Akif Nağı: "Ermənistan bu "əsir" oyununa beynəlxalq təşkilatları, müəyyən dövlətləri də cəlb edib nəyəsə nail olmaq istəyir"
Ermənistan beynəlxalq təşkilatları aldatmaqda davam edir və "əsir" manipulyasiyası ilə məşğul olur, bu qurumların diqqətini saxta məlumatlara cəlb etmək istəyir. Bildiyiniz kimi, Ermənistan hələ də beynəlxalq təşkilatlarla separatçı hərəkatın cinayətkar rəhbərlərini, "liderlərini" "hərbi əsir" kimi qələmə vermək oyununu davam etdirir.
O cümlədən də Beynəlxalq Qırmızı Xaç Komitəsi (BQXK) ilə. BQXK ilə iş prosesində hələ də Ermənistan Bakıda saxlanılan 23 nəfər cinayətkarı "hərbi əsir" kimi qələmə verir. Halbuki, Azərbaycanda hərbi əsir yoxdur. Separatçı "liderlər" cinayətkardır, onlar qətiyyən hərbi əsir sayılmırlar, onlar cinayət başında yaxalanmış və zərərsizləşdirilmiş canilərdir. Bu faktdır.
Ermənistan isə gerçəyi qəbul etmək istəmir və BQXK-nın əməkdaşlarının Azərbaycanda saxlanılan cinayətkarlara baş çəkməsi xəbərində işlədilən ifadələri özlərinə uyğun şəkildə təhrif edirlər.
Yazırlar ki, bu ilin oktyabr ayında Beynəlxalq Qızıl Xaç Komitəsinin (BQXK) əməkdaşları Azərbaycanda saxlanılan erməni məhbuslara baş çəkib. BQXK-nın Azərbaycan nümayəndəliyi məlumat yayıb ki, saxlanılan şəxslərlə təkbətək görüşlər keçirilib və onların ailələri ilə ünsiyyət qurmaları üçün şərait yaradılıb.
Erməni mediası yazır ki, bundan əvvəl BQXK-nın əməkdaşları sentyabr ayında erməni məhbuslara baş çəkiblər. Qırmızı Xaç əməkdaşlarının konkret kiminlə görüşdüyü bildirilməyib. Məlumdur ki, Komitənin məlumatında erməni canilər "əsir" kimi təqdim edilmir. Amma bunlar yazırlar ki, "əsirlikdə olan" "Vigen Euljekchyanın ailəsi onunla bir neçə aydır danışmadıqlarını bildirib və onun sağ olmasına dair sübut tələb ediblər".
Guya Azərbaycanda 23 "erməni əsir" var. Onların da 17-si 2023-cü ildə "əsir götürülüb".
Saxlanılan cinayətkar nə vaxtdan "əsir" olur? Yenə də qeyd edirik ki, onlar "əsir" yox, əli Azərbaycan xalqının qanına batmış, dövlətimizə, ərazi bütövlüyümüzə qarşı silahlı cinayət törətmiş qatı cinayətkarlardır. Arkadi Qukasyanın da, Bako Saakyanın da, Arayik Arutyunyanın da, Ruben Vardanyanın da, David Manukyanın da, Levon Mnatsakanyanın da, David Babayanın da əli xalqımızın qanına batıb, onlar cinayətlərinin cəzasını alacaqlar.
"Azərbaycana bu qondarma məsələ ilə təzyiq göstərməyə cəhd etməklə heç nəyə nail ola bilməyəcəklər"
Azad Vətən Partiyasının sədri Akif Nağı "Bakı-Xəbər"ə bildirdi ki, ermənilər Azərbaycana qarşı ən müxtəlif vasitələrdən istifadə edirlər: "Bununla Azərbaycanın mövqeyinə hansısa zərər vurmaq, Azərbaycanı sıxıntıya salmaq, ittihamlarla üz-üzə qoymaq niyyəti güdürlər. Əsas məqsədləri də odur ki, Azərbaycanın beynəlxalq aləmdə və bölgədə mövqeyi zəifləsin. Ermənilər bizim torpaqlarımıza köçürüləndən, biz onlara öz torpaqlarımızda yer verəndən sonra onlar ancaq "yersiz gəldi yerli qaç" fəlsəfəsi ilə hərəkət etməyə çalışıblar. Özlərinin burada qonaq olduqlarını unutmaq üçün burada qonaq olmadıqlarını, gəlmə olmadıqlarını sübut etməyə çalışıblar. Azərbaycanlılar da, başqa xalqlar da, respublikalar da ermənilərə "siz bura gəlməsiniz, yer xalq deyilsiniz" deyirdilər, onlar da bundan həmişə rahatsız olublar. Bu səbəbdən də bu torpaqların "sahibinə" çevrilmək istəyirdilər. Necə ki, I Pyotrun vaxtından bunları köçürülməsinin əsası qoyuldu və bugünə qədər də həmin xətt davam edir. Azərbaycanın gücü qarşısında bu xətt zəifləyib. Erməni "əsirləri" məsələsini