Məhəmməd Əsədullazadə: “Əsas məsələ dəmir yolu xəttinin çəkilişi ilə bağlıdır və Paşinyan isəyir ki, Rusiya bu məsələdə Ermənistana yardım etsin”
Ermənistanın Baş naziri Nikol Paşinyan yanvarın 15-də jurnalistlərlə söhbətində bildirib ki, Rusiya Ermənistanı Azərbaycan və Türkiyə ilə birləşdirən dəmir yollarını tez bir zamanda bərpa etməlidir. “Dünənki hadisələrdən sonra Ermənistanı Azərbaycan və Türkiyə ilə birləşdirən dəmir yollarının bərpası üçün lazımi vaxt gəldi və biz bunun indi baş verməsini istəyirik”-deyə N. Paşinyan bildirib. Ermənistanın baş nazirinin sözlərinə görə, elan ediləcək proseslər davam edir və bu proseslər işlərin mümkün qədər tez aparılmasını tələb edir.
Paşinyan xatırladıb ki, TRIPP (Zəngəzur dəhlizi) layihəsi məsələsi Rusiya ilə, o cümlədən Prezident Putinlə görüşü zamanı müzakirə olunub.
“Biz rusiyalı tərəfdaşlarımızdan bu məsələ ilə bağlı qərar vermələrini xahiş edirik", - deyə Paşinyan əlavə edib.
Paşinyan deyib ki, Putinlə görüşəndə də biz Zəngəzur dəhlizi məsələsini müzakirə etdik. Rusiyalı tərəfdaşlarımızdan xahiş etdik ki, bu barədə qərar versinlər. Zəngəzur dəhlizi ilə bağlı Paşinyan Putindən nə qərar gözləyir? Qərarın mahiyyəti nədir? Bu nə deməkdir? Çünki burada açıq deyir ki, biz xahiş etmişik ki, onlar Zəngəzur dəhlizi ilə bağlı qərar versinlər. Nə qərar verəcək Rusiya?
“Görünür, Rusiya tərəfi bu məsələdə tərəddüd edir”
Politoloq Məhəmməd Əsədullazadə baki-xeber.com-a bildirdi ki, Ermənistanın Baş naziri Nikol Paşinyanın Zəngəzur dəhlizi ilə bağlı Rusiya ilə danışıqlar aparması oradakı dəmir yolu xəttinin çəkilməsi ilə bağlıdır. “Çünki Rusiya da qeyd edir ki, Ermənistanın dəmir yolu sistemi, Zəngəzur dəhlizində sökülən dəmir yolu xəttləri də Rusiyanın mülküyyətindədir, Rusiya bu məsələlərdə cavabdehdir. Ola bilsin Paşinyan Putindən xahiş edib ki, sökülən dəmir yollarını Rusiya tərəfi inşa etsin. Görünür, Rusiya tərəfi bu məsələdə tərəddüd edir”-deyə M.Əsədullazadə bildirdi.
Politoloq qeyd etdi ki, Zəngəzur dəhlizi istiqamətində Rusiya Federal Təhlükəsizlik Xidməti, sərhəd qoşunları İran Ermənistan sərhəddində dayanıb və Paşinyan Rusiyaya onların çıxarılması məsələsini də deyə bilər. “Ancaq əsas məsələ dəmir yolu xəttinin çəkilişi ilə bağlıdır və Paşinyan isəyir ki, Rusiya bu məsələdə Ermənistana yardım etsin. Ermənistanın Rusiyanı Zəngəzur dəhlizinə gətirməsi isə mümkün deyil. Orada onun iştirakına nə Azərbaycan, nə Ermənistan, nə də ABŞ tərəf razılıq verər. Fikrimcə, Rusiya tərəfi dəmir yolu xəttinin çəkilməsinə o zaman razı ola bilər ki, özünün də fiziki olaraq Zəngəzur dəhlizində iştirakı təmin olunsun”-deyə bildirən M.Əsədullazadə qeyd etdi ki, iştirakı təmin edilməyəcəyi təqdirdə Rusiya dəmir yollarının bərpasından imtina edə bilər. “Nikol Paşinyan burada monipulyasiya edir. O, bilir ki, Rusiya bu dəmir yolu xəttini çəkməyəcək, Zəngəzur dəhlizində Amerika şirləti olacaq. Ona görə də prosesi yubatmağa çalışır ki, Rusiyanı bu məsələdə haqsız çıxarsın”-deyə M.Əsədullazadə qeyd etdi.
İradə SARIYEVA
