Vüqar Qədirov: "Bizim bütün strateji məsələlər, o cümlədən Dağlıq Qarabağ mövzusunda mövqelərimiz üst-üstə düşür"
Türkiyənin Avropa İttifaqına üzvlük məsələsilə bağlı tərəflər arasında qalmaqal davam etməkdədir. Avropa Komissiyası hər dəfə yeni bəhanələr uydurmaqla bu prosesi ləngitməyə çalışır. Bu istiqamətdə hazırlanmış son hesabatda komissiya Türkiyədə söz və mətbuat azadlığının, eləcə də insan haqları ilə bağlı vəziyyətin qənaətbəxş olmadığını bildirir. Bütün bu fikirlər qurumun 9 noyabr tarixli hesabatında öz əksini tapıb.
Türkiyəyə bildirilən iradlar sırasında Azərbaycanla da bağlı məqam var. Nə qədər təəccüblü olsa da, bildirilir ki, Türkiyə 2016-cı ilin aprel ayında cəbhədə baş verən toqquşmalar zamanı açıq şəkildə Azərbaycana dəstək verib.
Hesabatda həmçinin ermənidilli "Aqos" qəzetinin baş redaktoru Qrant Dinkin öldürülməsilə də bağlı narahatlıq ifadə olunub.
Avropa Komissiyasının Türkiyəyə bildirdiyi iradlar sırasına aprel hadisələri ilə bağlı məqamı salması nə dərəcədə doğrudur?
Ekspert Vüqar Qədirov qəzetimizə açıqlamasında bildirdi ki, bu məsələdə Avropa İttifaqı adından hesabatı hazırlayan qurum böyük yanlışlığa yol verir: "Türkiyənin Avropa İttifaqına qəbul edilməməsinin səbəbi hamıya bəllidir. Bu barədə kifayət qədər danışılıb. Ancaq maraqlıdır ki, qarşı tərəf əsl səbəbi gizlədərək, hər dəfə yeni-yeni bəhanələr uydurur. Nə qədər təəccüblü olsa da, qarşı tərəf budəfəki əsaslandırmasında Azərbaycanla da bağlı məqamlara toxunub. Türkiyənin Avropa ailəsinə layiq bilinmədiyilə bağlı irəli sürülən arqumentlərdə bildirilir ki, Türkiyə aprel hadisələri zamanı Azərbaycana açıq dəstək verib. Bu yanaşma Avropa İttifaqının tərəfdar çıxdığı konvensiyalarla daban-dabana ziddir. Əvvəla bilmək lazımdır ki, aprel hadisələri zamanı nə baş verib? Azərbaycanın işğal altında saxlanan ərazilərindən erməni silahlı birləşmələri yenidən hücuma keçməyə cəhd edib. Əks hücum zamanı düşmən geri oturdulub, eyni zamanda işğal altındakı bəzi strateji yüksəkliklər azad olunub. Həmin zaman Türkiyə Azərbaycana heç bir əsgəri və hərbi yardım göstərməyib. Ancaq diplomatik müstəvidə Türkiyənin mövqeyi həmin vaxt ənənəvi yanaşması ilə eynilik təşkil edib. Türkiyə hər zaman bildirir ki, Ermənistan işğal etdiyi Azərbaycan torpaqlarından geri çəkilməyincə, onunla hər hansı diplomatik münasibət qurulmayacaq. Bu səbəbdən də, təkidli tələblərə baxmayaraq, o, Ermənistanla arasındakı sərhədin açılmasına icazə vermir. Aprel hadisələri zamanı Türkiyə Ermənistanın işğalını pisləyibsə, Avropa bundan niyə narahat olur? Axı işğalçını yerində oturtmaq, Azərbaycanın itirilmiş haqlarını bərpa etmək kimi məsələ həm də deyilən qurumun səlahiyyətinə aid məsələdir. Özləri bu yanaşmanı ortaya qoya bilmirsə, niyə haqq sözü deyənləri də bundan çəkindirmək istəyirlər? Türkiyə ilə Azərbaycan qardaş ölkədir. Bizim bütün strateji məsələlər, o cümlədən Dağlıq Qarabağ mövzusunda mövqelərimiz üst-üstə düşür. Bu səbəbdən də Avropa Komissiyasının belə cılız arqumentlərlə iki qardaş ölkəni üz-üzə qoymaq cəhdi alınan deyil".
Məhəmmədəli QƏRİBLİ
