Avropa Şurası Parlament Assambleyasında Dağlıq Qarabağ münaqişəsinin sülh yolu ilə nizamlanmasına dair yazılı qətnamə qəbul olunub. Trend-in AŞPA-nın saytına istinadən verdiyi məlumata görə, qətnamə 44 deputat tərəfindən imzalanıb.
Qətnamədə deyilir: "Dağlıq Qarabağ münaqişəsinin sülh yolu ilə nizamlanmasına alternativin olmadığına əminliyini ifadə edən AŞPA, münaqişənin davamlı və ədalətli həllinin tapılması üçün beynəlxalq səviyyədə razılaşdırılmış yeganə danışıq formatı olan Minsk Qrupunun həmsədrlərinin səylərinə daim dəstək verdiyini təsdiqləyir. Buna görə də biz ATƏT-in Minsk Qrupu həmsədrlərinin etdiyi daimi çağırışlara hörmətlə yanaşmağa, onların mandatlarını pozmamağa və danışıqlar prosesini mürəkkəbləşdirməməyə çağırırıq".
Qətnamədə həmçinin qeyd olunur ki, deputatlar bütün tərəfləri həmsədr ölkələr olan Fransa, ABŞ və Rusiyanın 2009-cu ildən bəri prezidentlər səviyyəsində edilən beş bəyanatda öz əksini tapmış təkliflər əsasında sülh danışıqları yolu ilə nizamlanmaya nail olmaq üçün qəti addımlar atmağa və lazımi siyasi iradə göstərməyə çağırır.
Qətnamədə qeyd olunur: "Biz münaqişə zonasında gərginliyin artması ilə bağlı narahatlığımızı bildiririk. Top və raket qurğuları kimi ağır silahlardan istifadə edilməsi qəbuledilməzdir və bu mülki əhali üçün ciddi təhlükə yaradır. Biz mülki şəxslər də daxil olmaqla insan ölümünə görə dərindən təəssüflənirik. Atəşkəs rejiminin pozulması hallarının tədqiq edilməsinə dair mexanizmlərin yaradılması və ATƏT-in Minsk Qrupu həmsədrlərinin digər təklifləri gərginliyin azalmasına və sülh danışıqlarının aparılması üçün daha əlverişli şəraitin yaranmasına kömək edəcək".
Ermənilər bu dəfə AŞ PA-nı aldada bilmədilər
Azərbaycanın AŞ PA-dakı nümayəndə heyətinin üzvü Elxan Süleymanov AŞ PA-nın Strasburqda keçirilən sessiyası zamanı ermənilərin təxribat xarakterli hərəkətləri barədə məlumat yayıb.
E.Süleymanov bildirib ki, bu sessiya son vaxtlar Ermənistanın cəbhəboyu ərazilərdə yaşayan Azərbaycanın mülki vətəndaşlarına hücumlarının artmasından sonra keçirilən ilk AŞ PA sessiyası idi: "Bu günlərdə Ermənistanın təbliğat maşını beynəlxalq ictimaiyyətin diqqətini real problemdən - Azərbaycan ərazisinin Ermənistan tərəfindən qanunsuz silahlı işğalının davam etməsi faktından yayındırmağa ümid edərək, bütün media qurumlarında həddindən artıq fəal işləyir və absurd ittihamlarla Azərbaycana hücumlar edirdi. Ermənistan tərəfindən süni şəkildə siyasi gərginlik yaradılmışdı və onlar Azərbaycanın müsbət imicini dağıtmaq və işğal edilmiş ərazilərdə gedən son əməliyyatlara dair həqiqəti təhrif etmək məqsədilə Strasburq siyasi səhnəsində tammiqyaslı siyasi hücumlar hazırlamışdılar".
