Qulamhüseyn Əlibəyli: "Bu zaman üçüncü tərəfin maraqlarını təmin etmək lazım gəlmir"
Prezident İlham Əliyev ADA Universitetində keçirilən "COP29 və Azərbaycan üçün Yaşıl Baxış" mövzusunda beynəlxalq forumda bildirib ki, söhbət hər hansı vasitəçilikdən getmir və biz yalnız platforma, məkan barədə danışırıq:
"Qazaxıstan tərəfi Ermənistan və Azərbaycan xarici işlər nazirlərinin Qazaxıstanda görüşünün təşkili ilə bağlı bizə müraciət edib. Biz buna razılığımızı vermişik və Ermənistan da buna razı olsa, iki ölkənin xarici işlər nazirlərinin növbəti görüşü Qazaxıstanda baş tuta bilər. Burada bir məqama aydınlıq gətirmək istərdim. Söhbət hər hansı vasitəçilikdən getmir. Çünki bu gün sərhədimizdə baş verənlər onu nümayiş etdirir ki, bizimlə heç kəsin işi olmadığı, bu vəziyyətin kiminsə siyasi ambisiyaları naminə istifadə edilmədiyi halda biz gec-tez razılığa gələ bilərik. Beləliklə, biz yalnız platforma, məkan barədə danışırıq. Belə bir təklif üçün Qazaxıstan hökumətinə də minnətdarıq. Hesab edirəm ki, indi biz Ermənistan tərəfinin cavabını gözləməliyik".
"Azərbaycanla Ermənistanın üzbəüz oturub ikitərəfli qaydada razılığa gəlməsi hər iki tərəfin maraqlarına uyğundur"
Məsələ ilə bağlı "Bakı-Xəbər"ə açıqlama verən sabiq millət vəkili, hüquqşünas Qulamhüseyn Əlibəylinin fikrincə, Azərbaycan və Ermənistanın razılığa gəlməsi, vasitəçilərsiz ikitərəfli görüşlər keçirməsi günün tələbi olan bir məsələdir: "Çünki dəfələrlə təşəbbüslər göstərilib və meydana vasitəçilər çıxıb. Rusiya, Avropa İttifaqı, ABŞ vasitəçilik edib. Ancaq məsələ ondadır ki, istənilən halda vasitəçilərin hər birinin özünün maraqları var. Hamı çalışır ki, vasitəçilik adı altında öz geosiyasi maraqlarını regionda təmin etsin. Ona görə də Azərbaycanla Ermənistanın üzbəüz oturub ikitərəfli qaydada razılığa gəlməsi hər iki tərəfin maraqlarına uyğundur. Çünki bu zaman üçüncü tərəfin maraqlarını təmin etmək lazım gəlmir. Yalnız hər iki dövlət öz maraqlarına uyğun bir ortaq məxrəcə gəlmək imkanına malikdir. Qazaxıstanın təşəbbüsü ilə xarici işlər nazirlərinin görüşünün keçirilməsi bu məqsədə xidmət edir. Çünki Astana tərəflər arasında vasitəçilik etmir. Sadəcə yer, məkan göstərir və təklif edir ki, həmin məkanda oturub razılığa gəlmiş olsunlar. O baxımdan bu, Azərbaycanın maraqlarına uyğundur. Çünki dəfələrlə rəsmi Bakı ikitərəfli görüşlərin keçirilməsini bəyan edib. Ermənistan tərəfi də bu və ya digər formada həmin platformaya gəlir. Çünki Qazaxın 4 kəndinin qaytarılması ilə bağlı razılaşma vasitəçilərsiz əldə edilib. Vasitəçilərsiz keçirilən görüşlərdə razılıq əldə etmək daha asandır. Ona görə də hesab edirəm ki, belə görüşlərdən imtina etmək lazım deyil. Bu baxımdan Prezident Əliyev düzgün olaraq vurğulayır ki, bizə yalnız məkan və platforma lazımdır. Məkan artıq nəlumdur - Qazaxıstan. Platforma da ki, yəqin sülh danışıqları və yaxud da digər ərazi məsələləri, sərhədlərin delimitasiyası və demarkasiyası ilə bağlı ola bilər".
Vidadi ORDAHALLI