ortaya atıblar və bundan istifadə etməyə çalışırlar. Hər kəs bilir ki, burda "əsirdən" söhbət getmir. Döyüş olmayıb ki, onlar hansısa döyüşə rəhbərlik etsinlər, faktiki olaraq o şəxslər Azərbaycana qarşı terror aktlarına rəhbərlik edirdilər. Əsir o deməkdir ki, konkret döyüş zamanı bu və digər tərəfdən əsir götürülsün. Ermənilər tərəfindən işlədilən "əsir" ifadəsi yerində deyil. Ermənistan çalışır ki, bəzi beynəlxalq təşilatlar, bəzi dövlətlər "əsir" məsələsini gündəmdə saxlasın, bundan Azərbaycana qarşı təzyiq vasitəsi kimi istifadə etsin. Fransa kimi bəzi dövlətlər, BQXK və ona oxşar regional və beynəlxalq qurumlar Azərbaycanın regiondakı liderlik mövqeyi ilə hesablaşmaq istəmirlər, dövlətimizi zəiflətməyə çalışırlar. Çünki əgər Azərbaycan zəifləyərsə həmin bu Qərb mərkəzləri, Qərb dövlətləri regiona çox asanlıqla girə biləcəklər. Gürcüstana girməyə cəhd göstərdilər, gürcülər onlara xeyli güzəştə getdilər, xeyli aldandılar, sonra başa düşdülər ki, hər bir dövlətin özünün marağı var. Bu marağın da mərkəzində ərazi bütövlüyü məsələsi dayanır. Sənin ərazi bütövlüyün pozulursa başqa heç nədən, hansısa uğurdan, nəticədən danışmaq olmaz. Bütün böyük və kiçik dövlətlər ərazi bütövlüyü məsələsində heç vaxt güzəştə getmirlər..."
Qərbin bölgəyə daxil olmaq üçün Ermənistandan alət kimi istifadə etdiyini deyən A.Nağının sözlərinə görə, o ölkələr Ermənistana humanizm göstərmir, ondan öz maraqlarına uyğun şəkildə yararlanır. "Bakıda saxlanılan cinayətkarlara "əsir" adı qoyub onları ortaya atıblar və müəyyən dövlətlər Azərbaycana təzyiq göstərməyə cəhd edirlər. Ermənistan da alət rolunda olsa da, özü üçün nəsə əldə etməyə, qazanmağa çalışır. Ermənistan bu "əsir" oyununa beynəlxalq təşkilatları, müəyyən dövlətləri də cəlb edib nəyəsə nail olmaq istəyir. Azərbaycanın mövqeyi aydındır. Dünyanın qarşısına fakt qoyur. Qanunlara tam riayət etməklə Azərbaycana qarşı cinayət əməlləri törətmiş hərbi caniləri zərərsizləşdirib, həbs edib Bakıya gətirib. Hər bir normal dövlət bu mövqedən çıxış edərdi. İspaniyada Barselonaya bağlı separatçı liderlərin bir hissəsini tutdular, bir hissəsi qaçıb Avropa getdi. İspaniya hökuməti onlara qarşı heç bir güzəştə getmirdi. Başqa bir ölkə də eyni dərəcədə hərəkət edərdi. Heç bir ölkə razılaşmaz ki, onun ərazisində kimlərsə separatçı hərəkətlə məşğul olsun, sonra da heç nə olmamış kimi həyatını, fəaliyyətini davam etdirsin. Buna Azərbaycan da razı olmazdı. Dünya da bunu başa düşür, ən azından başa düşməlidir. Azərbaycan haqlı mövqeyini ortaya qoyur. Onların nə deməyindən aslı olmayaraq separatçılar cəzalarını çəkəcəklər. Kimi istəyirlər göndərsinlər, gəlib faktlarla, sənədlərlə tanış olsun. Onların yüzlərlə, minlərlə insanı qətlə yetirməsi ilə bağlı saysız faktlar var. Bunlarla tanış olsunlar, sonra söz desinlər. Azərbaycana bu qondarma məsələ ilə təzyiq göstərməyə cəhd etməklə heç nəyə nail ola bilməyəcəklər. Azərbaycan COP29-u keçirəcək, digər böyük tədbirlərə də ev sahibliyi edəcək, heç kəs Azərbaycanı öz yolundan döndərmək gücündə deyil. Azərbaycan həm özü güclüdür, eyni zamanda da türk dünyası ailəsinin, Turan ailəsinin bir hissəsidir, bir üzvüdür. Azərbaycan Prezidenti bu məsələni aydın şəkildə vurğulayır. Azərbaycan tək deyil, burda Türkiyə, Qazaxıstan, Qırğızıstan, Özbəkistan, Türkmənistan var. Bu böyük bir güc mərkəzi, strateji mövqedir. Türkiyə ilə Azərbaycan arasında Şuşa bəyannaməsi imzalanıb"-deyə A.Nağı bildirdi.
İradə SARIYEVA
