Azər Həsrət: "BBC Böyük Britaniyanın təbliğat məqsədi ilə qurduğu çox böyük bir media qurumudur"
BBC-nin 237 əməkdaşı yayımın baş direktoru Tim Davieyə ünvanlanmış məktubu imzalayıb. Həmin məktubda jurnalistlər yayımçıdan İsrail-Həmas müharibəsi ilə bağlı reportajlarda "ədalət, dəqiqlik və qərəzsizliyə riayət etməyi" tələb edib.
Məktubda BBC "Qəzzanı işıqlandırarkən ardıcıl olaraq ədalətli və dəqiq dəlillərə əsaslanan jurnalistika" təqdim etməməkdə ittiham olunur.
BBC kimi haqq-ədalət mücəssəməsi olan bir media qurumunda nələr baş verir? Bunlar axı az qala bütün dünyada medianın tərəfsizliyini, müstəqilliyini, siyasəti alətə çevirməməyi təbliğ edir. Bir neçə gün əvvəl isə BBC-nin dövlət büdcəsindən maliyyələşdirilməsi ilə bağli xəbər yayılmışdi. Xəbərdə BBC rəhbərliyi əsaslandırmağa çalışırdı ki, yayıma ayrılan dövlət vəsaiti artırılmalıdır.
Sualımızı cavablandıran siyasi şərhçi Azər Həsrət bildirdi ki, BBC Böyük Britaniyanın təbliğat məqsədi ilə qurduğu çox böyük bir media qurumudur. Bu, ABŞ-ın Azadlıq, Azad Avropa radiosu, eyni zamanda "Amerikanin səsi" media qurumu, Almaniyanın "Douche Welle" alman dalğası qurumu kimi qlobal səviyyədə təbliğat işi ilə məşğuldur. Düzdür, onlar hamısı bəyan edirlər ki, tərəfsiz media fəaliyyəti göstərirlər, amma əslinə qalanda heç bir tərəfsizlikdən söhbət gedə bilməz. Adını çəkdiyim bütün qurumlar, o cümlədən də BBC-nin özü dövlətin təbliğat alətlərifir. Yəni BBC Böyük Britaniyanın dövlət maraqlarının qlobal səviyyədə təbliğatının aparılması ilə məşğul olur. Ona görə də onların medianın tərəfsizliyi, ədalətliliyi, siyasi alətə çevrilməməsi və s. haqqında dedikləri sözdən başqa bir şey deyil. Bizdə bir misal var, deyirlər, mollanın dediyini elə, elədiyini etmə. Onlar da həmin molla kimidirlər, deməyinə deyirlər, amma elədikləri başqa şeydir. Onların elədiklərini biz etsək, bütün dünyanı üstümüzə qaldırarlar. Yəni nə ədalət, nə tərəfsizlik, nə də medianın siyasi alətə çevrilməməsi onların söykəndiyi dəyər deyil. Onların söykəndiyi dəyər, dediyim kimi, bəlli təbliğatdır və o təbliğat çərçivəsində də hərəkət edirlər. Bunun qarşılığında isə dövlət qurumlarından kifayət qədər maliyyə yardımı alırlar.
Sadəcə olaraq, onlarla işləyən jurnalistlərin də, təbiidir ki, hamısı vicdanını iturməyib. Jurnalistikanın "qızıl qaydaları"nı heç nəyə güzəştə getməyəcək jurnalistlər, o cümlədən də Böyük Britaniyada da var. Zaman-zaman bu adamlar səslərini qaldırırlar.
Yeri gəlmişkən deyim ki, təkcə BBC deyil, Böyük Britaniyanın "The Quardian" qəzeti də eyni fəaliyyətlə məşğuldur. Düzdür, "The Quardian" birbaşa dövlətə bağlı qəzet deyil, amma tam kampaniyalarla məşğul olan, dünyaca məşhur qəzetdir. Bu onlar üçün əslinə qalanda adi haldır. Korporativ və dövlət maraqlarından çıxış etmək bu media qurumları üçün adi haldır. Amma onların təbirincə, bizim üçün bu olmaz - Azərbaycanda durub media və ya jurnalist olaraq dövlət marağından çıxış edəndə üstümüzə gəlirlər ki, bəs siz hakimiyyətə işlədiniz, dövlətə işlədiniz, medianın tərəfsizlik prinsipini pozdunuz və s. Özləri isə sırf bu işlə məşğuldurlar. Yəni qeyri-adi heç nə baş vermir, BBC həmişə belə işləyib, bundan sonra da belə işləyəcək. Dediyim kimi, bu, Böyük Britaniyanın konkret olaraq dövlət maraqlarının carçısıdır, təbliğat alətidir. Ona görə də bəzi jurnalistlər orada etiraz səsini ucaltmaq məcburiyyətində qalıb.
Dəniz NƏSİRLİ
