Rauf Zeyni: "Biomüxtəlifliyi məhv edən terrorçu dövlətin COP17-yə ev sahibliyi etməsi yolverilməzdir"
Erməni mətbuatı Ermənistanın 2026-cı ildə COP17-yə ev sahibliyi edəcəyini yazır.
Bildirirlər ki, Tərəflərin COP17 Biomüxtəliflik Konfransı 2026-cı ildə Ermənistanda keçiriləcək. Bu barədə Ekologiya Nazirliyindən məlumat verilib.
Bioloji Müxtəliflik üzrə Konvensiya Tərəflərinin Konfransının X (keçmiş Twitter) səhifəsində deyilir ki, səsvermənin nəticələrinə görə, Ermənistan 65 səslə bu tədbirə ev sahibliyi etmək hüququ qazanıb. Guya Azərbaycan 58 səs toplayıb, Ermənistanın topladığı səs 65 olub.
Tərəflərin Bioloji Müxtəliflik üzrə XVI Konfransı (COP16) 21 oktyabr - 1 noyabr 2024-cü il tarixlərində Kolumbiyanın Kali şəhərində keçirilib. Səsvermə orada baş tutub.
Bioloji Müxtəliflik haqqında Konvensiya 5 iyun 1992-ci ildə Rio-de-Janeyroda qəbul edilmiş beynəlxalq müqavilədir.
Ermənistanın 2026-cı ildə COP17-yə ev sahibliyi etməsi hüququnu ona verənlərin, bu ölkəni dəstəkləyənlərin bunu hansı məqsədlə etdiyi aydın deyil. Ya da onlar bunu erməni təəssübkeşliyindən ediblər. Ermənistanın qlobal biomüxtəlifliyə hansı töhfəsindən söhbət gedə bilər ki, o, Azərbaycan torpaqlarını işğalda saxladığı dövrlər biomüxtəlifliyə qarşı terror həyata keçirib, ekosid törədib. Azərbaycan ərazilərində biomüxtəlifliyin erməni terroruna məruz qalması isə bütün Qafqazın biomüxtəlifliyinə bir zərbə olub. Biomüxtəliflik bir bölgə, rayon və şəhərlə bağlı deyil, o bütöv bir coğrafiyanı əhatə edir. Azərbaycanda bilomüxtəlifliyin terrora məruz qalması o deməkdir ki, bundan bütün Qafqaz bölgəsi, o cümlədən də sərhəd ölkələr ziyan çəkib. Bu halda Ermənistanın belə bir mötəbər tədbirə ev sahibliyi etməsi gülünc bir haldır.
"Azərbaycan torpaqlarını 30 il işğal altında saxlayan işğalçı, terrorçu, genosid törədən, biomüxtəlifliyi məhv edən bir dövlətə səs verən dövlətləri kəskin qınayırıq"
Müstəqil ekspert Rauf Zeyni baki-xeber.com-a "Göründüyü kimi, dünyada situasiya bundan ibarətdir ki, 30 il işğalçılıq edən dövlətlə ABŞ gəlib hərbi təlim keçir, Fransa onu maliyyələşdirir, silahlandırır və digər dövlətlərin də hansı oyunlar oynadığı göz qabağındadır. Heç kəs fərqinə varmır ki, Ermənistan işağlçıdır, terror dövlətidir, terrorçuluqla məşğul olub. Ermənistan terroru nəinki biomüxtəlifliyə zərbə vurub, bu ölkə bütövlükdə təbiətin düşmənidir, Qarabağda və vaxtilə işğalda saxladığı digər ərazilərimizdə flora və faunanı məhv edib, meşə yanğınları törədib, meşələri qırıb, təbiətə, biomüxtəlifliyə qarşı böyük cinayətlər, ekosidlər, ekoloji genosidlər həyata keçirib. Bunlar hamısı bəlli məsələlərdir. Amma göründüyü kimi, Ermənistana lobbiçilik edənlər onun bu cinayətlərinə göz yumurlar"-deyə bildirdi.