O, qeyd edib ki, bu məqsədlə fransızların lideri və erməni lobbiçisi Rene Ruke "Son günlərdə Dağlıq Qarabağ münaqişəsinin faciəvi alovlanması"nı müzakirə etmək üçün cari müzakirə müraciətini irəli sürdü: "Azərbaycan nümayəndə heyəti isə bu təklifə cavab olaraq, oxşar, lakin düzgün ifadə formasında "Azərbaycanın Dağlıq Qarabağ və işğal edilmiş digər ərazilərində zorakılığın faciəvi şəkildə artması" mövzusunu irəli sürdü. Bu düzgün ifadə forması Ermənistanın qəzəbinə səbəb oldu və Ermənistan nümayəndə heyəti "Dağlıq Qarabağa qarşı son təcavüz zamanı Azərbaycanın törətdiyi müharibə cinayətlərı" adlı üçüncü absurd və ekstremist təklifi irəli sürdü. Deputatlar AŞ PA-da geniş müzakirənin keçiriləcəyini yerli Ermənistan mətbuatında elan etmişdilər. Onlar tezisləri üçün tam dəstək səfərbər etdiklərinə və indi Azərbaycanın nüfuzunun qəti və ictimai şəkildə puç ediləcəyinə öz auditoriyalarını əmin etmişdilər".
E.Süleymanov əlavə edib: "Azərbaycan bu şəraitdə belə, təhqiredici müzakirə aparmaq marağında deyil. Bu səbəbdən də mən bu məsələyə dair bütün müzakirə müraciətlərinin geri götürülməsini müdafiə etdim. 18 apreldə Büro bu debatların mümkünlüyünü müzakirə etdi. Qısa, lakin gərgin müzakirədən sonra təklif səsə qoyuldu. Azərbaycan tam qələbə qazandı, belə ki, Büro bu sessiyada Dağlıq Qarabağ və işğal edilmiş digər ərazilərlə bağlı bütün müzakirələri təxirə salmaq, barədə bir səs istisna olmaqla, yekdil qərar verdi. Beləliklə, AŞ PA Bürosundakı bu böyük dəstəyi çox yüksək qiymətləndirirəm, çünki bu dəstək avropalı deputatların artıq Ermənistanın yanlış məlumatlarına kor-koranə aldanmadığını, yaxud çaşqınlığa düşmədiyini göstərdi. Bu, eyni zamanda ermənilərin Avropa Şurası daxilində planlaşdırılmış təbliğat müharibəsi aparmasının qarşısını aldı".
AŞ PA-da Ermənistan hakimiyyəti pislənilib
Azərbaycanın AŞ PA-dakı nümayəndə heyətinin üzvü Qənirə Paşayeva deyib ki, Avropa Şurası Parlament Assambleyasının Bürosunun və Daimi komissiyasının fəaliyyəti haqqında hesabatda Ermənistan hakimiyyəti və nümayəndə heyəti pislənilib.
Q.Paşayeva bildirib ki, AŞ PA-nın Strasburqda keçirilən plenar iclasında təqdim edilən hesabatda həmçinin "Ermənilərin sərhədyanı ərazilərdə əhalini qəsdən sudan məhrum etməsi" ilə bağlı qətnamə layihəsi öz əksini tapıb.
Həmçinin Sərsəng su anbarı ilə bağlı hesabatın hazırlanmasında əməkdaşlıq etmədiklərinə görə Ermənistan hakimiyyəti və nümayəndə heyəti pislənilib. Assambleya hesab edir ki, Ermənistan hakimiyyətinin və nümayəndə heyətinin bu cür davranışı üzv ölkə kimi məsuliyyətlərinə və öhdəliklərinə uyğun gəlmir.
AŞ PA prezidenti Azərbaycan və Ermənistan nümayəndə heyətlərinin rərhbərləri ilə görüşüb
Onu da qeyd edək ki, AŞ PA prezidenti Pedro Aqramunt Azərbaycan və Ermənistan nümayəndə heyətlərinin rəhbərləri Səməd Seyidov və Samvel Farmanyan ilə görüşüb. Bu barədə P.Aqramunt "Tvitter"dəki səhifəsində yazıb.