Rusiyanın ABŞ-a kiberhücumlar təşkil etməsi, hətta belə hücumlar vasitəsilə prezident seçkilərinin nəticələrinə təsir etməsi ətrafında qalmaqal səngimir. Əksinə, proseslərin gedişi ABŞ və Rusiya arasında yeni kiber müharibənin başlana biləcəyini belə istisna etmir.
Xatırladaq ki, bu günlərdə ABŞ-ın Mərkəzi Kəşfiyyat İdarəsi (MKİ) Rusiya hakimiyyətini günahlandıraraq, prezident seçkilərində Donald Trampa dəstək göstərə bilməsi üçün Moskvanın haker hücumlarından istifadəsi barədə məlumat yaymışdı. Ancaq ölkənin Federal Təhqiqatlar Bürosu (FTB) bu iddia ilə razılaşmayıb. Moskvada isə bu fikri, ümumiyyətlə, yaxın buraxmırlar. Amma Ağ Evin mətbaut katibi Coşua Ernest Rusiyanın kiberməkanda qərəzli fəaliyyətindən Donald Trampın xəbərdar olması barədə açıqlama verib. Bildirib ki, bu kiber hücumlar Trampa kömək edərək, Klintonun seçki öncəsi kampaniyasına xələl gətirib. Tramp Coşua Ernesti "axmaq oğlan" adlandırıb. Onun sözlərinə görə, Ağ Evin mətbuat katibi öz vəzifəsini çox pis yerinə yetirir. O, hətta Ernestin prezident Barak Obamanın xəbəri olmadan açıqlama verə biləcəyini ehtimal edib: " Heç bilmirəm, bu axmaq oğlan prezident Barak Obama ilə danışır, ya yox. Düzgün mətbuat katibinin olması çox vacibdir. Çünki Ernest məlumat ötürmək barədə çox yarıtmazdır."
Amma buna rəğmən, Rusiyanın kiber hücumları barədə iddialar da səngimir. ABŞ-ın Birləşdirilmiş Qərargahlar Komitəsinin keçmiş sədri Martin Dempsin isə iddia edir ki, prezident seçkilərindən əvvəl Rusiya Pentaqona kiber hücum həyata keçirib.
Onun sözlərinə görə, rusiyalı hakerlər Pentaqonun əməkdaşlarından birinin elektron ünvanına giriş əldə edərək, ümumi sistemə sızmağı bacarıblar: "Milli təhlükəsizlik agentliyinin direktoru Maykl Rocers səhər tezdən mənə zəng edərək hücum haqqında məlumat verdi. Hücum qeyri-adi sürətlə həyata keçirilmişdi. Biz bunun qarşısını almaq üçün bir saat vaxt sərf etdik. Həmin müddətdə hakerlər yüksək rütbəli zabitlərin kompyuterlərindən məlumatları çıxara bildilər. Yeganə variant şəbəkəni partlatmaq idi. Əlimizdən heç nə gəlmədi. Rusiya bunu çox məxfi və sürətlə etdi, demək olar ki, onlar istədiklərinə nail olmuşdular". İndi də prezident seçkilərinə müdaxilə barədə iddialar ABŞ-da Rusiyaya qarşı müvafiq addımlar atılmasını istəyənlərin sayını artırır. Hətta prezident Barak Obama da Rusiyanın seçkilərə kiber müdaxiləsi ilə bağlı iddialarına sərt cavab verib. Obama Rusiyaya hücum mesajı verib: "Xarici bir hökumət seçkilərin bütövlüyünü pozmağa yönələn addım atıb. Bizim də hərəkətə keçməyimiz lazımdır və istədiyimiz zaman istədiyimiz yerdə hücum edəcəyik. Cənab Putin bu məsələdəki mövqeyimi yaxşı bilir, çünki bunu birbaşa onun özünə demişəm". Amerikalı ekspertlər Obamanın bu açıqlamalarının Rusiyaya qarşı hücum mesajı olduğunu və yaxın zamanda bunun reallaşa biləcəyini hesab edir. "NBC News" telekanalı isə bu günlərdə belə bir məlumat yayıb ki, artıq Amerikanın hərbi hakerləri Rusiyanın elektrik təchizatı sisteminə, telekommunikasiya şəbəkəsinə və Kremlin idarəetmə sisteminə daxil olub. Məlumata görə, hərbi hakerlər Rusiyanın elektrik təchizatı sisteminə, telekommunikasiya şəbəkəsinə və Kremlin idarəetmə sisteminə daxil olaraq məxfi Amerika kibersilahı ilə hücum həyata keçirmək üçün platsdarm yaradıblar. İndi hücumu həyata keçirmək üçün onlar ABŞ rəhbərliyinin əmrini gözləyirlər.
Telekanal bildirir ki, Amerikanın vəzifəli şəxsləri çoxdandır Rusiya, Çin və digər ölkələrin Birləşmiş Ştatların mühüm infrastruktur obyektlərinin proqram təminatına virus yeritmək üçün cəhdlər göstərib. Artıq ABŞ da düşmənlərə qarşı eyni taktikanı işə salıb. Kanala daxil olan sənədlərə əsasən, ən azından Rusiyaya qarşı belə əməliyyat keçirilib. Çünki Amerika rəsmiləri Rusiyanın ABŞ prezidenti seçkilərinin nəticələrinə kiber-hücumlarla müdaxiləsi ehtimalından narahatdır. ABŞ-ın kiber-komandanlığının keçmiş müşaviri, ehtiyatda olan polkovnik Harri Braun deyib ki, Amerika Milli Kəşfiyyat Agentliyinin xarici ölkələrdəki kompyuter şəbəkələrinə haker hücumları sonradan kiber-silah üçün platsdarm yaratmaq üsuluna çox oxşayır: "Siz şəbəkəyə çıxış əldə edirsiniz, orada öz iştirakınızı təmin edib sonra istədiyinizi etmək imkanları qazanırsınız. Əvvəlcə siz informasiyaları toplayırsınız, amma həmin çıxış imkanlarını daha aqressiv hərəkətlər üçün də istifadə edə bilərsiniz". ABŞ kəşfiyyatındakı yüksək rütbəli mənbə deyib ki, Rusiya Birləşmiş Ştatların strateji infrastrukturuna qarşı irimiqyaslı kiberhücum həyata keçirməyə cəhd etsə, buna cavab olaraq Rusiyanın bir çox sistemləri sıradan çıxarılacaq.
Nahid SALAYEV