R.Zeyninin sözlərinə görə, Ermənistanın davranışları, bu cinayətləri böyük güclərə lazımdırsa, sərf edirsə, onlar ona lobbiçilik edirlər, Fransa, ABŞ onu dəstəkləyə bilər. "Digər ölkələr də Ermənistana özünə görə yox, Fransaya, ABŞ-a görə səs verirlər. Heç nəyin mahiyyətinə varmadan edirlər bunu. Bu da, əlbəttə ki, COP17-nin Ermənistanda keçirilməsini təmin edir. Bu, Ermənistanın öz gücü ilə bağlı deyil, lobbiçilərinin dəstəyi, birbaşa iştirakı, təsiri ilə əldə etdiyi nəticədir. Çox təəssüf ki, Azərbaycan ərazilərində biomüxtəlifliyə qarşı cinayətlər törədən, ekosidlər, ekoloji genosidlər həyata keçirən Ermənistanın bu cinayətlərinə o ölkələr göz yumur. Biomüxtəlifliyi məhv edən terrorçu dövlətin COP17-yə ev sahibliyi etməsi yolverilməzdir".
R.Zeyni bildirdi ki, xaricdəki erməni lobbisi, bu ölkəyə lobbiçilik edən dövlətlər onun cinayətlərini ört-basdır edirlər. "Yadınızdadırsa, Nensi Pelosini Ermənistana gətirmişdilər, "bir damcı göz yaşı 100 milyon dollara" başa gəlmişdi, guya bunlar qondarma, sözdə "soyqırıma" görə "göz yaşı" tökürlər. Buna görə də biz dəfələrlə vurğulayırıq ki, lobbiçilik fəaliyyətini gücləndirmək lazımdır. Bu çox ciddi məsələdir.
Biz Tərəflərin COP17 Biomüxtəliflik Konfransının 2026-cı ildə Ermənistanda keçirilməsinə səs verən dövlətlərə müraciət göndərməliyik ki, kimə səs verdiyinizi bilirsizmi? İndi gəlin, araşdıraq görək, Ermənistana səs verən o 65 dövlət hansı dövlətlərdir? O dövlətlərin Ermənistan haqqında nə qədər məlumatı var? Ermənistanın Azərbaycan torpaqlarında törətdiyi terror, soyqırım, ekosid, genosid və sair cinayatlərlə bağlı nə məlumatları var? Biz səsvermədən öncə onlara bu məlumatları göndərməli və Ermənistana səs verməkdən çəkindirməli idik ki, terrorçu dövlətə səs verməsinlər. Amma indi artıq, gördüyünüz kimi, onlar 2026-cı ildə 30 il ərzində Azərbaycanda törətdiləri o vəhşiliklərin, ekosidlərin, genosidlərin üstünü örtmək üçün beynəlxalq konfrans keçirdəcəklər. Bununla da özlərini belə qələmə verəcəklər ki, guya Ermənistan biomüxtəlifliyə xidmət edən dövlətdir. Çox təəssüf ki, bəşəriyyətdə, dünyada vəziyyət bu cürdür, lobbiçilik, ikili standartlar göz önündədir. Azərbaycan torpaqlarını 30 il işğal altında saxlayan işğalçı, terrorçu, genosid törədən, biomüxtəlifliyi məhv edən bir dövlətə səs verən dövlətləri kəskin qınayırıq".
R.Zeyni qeyd etdi ki, Ermənistanın lobbiləri tərəfindən bu şəkildə dəstəklənməsi, yaranan vəziyyət çox narahatedicidir. "Sülhü, stabilliyi, sabitliyi, inkişafı dəstəkləyən bir dövlət kimi dünyada baş verən bu məsələlərdən çox narahatıq. Vətəndaş cəmiyyəti, müstəqil ekspertlər olaraq bu məsələləri, əlbəttə, diqqətdə saxlayırıq"-deyə R.Zeyni bildirdi.
İradə SARIYEVA
