Ramil Hüseynov: "Ermənistanın son anda bundan imtina etməsi xarici faktorlarla bağlıdır"
Azərbaycan Ermənistanın sülh müqaviləsi layihəsi ilə bağlı təkliflərinə cavab verib. Bu barədə Ermənistan Xarici İşlər Nazirliyinin mətbuat katibi Ani Badalyan məlumat verib.
"Bu gün biz Azərbaycan tərəfdən sülh müqaviləsi layihəsi (11-ci təkliflər paketi) ilə bağlı cavab təkliflərini aldıq", - deyə Badalyan bildirib.
Qeyd edək ki, Ermənistan sülh sazişinin tam razılaşdırılması üçün növbəti təkliflər paketini Azərbaycana göndərib.
Bu arada Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev bəyan edib ki, Ermənistan çərçivə sazişindən imtina edib: "COP29 ərəfəsində Azərbaycan və Ermənistan arasında sülh müqaviləsinin bağlanacağı gözlənilir. Lakin məndə olan məlumata görə, Ermənistan tərəfi bir müddət öncə çərçivə razılaşmasını imzalamaqdan imtina edib".
Onun sözlərinə görə, əvəzində Ermənistan hazırkı layihədən 3 maddənin çıxarılmasını təklif edib. Bu üç məsələ Ermənistan Konstitusiyasında Azərbaycanın Qarabağ bölgəsi ilə bağlı ərazi iddiaları, beynəlxalq hüquqi müharibə və üçüncü ölkələrin qüvvələrinin Ermənistan-Azərbaycan sərhədinə yerləşdirilməsi ilə bağlıdır.
Burada diqqəti çəkən məqam Ermənistanın çərçivə sazişinin imzalanmasından imtina etməsidir. Çünki məhz Ermənistan özü təklif edirdi ki, birinci cərçivə sazişi imzalayaq, sonra əsas sülh sazişi imzalansın. Maraqlıdır, Ermənistan çərçivə sazişindən niyə imtina edib?
"Çox güman ki, Fransa Ermənistanı bu pozucu addımı atmağa məcbur edib"
Sözügedən məsələyə aydınlıq gətirən "Yeni Xətt" Siyasi Tədqiqatlar Mərkəzinin rəhbəri Ramil Hüseynov "Bakı-Xəbər"ə açıqlamasında İrəvanın bundan imtina etməsini xarici faktorlarla əlaqələndirdi: "Həqiqətən də Ermənistanın çərçivə sazişindən imtina etməsi təəccüb doğurur. Çünki Ermənistan bütün vasitələrlə çalışırdı ki, tez və alayarımçıq bir sənəd imzalansın. Bu baxımdan hansısa çərçivə sazişinin imzalanması Paşinyan hakimiyyətinin marağında idi. Ermənistanın son anda bundan imtina etməsi xarici faktorlarla bağlıdır. Nəzərə almaq lazımdır ki, Ermənistan müstəqil dövlət deyil. Ona görə də rəsmi İrəvanın bununla bağlı təkbaşına qərar verməsi real görünmür. Çox güman ki, Fransa Ermənistanı bu pozucu addımı atmağa məcbur edib. Çünki Fransa prezidenti Emmanuel Makron apardığı yanlış siyasətlə ölkəsini prosesdən kənarda saxlayıb. Ən başlıcası isə, Paris Cənubi Qafqazda sabitliyin yaranmasında, iki ölkə arasında sülh sazişinin imzalanmasında maraqlı deyil. Belə olmasaydı, Fransa Avropa İttifaqının mülki missiyası çətiri altında müxtəlif təxribatlarla məşğul olmazdı. Çünki sülh sazişi imzalansa, Aİ missiyası Ermənistanı tərk edəcək. Bu da Fransanın maraqlarına uyğun deyil. Ona görə də Paris prosesin uzanmasında maraqlıdır".
Vidadi ORDAHALLI
