"Azərbaycanın aldığı silahların bir gün işə düşəcəyi məlum idi. Lakin bu, Ermənistan üçün xoşagəlməz sürpriz oldu. Niyə bu silahlar aprelin əvvəlində atəş açmağa başladı? Bu sualın birmənalı cavabı yoxdur. Azərbaycan əminliklə göstərdi ki, hərbi ritorikası elə belə deyil. Silahları boş yerə almayıb".
APA-nın Moskva müxbirinin verdiyi məlumata görə, bunu tanınmış rusiyalı politoloq və beynəlxalq icmalçı Arkadi Dubnov Moskvanın Karnegi Mərkəzində keçirilən Dağlıq Qarabağla bağlı ekspert müzakirələrində çıxışı zamanı bildirib.
Ermənistanın Rusiya və Kollektiv Təhlükəsizlik Müqaviləsi Təşkilatı (KTMT) ilə münasibətlərindən danışan A. Dubnov qeyd edib ki, Dağlıq Qarabağdakı "dörd günlük müharibə” münasibətlərə aydınlıq gətirib: "Aydın oldu ki, KTMT daxilində Dağlıq Qarabağla bağlı vahid rəy mövcud deyil. Ona görə də, bu təşkilatdan Dağlıq Qarabağ münaqişəsi ilə bağlı Ermənistanın nəsə gözləməsi yersizdir. Biz bunu baş verən son hadisələrdə Qazaxıstan və Belarusun simasında gördük. Məlumdur ki, Dağlıq Qarabağ KTMT-nin məsuliyyət daşıdığı ərazi deyil. "Dörd günlük müharibə” zamanı bu fakt bir daha təsdiqini tapdı. Eyni sözü Avrasiya İqtisadi Birliyinə də aid etmək olar. Aprelin 8-də Avrasiya İqtisadi Birliyinin Yerevanda iclası keçirilməli idi. Lakin iclas təxirə salındı və bu, Yerevanın razılığı olmadan edildi. Ermənistanın razılığı olmadan Avrasiya İqtisadi Birliyinin iclasının təxirə salınması ona təşkilatın üzv ölkələri tərəfindən vurulan tərs sillə idi".
Erməni jurnalistin aprelin əvvəlində Dağlıq Qarabağda baş verən hərbi qarşıdurmanın birinci raundunun kimin xeyrinə bitdiyi ilə bağlı sualına cavabında Arkadi Dubnov bildirib ki, bu raundu xal hesabında Azərbaycan uddu: "Azərbaycan "status-kvo"nu pozdu və məqsədinə nail oldu. "Status-kvo"nu pozmaq Azərbaycanın marağında idi. Azərbaycan bununla bütün dünyaya nümayiş etdirdi ki, müharibə etməyə hazırdır. Bundan başqa, Azərbaycan psixoloji, siyasi və diplomatik planda da uğur qazanmış oldu. Bütün dünya ictimaiyyətinin diqqətini Dağlıq Qarabağ münaqişəsinə yönəldə bildi”.
"Ermənistan-Azərbaycan, Dağlıq Qarabağ münaqişəsinə Kollektiv Təhlükəsizlik Müqaviləsi Təşkilatının müdaxiləsi imkansızdır". Bunu isə Rusiyanın tanınmış siyasi eksperti Aleksey Malaşenko deyib.
O, Kollektiv Təhlükəsizlik Müqaviləsi Təşkilatının (KTMT) bir mif olduğunu söyləyib: "Bu təşkilat Dağlıq Qarabağda münaqişəyə müdaxilə edə bilməz. Hətta təşkilatın Azərbaycan-Ermənistan sərhədində gedən müharibəyə də müdaxilə etməsi imkansızdır. Təsəvvür edin ki, Azərbaycan tankları İrəvandadır. Bu zaman Qazaxıstan tanklarımı Azərbaycan tanklarına qarşı duracaq?"
Dağlıq Qarabağda baş verən hərbi qarşıdurmanın birinci raundunun kimin xeyrinə bitdiyinə dair sualına cavabında A. Malaşenko "Azərbaycan ilk raunda Ermənistanı "nokdaun" vəziyyətinə saldı" - deyib.
Müzakirələrə Almaniyadan video-görüntü ilə qatılan rusiyalı politoloq, qafqazşünas Sergey Rumyantsev isə Dağlıq Qarabağda münaqişənin yenidən alovlanmasında təəccüblü heç nə olmadığını bildirib: "Azərbaycan tərəfi hər zaman açıq-aydın deyib və bu gün də deyir ki, Ermənistan işğal etdiyi torpaqlardan çəkilməsə, hərbi yola əl atacaq. Ermənistan getdiyi yoldan dönməsə, regionda müharibə qaçılmazdır. Bildiyiniz kimi, təmas xəttində Azərbaycan və Ermənistan qoşunları üz-üzə durub. Həmin ərazidə sülhməramlı qüvvələr yoxdur. Sonra da hamı hərbi qarşıdurmanın baş verdiyinə təəccüblənir".