Elşən Mustafayev: "Artıq Tramp ABŞ-ın yeni prezidenti kimi təbriklər qəbul edir"
ABŞ-da Trampa qarşı aksiyaların geniş vüsət aldığı bir vaxtda yerli media Donald Trampın prezident kürsüsünə əyləşməsinə mane ola biləcək ssenariləri gündəmə gətirib.
"Newsweek" jurnalı prezidentin seçilməsi üsuluna diqqət çəkərək yazır ki, dövlət başçısı xalq tərəfindən birbaşa seçilmir. Ölkə başçısını xalqın Konqresə seçdiyi nümayəndələr heyəti müəyyənləşdirir. Prezidentin seçilməsi üçün isə namizədin 270 səsə ehtiyacı var.
Bildirilir ki, Donald Trampın Konqresdə 290 dəstəkləyicisi var. Onun rəqibi Hilları Klintonda isə bu göstərici 228-dir. Bu o demək deyil ki, Trampa dəstək sözü verərək nümayəndələr heyətinə seçilən şəxslərin hamısı öz namizədinə səs verəcək.
"Newsweek" jurnalı yazır ki, tarixdə bunun əksinin baş verdiyi müşahidə olunub. Məsələn, 1836-cı ildə Virciniyanı təmsil edən 23 nümayəndə son anda qərarını dəyişərək seçkilər zamanı məğlub olan namizədə səs verib. Ümumiyyətlə ölkə tarixində 157 nümayəndənin son anda qərarını dəyişdiyi müşahidə olunub. Bu üzdən, Donald Trampın prezident seçildiyini əminliklə ifadə etmək hələ tezdir.
Trampın prezident seçilməyəcəyilə bağlı deyilənləri nə dərəcədə inandırıcı saymaq olar?
Azərbaycan Milli İstiqlal Partiyasının sədr müavini Elşən Mustafayev bu istiqamətdə aparılan söhbətləri dedi-qodu adlandırır. Onun sözlərinə görə, Tramp artıq xalq tərəfindən ABŞ-ın prezidenti seçilib: "Təbii ki, Trampın qələbəsi gözlənilmirdi və kiçik bir fərqlə rəqibini uda bilib. ABŞ-da Tramp əleyhinə aksiyalar keçirilir. Bu təbiidir. Belə proseslər digər prezident seçkiləri dönəmində də olub. Artıq əlacı hər yerdən üzülən Tramp əleyhdarları psixoloqlar, baxıcılara istinadən məlumatlar tirajlayır. Trampa impiçment ediləcəyi də proqnozlaşdırılıb. Həmin məlumatlarda qeyd edilir ki, Tramp, çox güman, bir ilin ərzində ya impiçment ediləcək, ya da istefa verəcək. Bunlar hamısı əsası olmayan fərziyələrdir. Hesab edirəm ki, belə məlumatları dövriyyəyə buraxmaqla məğlub tərəf özünə təsəlli vermiş olur. Trampın prezident olması üçün bir rəsmiləşdirmə mərasiminə ehtiyac var. İmpiçment onu dəstəkləyərək nümayəndə seçilən şəxsin Trampa səs verməyəcəyi təqdirdə baş tuta bilər. Həmin nümayəndələrdən kiminsə fikrini dəyişəcəyinə inanmıram. Hətta belə olacağı təqdirdə, bu bir və ya iki nəfər ola bilər. Aradakı fərq isə 70-ə yaxındır. Ona görə də 70 nəfər nümayəndənin bir anda Trampdan imtina edəcəyi heç də inandırıcı deyil. Artıq Tramp ABŞ-ın yeni prezidenti kimi təbriklər qəbul edir".
Məhəmmədəli QƏRİBLİ
