Fuad İbrahimov: "Hələ ki, Azərbaycanın o birliyə qoşulmasına iqtisadi zərurət yoxdur"
Bakının Avrasiya İqtisadi Birliyinə daxil olmaq planları yoxdur. Bunu Prezident İlham Əliyev ADA Universitetində keçirilən "COP29 və Azərbaycan üçün Yaşıl Baxış" mövzusunda beynəlxalq forumda çıxışı zamanı söyləyib.
Ölkə başçısı bunu belə əsaslandırıb: "Ermənistan istisna olmaqla, Avrasiya İqtisadi İttifaqının bütün üzvləri ilə Azərbaycanın sıx tərəfdaşlıq münasibətləri var. Yəni bizim üçün bu ölkələr qrupu qeyri-adi deyil, biz onları çox yaxşı tanıyırıq. Biz çəkişmə vəziyyətində olmaq və ya iqtisadi tərəfdaşlarımıza xələl gətirə biləcək addımlar atmaq məcburiyyətində qalmaq istəmirik. Bir daha təkrar edirəm ki, beynəlxalq təsisatlarda üzvlüklə bağlı atdığımız bütün addımlarımız hər zaman praqmatizmə əsaslanıb. Bizim belə planlarımız yoxdur, amma deyə bilmərik ki, bu, gələcəkdə müzakirə mövzusu ola bilməz. Hər şey yaxınlaşmaqdan hansı əlavə iqtisadi fayda əldə edəcəyimizdən asılı olacaq. Əgər onları görsək, qəbul edəcəyik. Əks halda, bizi indi mövcud olan əməkdaşlıq səviyyəsi də qane edir".
"Bu kimi birliklər bir sıra hallarda ölkələrin iqtisadi inkişafını məhdudlaşdırır"
Sözügedən məsələ ilə bağlı fikirlərini "Bakı-Xəbər"lə bölüşən iqtisadçı-ekspert Fuad İbrahimov hesab edir ki, zaman-zaman Azərbaycanın həmin birliyə üzv olması gündəmə gətirilir: "Azərbaycanla yaxın olan bir sıra ölkələr AİB-də təmsil olunur. Həmin dövlətlərdən ikisi - Qazaxıstan və Qırğızıstan türkdilli dövlətlərdir. Buna baxmayaraq, hələ ki, Azərbaycanın o birliyə qoşulmasına iqtisadi zərurət yoxdur. Ölkəmiz müstəqil iqtisadi siyasət yeridir. Bu siyasət sayəsində həm də Avropa qurumları ilə əməkdaşlıq edirik. Çünki apardığımız siyasət təktərəfli deyil. O baxımdan Prezident Əliyev çox rassional yanaşma sərgiləyib. Qurum bizə iqtisadi cəhətdən sərf edəcəksə, bizim əlimizi-qolumuzu bağlamayacaqsa, hər hansı məhdudiyyət olmayacaqsa, o zaman Azərbaycan istənilən birliyin üzvü ola bilər. Bununla biz bir daha göstəririk ki, Azərbaycanın siyasi cəhətdən heç kimdən asılılığı yoxdur. Bu kimi birliklər bir sıra hallarda ölkələrin iqtisadi inkişafını məhdudlaşdırır. Onu da qeyd edim ki, Azərbaycan heç Ümumdünya Ticarət Təşkilatının da üzvü deyil. Cənab Prezidentin də çıxışından bəlli olur ki, biz ancaq iqtisadi maraqlarımızı təmin edə biləcək layihələrdə iştirak edəcəyik. Hər hansı siyasi yüklü birliklərə üzv olmaq vacib deyil. Onsuz da Azərbaycanın MDB məkanındakı ölkələrlə ayrı-ayrılıqda ikitərəfli iqtisadi əlaqələri yüksək səviyyədədir. Bu baxımdan ölkəmizin AİB-ə indi üzv olması üçün ciddi zərurət yoxdur".
Vidadi ORDAHALLI
