Samir Hümbətov: "Rusiyanın tutduğu bu "dişsiz" mövqe 5 apreldə Ermənistanın Qərblə 3 - 4 anlaşma imzalamasına səbəb oldu"
Rusiya Federasiya Şurasının sədri Valentina Matvienko senatorlara Ermənistan parlamentinin sədri Alen Simonyanın Rusiya əleyhinə bəyanatları ilə əlaqədar olaraq İrəvana sorğu göndərməyi tapşırıb.
Matvienko bu barədə Simonyanın aprelin 22-də Avropa İttfaqı (Aİ) ölkələrinin parlament sədrlərinin iclasında çıxışındakı anti-Rusiya açıqlamarına münasibət bildirərkən deyib:
"Biz bu cür rusofob çıxışları diqqətdən kənarda qoya bilmərik və ümid edirik ki, parlament öz spikerindən Ermənistanın adından bu cür passajlarla çıxış etmək haqqını ona kimin verdiyini soruşar və məsələni qiymətləndirər".
Matvienko bildirib ki, Simonyanın kimin adından çıxış etdiyini və Ermənistan parlamentinin Simonyanla eyni fikirdə olub-olmadığını öyrənmək üçün parlamentə sorğu göndərəcək:
"Bütün qırmızı xətləri keçən həmkarımıza görə utanc hissi keçirdim".
Qeyd edək ki, bundan əvvəl Rusiya XİN rəsmisi Mariya Zaxarovanın da Alen Simonyanla söz atışması olmuşdu. Zaxarova bildirmişdi ki, Simonyanın ictimai ritorikası tərbiyə hüdudlarını keçir, amma bu, Ermənistan siyasətçilərinə hörmət qazandırmır:
"Simonyan mənim "Ermənistanın Dağlıq Qarabağı Azərbaycanın bir hissəsi kimi tanıdığı" ilə bağlı sözlərimi necə başa düşüb? Əgər onlar ekspert səviyyəsində, yüksək siyasi səviyyədə çıxış etmək istəyirlərsə, bunun üçün hər cür imkan var: bizim İrəvanla dövlətdən tutmuş, ictimaiyyətə qədər bütün sahələrdə mükəmməl ünsiyyət kanallarımız mövuddur. Amma əminəm ki, erməni cəmiyyətini təmsil edən insanların bu cür ifadələr işlətməsi heç də yaxşı görünmür, biz son vaxtlar belə ifadələri çox görmüş və eşitmişik".
Görünən budur ki, Matvienko Simonyanla bağlı çox yumşaq tənbeh üsulu seçib. Ermənistan parlamentində çoxluq Simonyanın təmsil olunduğu hakimiyyətin əlindədir. Belə olan təqdirdə, onunla bağlı hansı tədbir görülə bilər? Çox maraqlıdır ki, Ermənistan günü-gündən Rusiyanı qısnamağa davam edir, Rusiya rəsmiləri isə bu ölkəyə və onun rəsmilərinə münasibətdə adekvat deyil, olduqca yumşaq davranır. Bunun səbəbi nədir?
Siyasi şərhçi Samir Hümbətov "Bakı-Xəbər"ə açıqlamasında bildirdi ki, Rusiya Ermənistan, Cənubi Qafqaz məsələsində son dərəcə diqqətli hərəkət etməyə başlayıb: "Görünür ki, onlar elə bir taktika seçiblər. Güc imkanları ilə Cənubi Qafqazı özləri ilə bir cərgəyə gətirə bilməyəcəklərinə görə, ən yaxşı variant kimi yumşaq dillə danışmağı görürlər. Amma məsələ burasındadır ki, yumşaq dillə danışmaq da baxır hansı dövlət və hansı siyasətçi ilə baş verir. Kimə qarşı aqressiv, kimə qarşı yaxşı, kimə də qarşı məsafəli münasibət göstərmək məsələsi var. Mən düşünürəm, faktiki vəziyyət onu göstərir ki, Rusiya Ermənistanı daha çox sıxdıqca, Ermənistan Qərbə daha da meyllənir. Bu da Rusiyanın içində bir narahatlıq yaradır. Belə davam edərsə, bu vəziyyətin axırı hara gedib çıxacaq? Qarşısını ala biləcəyi bir durum ola bilərmi? Görünür ki, Rusiya bütün bunları fikirləşir. Rusiya belə addımlarla Ermənistanı daha çox itirə bilər. Çünki Ermənistan faktiki 5 aprel anlaşmasını imzalayıb. Kiçik adamların əli ilə nümayiş olunan və Rusiyanın tutduğu bu "dişsiz" mövqe 5 apreldə Ermənistanın Qərblə 3 - 4 anlaşma imzalamasına səbəb oldu. Hesab edirəm ki, bu, həm də Rusiya daxilində erməni diasporuna da hesablanmış bir addım kimi dəyərləndirilə bilər. Amma hər vəziyyətdə Rusiyanın atdığı bu addım "biz Cənubi Qafqazda Ermənistanı itirməyək" anlayışı ilə atılır. Çünki Ermənistanı çox sıxdıqca, o da artıq avqustun 1-i rus hərbiçilərini "Zvartnos"dan çıxaracağını bildirir. Gələcəkdə ayaqlarını dirəyib, rus hərbiçilərin də Ermənistandan çıxarılmasını tələb edə bilər. Bu da Rusiyanın Cənubi Qafqazdan çəkilməsi hesab edilə bilər. Ona görə də, həm qorxutmaq istəyir, həm də yumşaq davranmaq. Görünür, hər iki vəziyyətdə onu əlində saxlamağa çalışır".
Məhəmmədəli QƏRİBLİ
