Əli Əliyev: "Danışıqların deyilməyən ən maraqlı tərəfi isə budur ki, Suriyanın ərazisi unitarlığı saxlanmaqla həmin dövlətlər arasında bölüşdürülüb"
Rusiyanın paytaxtı Moskvada Rusiya, Türkiyə və İran xarici işlər nazirlərinin iştirakı ilə üçtərəfli görüş keçirilib. Görüşdə Suriyanın Hələb şəhəri ətrafındakı vəziyyət, şəhər sakinlərinin təxliyyəsi və Suriya probleminin həlli müzakirə olunub.
Verilən məlumata görə, Rusiya, İran və Türkiyə XİN rəhbərləri tərəfindən Suriyada siyasi proseslə bağlı bəyanat razılaşdırılıb. Bu barədə jurnalistlərə açıqlamasında Rusiyanın xarici işlər naziri Sergey Lavrov bildirib.
Nazirin sözlərinə görə, Rusiya, Türkiyə və İran Suriya böhranının hərbi yolla həllinin mümkün olmadığına dair vahid mövqeyə malikdir. O, həmçinin, əlavə edib ki, Rusiya, İran və Türkiyə XİN rəhbərləri Suriyanın suverenliyi, ərazi bütövlüyü və vahidliyinə hörmət etməyə çağırıblar.
Lavrov bəyan edib ki, Rusiya, İran və Türkiyə Suriya hökuməti və müxalifəti arasında razılığın əldə olunmasına dair danışıqlar prosesində qarant rolunda çıxış etməyə hazırdır.
Üç mühüm ölkənin əldə etdiyi bu razılaşma Suriyanın gələcək taleyinə necə təsir edəcək?
Vətəndaş və İnkişaf Partiyasının sədri Əli Əliyev qəzetimizə açıqlamasında bildirdi ki, Moskvada Suriya ilə bağlı mühüm razılaşma olub: "Bu faktı inkar etmək olmaz. Tarixdə ilk dəfə presedent olacaq bir hadisə baş verib. Faktiki olaraq, Qərbin və ABŞ-ın iştirakı olmadan dünyanın ən qəliz problemlərindən biri başqa üç ölkənin səyi nəticəsində həllini tapıb. Danışıqların deyilməyən ən maraqlı tərəfi isə budur ki, Suriyanın ərazisi unitarlığı saxlanmaqla həmin dövlətlər arasında bölüşdürülüb. Türkmənlər yaşayan əraziyə Türkiyə, şiələrin kompakt yaşadığı yerlərə İran, digər ərazilərə isə Rusiya-Əsəd cütlüyü nəzarət edəcək. Təbiidir ki, bundan sonra Suriyada stabillik təmin oluna bilər. Lakin belə bir razılaşma ABŞ-ın və Qərbin ürəyincə deyil. Biz bunu həmin dairələrin 3 dövlətə qarşı yönəlik davranışlarında aydın hiss edirik. İranla bağlı əldə olunan razılaşma ləğv edilmək üzrədir, ABŞ Rusiyaya qarşı sanksiyaları daha da sərtləşdirdi, Türkiyəni isə öz daxilindən müharibəyə cəlb ediblər. Mənim qənaətim belədir ki, Rusiyanın Türkiyədəki səfirinin öldürülməsi də məhz bu qəbildən olan məsələlər sırasına aiddir".
Məhəmmədəli QƏRİBLİ
