Elşən Manafov: “183 deputatın yekdilliklə səs verməsinə görə rəsmi Paris Bakı qarşısında izahat verməli olacaq”
Fransa Milli Assambleyası keçmiş separatçı rejimin nümayəndələrinin “təxirəsalınmadan və qeyd-şərtsiz azad olunmasını” tələb edən qətnaməni yekdilliklə qəbul edib. Qətnamə tam şəkildə Azərbaycanın suveren hüquqlarını və ərazi bütövlüyünü görməzdən gəlir.
Qətnaməni təqdim edən deputat Loran Vokye çıxışında bildirib ki, Fransa Ukraynadakı müharibədə və digər beynəlxalq məsələlərdə fəal olduğu halda, Ermənistan üçün heç bir reaksiya verməmək “ifadə olunmaz bir haqsızlıq” olardı.
Ötən il Prezident Əliyev Fransanın Azərbaycanda yeni təyin olunan səfiri Sofi Laqutun etimadnaməsini qəbul edərkən dedi ki, iki ölkə arasında anlaşılmazlığa səbəb olan məsələlər artıq keçmişdə qalıb. Bakı Parislə münasibətləri yoluna qoymaq istəyir, Milli Assambleya isə qərəzli qətnaməsi ilə münasibətlərin üstündən yenidən xətt çəkməyə çalışır.
Sözügedən məsələ ilə bağlı fikirlərini baki-xeber.com-la bölüşən politoloq Elşən Manafov Fransa Milli Assambleyasının separatçılarla bağlı qərarına bir neçə prizmadan yanaşdı: “Fransa Milli Assambleyası artıq neçənci dəfədir ki, Azərbaycanın ərazi bütövlüyü ilə bağlı məsələyə bu sayaq münasibət sərgiləyib, beynəlxalq hüquqa sayqısızlıq nümayiş etdirir. Keçən illərdə Assambleya separatçı bir qurumu “müstəqil dövlət” kimi tanımaqla həm Azərbaycan-Fransa münasibətlərinin ruhu, həm də rəsmi Parisin mövqeyi ilə üst-üstə düşməyən kəsadlı bir sənəd qəbul edib. Demokratiya və insan haqlarına hörmət adı altında separatçıların dəyirmanına su tökməyə çalışıb. O zaman rəsmi Paris tələsik bəyanatla çıxış edərək Assableyanın mövqeyinin, onun mövqeyi olmadığını bildirib. Fransa Milli Assambleyasının Qarabağdan olan separatçı rejimin, habelə Azərbaycan dövlətinə qarşı vuruşmuş terrorçuların rəsmi Bakıdan qeyd-şərtsiz azad olunması ilə bağlı təklifi ilə bu qurum bütün əndazələri aşıb. Belə ki, Bakıda ittiham olunanlar separatçı və terroristlərdir, rəsmi Bakı məsələyə etnik konteksdən yanaşmır. Təqsirləndirilənlərin qanunvericiliyin tələblərindən kənar hərəkətlərinin insanlığa, humanizm və ümumbəşəri dəyərlərə qarşı olduğu, onların azərbaycanlılara qarşı etnik təmizləmə siyasətində iştirakı məhkəmə yolu ilə təsdiq edilib. Bütün bunların konteksində, özü də rəsmi Bakının Fransa ilə munasibətlərin nizama salınması uçun son bir neçə ildə sərgilədiyi mövqenin fonunda Assambleyanın bu qərarı suallar doğura bilmir. İstisna deyil ki, həmişə olduğu kimi bu dəfə də, onun qərarına Fransadakı erməni diasporasının təsiri olub. Lakin, məlum qərara Assableyanın baş tutmuş iclasında 183 deputatın yekdilliklə səs verməsinə görə rəsmi Paris Bakı qarşısında izahat verməli olacaq. Zira parlamentdə məlum qərara müxalifət partiyalarının təmsilçiləri ilə yanaşı, Makronun özünün də, rəhbərlik etdiyi siyasi partiya səs verib. Bu isə Fransa hökumətinin bölgədə münaqişənin sülh yolu ilə tənzimlənməsi, nəhayət ki, uzunmüddətli, dayanıqlı sülhün bərpa edilməsilə bağlı mövqeyinin ziddinə olan bir addımdır. Nəhayət, Makron iqtidarı Paşinyanın Ermənistanda demokratik cəmiyyət naminə keçirdiyi islahatlara siyasi dəstək verdiyini bəyan edib. Paşinyan isə Azərbaycanla münasibətlərin Vaşinqton razılaşmalarının prinsipləri zəminində nizamlanması üçün götürdüyü kursda Qarabağdakı separatçı rejimlə münasibətlərdən kənar mövqe tutub. Azərbaycanla iqtisadi əməkdaşlığın genişləndirilməsi, nəqliyyat blokadasının aradan qaldırılması Ermənistanın iqtisadi dirçəlişi üçün ciddi platformadır. Bu platforma qarşıdakı seçkilərdə Paşinyana ugur qazanmaqda dəstək ola bilər. Bütün bunların konteksində Fransa Milli Assableyasının qəbul etdiyi qərar dolayısı yolla da, olsa terrorizmə və separatçılığa dəstək təsiri bağışlayır. Regionda sülhün, sabitliyin təmin edilməsində maraqlı olan rəsmi Parisin mövqeyinin ziddinədir”.
Vidadi ORDAHALLI
