞPA-nın 2013-cü il yanvar sessiyasında almaniyalı deputat Kristofer Ştrasserin Azərbaycanda siyasi məhbuslar haqqında hazırladığı məruzənin məhz bu pullar müqabilində qəbul olunmadığı gündəmə gətirildi.
Xatırladaq ki, 2013-cü il yanvarın 23-də AŞPA Almaniyadan olan deputat Ştrasserin “Azərbaycanda 85 siyasi məhbus”la bağlı hesabatını 79 lehinə, 128 əleyhinə səslə qəbul etməmişdi. Sonradan iş o yerə gəlib çatdı ki, Milan Prokurorluğunun bu barədə araşdırması başlandı. Prokurorların ittihamına görə, bu qərar guya o zaman İtaliya deputat heyətinin nümayəndəsi kimi Parlament Assambleyasının sədr müavini olan Luka Volontenin “xarici dövlətin siyasi maraqlarını qorumaq” məqsədilə 2 milyon 390 min avro rüşvət alması hesabına təmin edilib. Bundan əlavə, prokurorların ittihamında deyilirdi ki, bu rüşvət Azərbaycandakı “Baktelekom” MMC adlı telekommunikasiya şirkətinin kassasından mədaxil edilib. Pul köçürmələrində Britaniyanın “Polux Management LP“ və Estoniyanın Danske Bankı iştirak edib. Burada bir daha qeyd olunurdu ki, Luka Volonteyə pulların təhvil verilməsində guya Azərbaycandan olan deputat Elxan Süleymanov və onun Müslüm Məmmədov kimi həmkarları vasitəçilik edib. Məsələnin gündəmdə saxlanması üçün anti-Azərbaycan qüvvələri bütün güclərini səfərbər etdilər və bu məsələdə erməni lobbisi də xüsusilə seçilirdi. Lakin reallıq bu idi ki, AŞPA çərçivəsində Azərbaycana qarşı olan iradların hamısı əsassız xarakter daşıyırdı. Digər tərəfdən, AŞPA-da məhz Azərbaycanın üzərində olan problemlər qaldırılandan sonra rüşvət məsələsi ortaya atılmışdı ki, guya Luka Volonteyə rüşvət verilib. O vaxt haqlı olaraq sual edilirdi ki, rüşvət verilibsə, niyə hesabdan-hesaba keçib? Axı bunu bank hesablarından köçürmə etmədən həyata keçirmək mümkün idi. Bu gösərirdi ki, bütün iddialar yalan üzərində qurulub və heç bir perspektivi yoxdur. Reallıq göstərdi ki, həqiqətən də bu, pesprektiv olmayan işdir. Belə ki, dünən məsələ ilə bağlı Milan məhkəməsində 2 ildən çoxdur aparılan araşdırma Luka Volonteyə rüşvət verilməsinə dair iddiaların tam əsassız olduğunu üzə çıxarıb. Luka Volonte Milan məhkəməsinin qərarı ilə bəraət alıb. Bununla həm Azərbaycana, həm də Luka Volonteyə qarşı böhtan kampaniyası tam iflasa uğrayıb. Bir daha onu da qeyd edək ki, Avropada, Qərbdə kimsə Azərbaycanın marağını müdafiə edirsə, ölkəmizin xeyrinə söz deyirsə, dərhal erməni lobbisinə işləyənlər onu şantaj edir. Burada da məqsəd həmin insanların Azərbaycanın haqq işinə verdiyi dəstəyi əngəlləməkdir. Luka Volonteyə qarşı da bu taktikaya əl atıldı, amma sonda həqiqət qalib gəldi. Həqiqətin bu təntənəsinin odunda məlum böhtan kampaniyasına Azərbaycandan dəstək verən bəzi şəxslər də yandı...
Tahir TAĞIYEV
