Qardaş Türkiyədə növbəti dəhşətli terror aktı bütün diqqətləri yenidən bu problem üzərində cəmləşdirir. İndi maraq doğuran məqam odur ki, terror probleminin kökü haçan kəsiləcək. Xatırladaq ki, dekabrın 10-da axşam saatlarında İstanbulun mərkəzində yerləşən "Vodafon Arena" stadionunun çıxışı yaxınlığında iki güclü partlayış baş verib.
Partlayışlardan biri Çevik Polis Alayının toplandığı yerdə bomba yüklü avtomobillə törədilib. İkinci partlayışı törətməyə hazırlaşan kamikadzeni hədəfə 10 metr qalmış müəyyən edən polislər itkini maksimum azaltmaq üçün tədbir görüblər. Terrorçunu saxlayan 5 polis həyatı bahasına qəhrəmanlıq göstərərək partlayışın qarşısını almağa çalışıb, lakin intiharçını durdura bilməyib. Nəticədə Beşiktaş rayonunda baş verən terror hücumlarında ölənlərin sayı 44-ə çatıb, yaralıların sayı isə 155 civarındadır. Hadisə ilə bağlı 13 nəfər həbs olunub. Bu arada terror hücumunun baş verdiyi yerə "Şəhidlər təpəsi" adı verilib.
Terror aktının məsuliyyətini terrorçu PKK qruplaşmasının qolu sayılan TAK üzərinə götürüb. Ədirnə həbsxanasında saxlanan PKK-nın siyasi qolu olan HDP-nin həmsədri Səlahəddin Dəmirtaş isə baş verənlərə maraqlı münasibət bildirib. Hər fürsətdə PKK-nı müdafiə edən, hücumlarda özünü partladan terrorçuların dəfninə qatılan və qardaşı PKK rəhbərliyində təmsil olunan kürd separatçı açıqlamasında "terror" kəlməsini belə işlətməyib: "Bütün toplumu, xalqımızı şiddət qarşılığında barış, qardaşlıq, demokratiya va azadlıq duyğuları ətrafında ümidlə bir arada durmağa dəvət edirəm. Şəraitimiz nə qədar çətin olursa olsun, müqəddəs hesab etdiyimiz sülhü müdafiə etməkdən imtina etməməli, ümidimizi itirməməliyik. Bu çətin dövrü mübarizə ilə aşaraq, ölkəni stabil mərhələyə çıxarmağı bacarmalıyıq". Amma sirr deyil ki, terror aktlarının törədilməsinə xeyir-dua verənlərdən biri elə PKK-nın siyasi qanadıdır. Daha bir maraqlı məqam isə terrorçulara həm də Qərbdə verilən dəstəkdir. Məsələn, Türkiyə kəşfiyyatının hesabatında Avropada fəaliyyət göstərən PKK-ya bağlı təşkilatların illik 30 milyon avro yardım aldığı haqda şok məlumatlar yer alıb. Avropa Birliyi tərəfindən terror təşkilatı elan edilməsinə baxmayaraq, PKK-nın qitədə sərbəst fəaliyyətinin təmin olunduğu bildirilib. Xatırladaq ki, Avropada PKK 2002, TAK isə 2006-cı ildə terror qruplaşmaları siyahısına daxil edilib. Amma onların fəaliyyətinə qarşı çıxmaq əvəzinə, burada həmin təşkilatlara hətta maliyyə yardımı belə ayrılır. Halbuki, hələ ötən ay Türkiyə prezidenti Rəcəb Tayyib Ərdoğan PKK-ya dəstək olan ölkələrə sərt mesaj vermişdi. Bir terror təşkilatı ilə mübarizədə başqa bir terror təşkilatına dəstək olmağın düzgün olmadığını deyən Ərdoğan Qərb dünyasını tənqid etmiş, belə bir məqama da diqqət çəkmişdi ki, PKK-nın hücumlarının arxasında həm də rəhbəri ABŞ-da saxlanan FETÖ-nün olduğunu anlamaq üçün kahin olmağa gərək yoxdur. İstanbul şəhərində törədilən terror aktına Qərbin münasibətini şərh edən "Yeni Şafak" nəşri də çox maraqlı faktlar açıqlayıb: "Türkiyəni ABŞ və Qərbin dəstəyini alan terror təşkilatları ilə vurmağa çalışırlar. Avropa ölkələri PKK, FETÖ və DHKP/C kimi terror təşkilatlarını qoruyur, terrorçulara sığınacaq verir". Nəşr qeyd edir ki, Avropa ölkələrinin bəslədiyi terror təşkilatları Türkiyənin şəhərlərini hədəfə alıb: "ABŞ və Almaniya Suriyada İŞİD-lə mübarizə adı altında PKK terror təşkilatının Suriya qolu olan PYD-yə silah və milyonlarla dollar maliyyə yardımı edir. Bu yardım döyüş meydanında da özünü göstərir. ABŞ əsgərləri PKK-çılarla çiyin-çiyinə döyüşlərə qatılır, xüsusi əməliyyatlar həyata keçirir".
"Yeni Şafak" bildirir ki, ABŞ başqa olmaqla, Qərb ölkələri İraqda da eyni cür davranır: "Türkiyə düşməni olan "Haşdi Şabi" və PKK-ya dəstək verilir. İŞİD-ə qarşı mübarizədə heç bir irəliləyiş olmadığı halda, PKK hər keçən gün güc qazanır, Suriya və İraqda aldığı hərbi yardım sayəsində bir orduya çevrilir. Qərbin PKK-ya verdiyi silahlar isə Türkiyəyə göndərilərək terror aktlarında istifadə edilir. ABŞ Suriyadakı PKK düşərgələrində toplanan terrorçulara "İŞİD-lə mübarizə" adı altında təlim keçir. Burada təlim keçən terrorçular Türkiyəyə qayıdaraq polis, əsgər və mülki insanlara qarşı qətliamlar törədir. PKK-nın əlində Almaniya istehsalı "MILAN" tank əleyhinə raketlər və yüksək partlayış gücünə sahib ən qumbaraları var. Bundan başqa, İngiltərə, Fransa, İran, İsrail kimi bir çox dövlətlər PKK-ya silah-sursat və maliyyə yardımı göndərir". Qeyd edilir ki, Avropanın siyasi mərkəzi olan Belçika, həmçinin, PKK-nın da Avropadakı mərkəzi rolunu oynayır.
Nahid SALAYEV
