Ramiz Tağıyev: "Türkiyənin 10 illərlə davam edən müzakirələrini və buna uyğun həyata keçirdiyi islahatları unutmaq olmaz"
Türkiyə prezidenti Rəcəb Tayyib Ərdoğan ölkəsinin Avropa Birliyinə üzvlüyü ilə bağlı referendum keçirilə biləcəyini istisna etməyib. Bu barədə Ərdoğan yerli jurnalistlərə açıqlamasında deyib. "Narahat olmayın, biz də britaniyalılar kimi edərik. Referendum təşkil edib xalqdan soruşacağıq: Avropa Birliyinə üzvlük haqqında danışıqları davam etdirəkmi? Xalq "hə" desə, üzvlük prosesini davam etdirəcəyik".
Türkiyə prezidenti əhalisinin əksəriyyəti müsəlman olduğu üçün ölkəsinin Brüssel tərəfindən üzvlüyə qəbul olunmadığını deyib: "Bizi Avropa Birliyinə ona görə qəbul etmirlər ki, əhalinin əksəriyyəti müsəlmandır. Fransanın keçmiş xarici işlər nazirlərindən biri mənə açıqca demişdi ki, "Türkiyə boş yerə Avropa Birliyinin qapısında durur. Siz müsəlmansınız".
Türkiyə xarici işlər naziri Mövlud Çavuşoğlu da ölkəsinin məsələ ilə bağlı referendum keçirə biləcəyini inkar etməyib.
Türkiyə belə referenduma gedərsə, nə baş verər?
Siyasətçi Ramiz Tağıyev qəzetimizə açıqlamasında bildirdi ki, son zamanlar Avropa İttifaqının verdiyi sözlərə əməl etməməsi Türkiyəni çox məyus edib. Ancaq referendum bir həll yolu deyil. Bəlkə də Aİ-yə cavab cəhdləri ola bilər. Türkiyə xalqı referendumda "bəli" və ya "xeyr" desə, heç bir şey dəyişməyəcək. Türkiyənin 10 illərlə davam edən müzakirələrini və buna uyğun həyata keçirdiyi islahatları unutmaq olmaz. Unutmaq lazım deyil ki, Aİ islahatları Türkiyədə bir çox yeniliklərin həyata keçirilməsini təmin edib. Türkiyə bu məsələdə ciddi olmasaydı, Avropa İttifaqı Nazirliyi kimi struktur yaratmazdı. Avropa İttifaqı ilə müzakirələrin davam edib-etməməsi məsələsinin Türkiyədə referenduma çıxarılmasının məntiqi izahını tapa bilmirəm. Çünki Avropa İttifaqı özü buna isti baxmırsa, Türkiyənin bu məsələyə hansısa bir şəkildə referendumda münasibət bildirməsinin nə mənası qalır?"
Məhəmmədəli QƏRİBLİ
