Azərbaycanın hərbi sahədə əməkdaşlıq etdiyi ölkələr sırasında əsas yerlərdən birini Pakistan tutur. Son proseslər isə qarşıdakı dövr ərzində iki ölkə arasında hərb müstəvisində əməkdaşlığın daha da dərinləşəcəyini, Azərbaycan ordusunun ixtiyarında Pakistan istehsalı olan yeni silahların peyda olacağını göstərir. Bunu Pakistanın Azərbaycandakı səfiri Səid Xan Mohmandın açıqlamaları da təsdiq edir.
Səfir bildirir ki, ölkələrimiz arasında hərbi əməkdaşlıq prioritetdir: "Hesab edirəm ki, keçən il ölkələrimiz arasında hərbi əməkdaşlığın qurulması və dərinləşdirilməsi baxımından əhəmiyyətli olub. Əməkdaşlığımızı gələcəkdə daha da gücləndirmək istəyirik. Pakistan Dağlıq Qarabağ məsələsində Azərbaycana dəstək verməkdə davam edəcək. Çünki hər iki ölkə işğaldan əziyyət çəkir". Bununla yanaşı, artıq o da məlumdur ki, Bakıda fevralın 27-28-də Azərbaycan və Pakistanın xarici işlər nazirlərinin müavinləri səviyyəsində siyasi məsləhətləşmələr keçiriləcək. Səid Xan Mohmandın sözlərinə görə, məsləhətləşmələr zamanı geniş spektrli, o cümlədən siyasət, iqtisadiyyat, ticarət, hərbi əməkdaşlıq sahəsində məsələlər müzakirə olunacaq.
Beləliklə, bu açıqlamadan da aydın göründüyü kimi, ölkələr arasında, digər sahələrlə yanaşı, hərb müstəvisində də əməkdaşlığın dərinləşdirilməsi prioritetdir. Bu fonda Azərbaycanın Paksitandan ilk növbədə təlim və döyüş təyyarələri alması gözlənir. Xatırladaq ki. ötən il Pakistanla Azərbaycan arasında 10 ədəd “Super Mushshak” təlim təyyarəsinin alqı-satqısına dair müqavilə imzalanıb. Məlumat üçün onu da bildirək ki, “Super Mushshak” daha qabaqcıl “MFİ-17 Mushshak”ın modernləşdirilmiş variantı olan ilkin təlim-döyüş təyyarəsidir. Bu təlim təyyarəsi bu gün dünyada öz sinfinə aid olanlardan təhlükəsizliyinə, imkanlarına və qiymətinə görə fərqlənir. Uçuş hazırlığı üçün ideal olan bu təlim təyyarəsinin ekipaj üzvü 2-3 nəfər olur. Təlim təyyarəsi hərbi aerodomlar olmayan, əvvəlcədən uçuş üçün hazırlanmayan hər cür əraziyə eniş edə bilir və təhlükəsizlik standartlarına tam cavab verir. Havada 4-5 saat qala bilmək imkanına malikdir. Bu üstünlüklərinə görə təyyarədən patrul missiyalarında istifadə edilməsi mümkündür. Təyyarəyə istənilən silahı və kameraları inteqrasiya etmək imkanı mövcuddur. Bundan başqa, Azərbaycan uzun müddətdir ki, Pakistan istehsalı olan JF-17 “Thunder” döyüş təyyarələrini almaqda maraqlıdır. Bu arada bir məqamı da qeyd edək ki, JF-17 “Thunder” döyüş təyyarəsinin daha təkmil hala gətrilməsi üçün Pakistanda intensiv işlər aparılır. Belə ki, təyyarə yeni BVR və IR “hava-hava” tipli raketləri ilə təhciz edilib. Artıq bu raketlərin sınaq atışları keçirilib. Pakistan Hərbi Hava Qüvvələrinin komandanı, aviasiya marşalı Sohail Amanın iştirak etdiyi sınaq atışları Sonmiani poliqonunda həyata keçirilib. BVR və IR raketləri ilə silahlandırılan JF-17 döyüş təyyarələri əvvəlcədən müəyyən edilən, sürətli və yavaş hərəkətdə olan hədəfləri dəqiqliklə məhv edib. Mərasimdə çıxış edən marşal S.Aman bildirib ki, bu mürəkkəb sınaqların müvəffəqiyyətlə həyata keçirilməsi JF-17 döyüş təyyarəsinin yüksək qabiliyyətinin göstəricisidir. Xatırladaq ki, JF-17 təyyarələri 2007-ci ildən Pakistan Hərbi Hava Qüvvələrinin xidmətindədir. Təyyarələr yeni nəsil ASELPOD müşahidə və elektron sistemi ilə təchiz edilib.
