Vüqar Bayramov: "Azərbaycanın əldə etdiyi zəfərlər Cənubi Qafqazda xüsusi düzənin formalaşmasına səbəb olub"
Azərbaycanın qələbəsi ilə yekunlaşan 44 günlük müharibənin başa çatmasından artıq dörd il keçir. 2020-ci il sentyabrın 27-də Ermənistan silahlı qüvvələrinin təxribatlarına cavab olaraq, Azərbaycan ordusu əks-hücum əməliyyatlarına başladı.
44 gün davam edən Vətən müharibəsi 2020-ci il noyabrın 10-da Ermənistanın kapitulyasiyası ilə nəticələndi. Vətən müharibəsində qələbə qazanılması bundan sonrakı dövrdə ölkəmiz üçün ciddi dəyişikliklər demək idi. İşğaldan azad edilmiş ərazilərimizin bərpası, buradakı erməni vəhşiliklərinin dünyaya tanıdılması, erməni separatizminə "yox" deyilməsi Azərbaycanın xüsusilə beynəlxalq nüfuzuna müsbət təsir edən amillərin artmasına rəvac verdi.
Məlumdur ki, Azərbaycan region üçün, eləcə də beynəlxalq iqtisadi aləm üçün çox mühüm layihələr icra edir. Burada diqqət yetirilməli olan xüsusi məqam ondadır ki, Azərbaycan düşünülmüş siyasət nəticəsində Ermənistanı bu layihələrdən təcrid edə bilib. Ona görə də qeyd edə bilərik ki, bütün regional layihələrdən təcrid olunmuş Ermənistandan fərqli olaraq, Azərbaycan transmilli layihələrlə regionda tamamilə yeni mənzərə yaradıb. Azərbaycan regionun enerji xəritəsini, nəqliyyat xəritəsini yenidən tərtib edib. Azərbaycanın təşəbbüsləri təkcə xalqımızın deyil, bir çox ölkələrin, o cümlədən region ölkələrinin maraqlarını təmin edir. Transmilli layihələrin reallaşması həm də tərəfdaş ölkələrin sayının artmasına səbəb olub. Tərəfdaş ölkələr də Qarabağ münasiqişəsinin həlli zamanı Azərbaycanın haqlı mövqeyini dəstəkləyiblər.
"Transmili layihələrin region üzərində reallaşması Azərbaycanın geosiyasi və geoiqtisadi mövqeyinin daha da güclənməsinə səbəb olur"
Azərbaycanın iqtisadi üstünlüyü barədə fikir bildirən millət vəkili Vüqar Bayramov "Bakı-Xəbər"ə şərhində bildirdi ki, Azərbaycanın əldə etdiyi zəfərlər Cənubi Qafqazda xüsusi düzənin formalaşmasına səbəb olub. Ölkəmiz həm aparıcı dövlətlər, həm də beynəlxalq təşkilatlarla əməkdaşlığı gücləndirib, regional layihələrin genişləndirilməsinə töhfə verib: "Xüsusən, regional nəqliyyat, enerji layihələri, eləcə də yaşıl enerji ilə bağlı layihələrin reallaşmasında Azərbaycan regionda öz mövqeyi olan ölkələrdəndir. Bu da Azərbaycanın həm coğragi mövqeyi, həm də geosiyasi mövqeyinin möhkəmlənməsinə gətirib çıxarır. Regional layihələr ölkə iqtisadiyyatı üçün müsbət təsirə malikdir. Dayanıqlı iqtisadiyyatın qorunub saxlanması baxımından da əhəmiyyətlidir. Yalnız Orta Dəhliz üzvlərindən 2024-cu il üzrə daşınan yüklərin həcmində 62 faiz artım qeydə alınıb. Bu artım Azərbaycanın həm nəqliyyat, həm də infrastrukturun genişlənməsi ilə bağlıdır. Bu kimi amillər ölkə iqtisadiyyatının və qeyri-neft sektorunun inkişafını stimullaşdırır".
Millət vəkilinin sözlərinə görə, transmili layihələrin region üzərində reallaşması Azərbaycanın geosiyasi və geoiqtisadi mövqeyinin daha da güclənməsinə səbəb olur. Azərbaycanın iqtisadi gücünün artması ölkəmiz üçün əhəmiyyətlidir".
Günel CƏLİLOVA
