Məhərrəm Zülfüqarlı: “Hər halda, Azərbaycan qonşularına nisbətən bütün sahələrdə öndədir”
“İndiyə qədər həyata keçirilən bütün islahatlar çox ciddi sosial siyasətlə tənzimlənir”. Bunu Azərbaycan Həmkarlar İttifaqları Konfederasiyasının V qurultayında iştirak edən beynəlxalq və xarici ölkələrin həmkarlar ittifaqlarının nümayəndə heyətinin bir qrupunu qəbul edən Azərbaycan Prezidenti İlham Əliyev bildirib.
Dövlət başçısı bu sahədə qarşıda duran məsələlərin hamı üçün eyni olduğunu bildirərək qeyd edib ki, Azərbaycanda həmkarlar ittifaqının rolu artır: “Hər bir cəmiyyətdə, əlbəttə, o cümlədən Azərbaycanda da həmkarlar ittifaqının rolu artır. Biz vətəndaşlar üçün sosial cəhətdən müdafiə edilmiş əmək şəraiti yaratmağa çalışırıq. Bu, son 15 ildə 5 dəfədən çox artırılan əməkhaqqında və əmək şəraitində də özünü göstərir. Təxminən son 15 il ərzində əhalinin sayı 1 milyon yarım nəfər artıb, 1 milyon 400 min isə daimi iş yeri yaradılıb”.
İlham Əliyev bildirib ki, məqsəd insanların həyatını daha da yaxşılaşdırmaqdır: “Məqsədimiz vətəndaşların həyatını daha da yaxşılaşdırmaq, dövlətin daha güclü və uğurlu olması üçün çalışmaqdır. Buna görə də bizim iqtisadi sahədə apardığımız və indiyə qədər həyata keçirilən bütün islahatlar çox ciddi sosial siyasətlə tənzimlənir”.
Prezidentin fikrincə, bu islahatlar o vaxt səmərəli olur ki, ictimaiyyət onu dəstəkləyir: “Buna görə də iş yerlərinin, işləyənlər üçün layiqli iş şəraitinin yaradılması hər zaman bizim siyasətimizin gündəliyində durur”.
Bütün bu deyilənlərin fonunda, dövlət başçısı “indiyə qədər həyata keçirilən bütün islahatlar çox ciddi sosial siyasətlə tənzimlənir” fikrini ifadə etməklə nə demək istədi?
Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, bu o deməkdir ki, ölkə Prezidenti əhalinin sosial rifahına daha çox qayğı ilə yanaşır: “Beynəlxalq aləmdə vəziyyət gərginləşəndə, neftin qiyməti düşəndə, Rusiya ilə Qərb arasında ziddiyyətlər kəskinləşdiyi, dolların da kursu qalxdığı vaxtlarda ölkədə sosial siyasət öndə olub. Həmin dövrlərdə Prezident İlham Əliyev bəyan etdi ki, Azərbaycanda sosial proqramlar davam edəcək. Həmin proqramların heç biri dayandırılmayacaq. Bu onun göstəricisidir ki, ölkə Prezidenti əhalinin sosial rifahına daha çox qayğı ilə yanaşır. Digər sahələrdən daha çox bu sahəyə diqqət göstərilir. Fikir versək görərik ki, infrastrukturun dəyişməsi, yolların çəkilməsi, müxtəlif regionlarda yeni iş yerlərinin açılması, turizmin inkişafı əhalinin məşğulluğunun təmin olunmasına xidmət edir. Bundan başqa, ildən-ilə pensiya və maaşların artırılmasına da fikir verilir. Gələcəkdə neft sektorundan asılılıq aradan qaldırılandan, qeyri-neft sektoru iqtisadiyyatda ciddi çəkiyə malik olandan sonra sosial sahəyə daha çox vəsait ayırmaq imkanı olacaq. Hər halda, Azərbaycan qonşularına nisbətən bütün sahələrdə öndədir. Həm iqtisadi, həm sosial, həm də siyasi baxımdan Azərbaycan irəlidədir. Bu da bir sıra parametrlərə görə Azərbaycanı ön mövqeyə çıxarır. Reallıq ondan ibarətdir ki, Azərbaycanda həyata keçirilən islahatlar ciddi sosial siyasətlə tənzimlənir. İslahatlardan əhalinin digər təbəqəsi əziyyət çəkmir. Çünki bütün bunların arxasında əhalinin sosial maraqlarının qorunması siyasəti dayanıb. Sözügedən siyasət bu gün də davam etdirilir. Hesab edirəm ki, bu, ictimaiyyətin maraqlarına xidmət edir. Ona görə də bu istiqamətdə görülən işləri dəstəkləyirəm”.
Vidadi ORDAHALLI
