Mehman Muradlı: "Düşünmürəm ki, bütün bu iddia və araşdırmaların seçkinin nəticəsinə hansısa formada təsiri olsun"
ABŞ prezidenti Barak Obama bu il keçirilən prezident seçkilərinə yönəlmiş kiber hücumlar və xarici müdaxilə iddialarının araşdırılması üçün tapşırıq verib. Bu barədə Ağ Evin Daxili Təhlükəsizlik və Terrorla Mübarizə üzrə müşaviri Liza Monako bildirib. L.Monako Obamanın təlimatı əsasında ölkənin kəşfiyyat qurumlarının seçkilərlə bağlı iddiaları araşdıracağını və hesabat hazırlayacağını söyləyib.
O, araşdırmanın Obamanın vəzifəsindən gedəcəyi 2017-ci il 20 yanvardan öncə yekunlaşdırılacağını, bunun Konqresdə də elan olunacağını vurğulayıb.
Obamanın bu göstərişinin seçkinin ümumi nəticələrinə təsiri ola bilərmi?
Hüquqşünas Mehman Muradlı qəzetimizə açıqlamasında bildirdi ki, Obamanın belə bir qərar verməsi təsadüfən ortaya çıxmayıb: "Artıq uzun müddətdir ABŞ və dünya mətbutında bu mövzular ətrafında araşdırmalar aparılır. Dünyanın nüfuzlu qəzetlərində iddia olunur ki, Rusiya ABŞ prezident seçkilərində Hillari Klintonla mübarizə aparan Donald Trampa dəstək vermək üçün məxfi addımlar atıb.
Məsələ ilə bağlı "New York Times" qəzetində dərc olunmuş məqalədə deyilir ki, rəsmilər seçkilər vaxtı baş verən kiber müdaxilələrdə Rusiyanın əli olduğunu "böyük əminliklə" təsdiqləyib.
Lakin Donald Trampın komandası Mərkəzi Kəşfiyyat İdarəsinin dediklərilə razılaşmır.
Əsasən də İllinois və Arizona ştatının seçki bazalarının kiber müdaxiləyə məruz qaldığı bildirilir. Rusiya ABŞ seçkilərinə haker müdaxiləsi barədə iddiaları rədd edir. Bu cür ciddi iddialar səsləndirildiyi səbəbindən Barak Obama başqa cür addım ata bilməzdi. Ən azından, bunu etməli idi. Çünki ortaya kifayət qədər ciddi iddialar qoyulursa, bu mütləq araşdırılmalıdır. Ancaq düşünmürəm ki, bütün bu iddia və araşdırmaların seçkinin nəticəsinə hansısa formada təsiri olsun".
Məhəmmədəli QƏRİBLİ
