Aydın Mirzəzadə: “Azərbaycan yetərincə demokratik seçki ənənələrinə malikdir”
Məlum olduğu kimi, fevralın 5-də Prezident İlham Əliyev Azərbaycanda növbədənkənar prezident seçkilərinin keçirilməsi haqqında sərəncam imzalayıb. Sərəncama əsasən, seçki öncə nəzərdə tutulduğu kimi oktyabrın 17-də yox, aprelin 11-də olacaq. Qeyd edək ki, bu, müstəqil Azərbaycan tarixində ilk növbədənkənar prezident seçkisidir.
Əslində, növbədənkənar seçkilərlə bağlı müzakirələr hələ 2016-cı ilin sentyabrında - Azərbaycan Konstitusiyasına dəyişiklərlə bağlı referendumdan dərhal sonra başlamışdı. Çünki referendumda prezidentlik müddətinin uzadılması (7 il) ilə yanaşı, prezidentə növbədənkənar seçkilər təyin etmək hüququ da verilmişdi. Ötən ilin dekabrında Milli Məclis növbədənkənar prezident seçkisinin keçirilməsi barədə qaydalara dəyişiklik etdi ki, bu da növbədənkənar seçki istiqamətində müzakirələri yenidən aktuallaşdırdı.
Belə ki, Seçki Məcəlləsinin 179-cu (növbədənkənar prezident seçkisinin keçirilməsi) maddəsinin əvvəlki variantına əsasən, növbədənkənar prezident seçkisi barədə qərar verilərsə, Mərkəzi Seçki Komissiyası bu seçkini elan edildikdən sonrakı 3 ay ərzində keçirməliydi. Lakin yeni qəbul edilən varianta əsasən, bu müddət iki aya (60 gün) endirildi. Yəni, indiki halda, Prezident növbədənkənar seçki barədə qərar verərkən həmin dəyişikliyə əsaslanıb.
O da məlumdur ki, indiyə qədər Azərbaycanda keçirilən seçkilər demokratik şəraitdə təşkil olunub və beynəlxalq standartlara cavab verib. Bunu zaman-zaman Azərbaycanda seçkiləri müşahidə edən bir sıra beynəlxalq təşkilatlar da təsdiqləyib. Çox güman ki, növbəti seçki də əvvəlki seçkilər kimi beynəlxalq standartlara uyğun keçiriləcək. O cümlədən bütün demokratik prinsiplərə əməl olunacaq. Bütün bunlarla yanaşı, zaman-zaman Azərbaycanda keçirilən ənənəvi seçkilərə qərəzli, qeyri-obyektiv mövqedən yanaşan beynəlxalq müşahidəçilər, həmçinin, siyasilər olub. Təəssüflər olsun ki, bəzi hallarda onlar qərəzli münasibət sərgiləyiblər. O baxımdan qarşıdakı seçkinin demokratik, beynəlxalq standartlara uyğun keçirilməsi onların seçkiyə, Azərbaycana münasibətinin dəyişməsində necə rol oynayacaq?
Sözügedən məsələni “Bakı-Xəbər”ə şərh edən millət vəkili Aydın Mirzəzadənin sözlərinə görə, Azərbaycanın məqsədi demokratik seçki keçirməkdir: “Azərbaycanda seçkilər ilk növbədə demokratik əsasla hakimiyyətin formalaşması üçün keçirilir. Məqsəd müasir dövlət quruculuğunu daha da möhkəmləndirmək və hakimiyyətin insanların, cəmiyyətin qarşısında dayanan problemlərin həlli üçün legitimliyinin təmin edilməsidir. Bununla bağlı görülmüş işlər heç də xaricdə müəyyən dairələrin nə maraqlarına xidmət edir, nə də onların müsbət fikrini almaqdan ötrüdür. Azərbaycana qarşı həmişə mənfi mövqedən çıxış edən dairələr olub və bundan sonra da olacaq. Bu baxımdan məqsədimiz demokratik və hüquqi seçkilər keçirməkdir. Ölkədən kənarda kimin nə cür münasibət bəsləməsi isə Azərbaycanı maraqlandırmır. Ona görə ki, ənənəvi olaraq qərəzli mövqedən çıxış edən şəxslər yenə də bənzər mövqedən çıxış edəcəklər. Çünki onlar müəyyən dairələrin sifarişlərini yerinə yetirirlər. Belə olan halda, onlardan düzgün münasibət gözləmək sədəlövhlük olar. Ancaq ölkədə keçirilən seçkilərə obyektiv yanaşanlar isə təbii ki, seçkinin beynəlxalq standartlara uyğun keçirildiyini bəyan edəcəklər. Azərbaycanın seçkilərlə bağlı böyük təcrübəsi var. İndiyə qədər ölkədə bir sıra seçkilər keçirilib və bütün bunlar beynəlxalq standartlara uyğun olub. Heç şübhəsiz ki, qarşıdakı seçkilər də demokratik və beynəlxalq standartlara uyğun olacaq. Ona görə də bu məsələdə Azərbaycanın nədənsə ehtiyat etməsindən söhbət belə gedə bilməz. Azərbaycan yetərincə demokratik seçki ənənələrinə malikdir”.
Vidadi ORDAHALLI