Məlumatlara görə, Azərbaycan və Pakistan arasında JF-17 “Thunder” döyüş təyyarələrinin alqı-satqısına dair müzakirələr aparılır. Azərbaycanın yaxın perspektivdə bu təyyarələri silahlanmaya qəbul edəcəyi gözlənir. Bildirək ki, “JF-17 Thunder” döyüş təyyarəsi yüngül, tək mühərrikli və çoxməqsədli dördüncü nəsil qırıcı-bombardmançıdır. Qırıcı ilk növbədə Pakistan Hava Qüvvələrinin tələbatını ödəmək üçün Pakistan Hərbi Hava Qüvvələri və Pakistan Aviasiya Kompleksinin iştirakı ilə Çin şirkəti olan Çenqdu Aviasiya Sənaye Korporasiyası tərəfindən hazırlanıb. Döyüş radiusu 1352 kilometr olan təyyarə 3 tondan artıq silah götürmə qabiliyyətinə malikdir. Təyyarənin "hava-hava", "hava-yer" raketləri döyüş imkanları və bir çox xüsusiyyətləri ilə öz sinfindən olan digər təyyarələri üstələyir. Onun avionikası, optimal alt sistemləri, avtomatlaşdırılmış uçuş nəzarəti və son model silahlarla təchiz edilməsi bu döyüş təyyarəsinə eyni sinifdən olan rəqiblər üzərində həlledici üstünlük verir. Təyyarənin silahlanmasına 70-100 kilometr mənzilə malik idarə olunan raketlər, infraqırmızı başlıqlı qısa mənzilli raketlər, "hava-yer" tipli raketlər, radiolokasiya sistemlərinə qarşı raketlər, lazerlə idarə olunan raketlər, proqramlaşdırılmış kasetli bombalar, nüfuzedici bombalar, ümumi məqsədli bombalar, təlim bombaları daxil edilə bilir. İstifadəçinin istəyindən asılı olaraq döyüş təyyarəsində NATO, Rusiya, yaxud Çin istehsalı olan silah sistemlərini tətbiq etmək mümkündür. Təyyarə müasir radioelektron mübarizə sisteminə malikdir. Bu mənada həmin təyyarələrin alışı Azərbaycan üçün məqbuldur. Bundan başqa, Azərbaycan Pakistandan orta və yaxın mənzilli müasir ballistik raketlər almaqda da maraqlıdır. Söhbət Pakistan istehsalı olan “Şahin-1” raketlərindən gedir. Bu raketlər 750 kilometr məsafədə hədəfi vurur. Azərbaycanın maraq göstərdiyi “Hatf-1” raketi isə “Şahin-1”in təkmilləşdirilmiş formasıdır və daha uzaq məsafədə hədəfi vura bilir. Bu raketlər yüksək dəqiqliyə malikdir və Hava Hücumundan Müdafiə sistemləri onu tuta bilmir. Raketlər strateji obyektlərin, komanda məntəqələrinin və infrastrukturun məhv edilməsi üçün nəzərdə tutulub.
NAHİD
