Əli Mustafa: "Paşinyanın hakimiyyətdən getməsinə, ümumiyyətlə onun hakimiyətinin devrilməsinə istiqamətlənən addımlardır"
Ermənistanın Baş naziri Nikol Paşinyanın Tavuş bölgəsində icma rəhbərləri ilə 5 saat davam edən qapalı görüşünün detalları yayılıb.
"Hraparak" nəşri görüşdə iştirak edənlərə istinadən yeni ərazilərin də Azərbaycana təhvil verilə biləcəyini yazıb:
"Paşinyan kəndləri qaytarmayacaqları təqdirdə müharibənin olacağını bildirib. Görüşdə kənd rəhbərləri Paşinyandan soruşublar ki, 4 kəndin verilməsindən sonra müharibə təhlükəsi aradan qalxacaqmı? Baş nazir isə belə zəmanətin olmadığını deyib. Qeyd edib ki, hadisələr bütün ssenarilər üzrə inkişaf edə bilər, Ermənistan maksimum müharibədən qaçmalıdır. İcma rəhbərləri təklif edib ki, delimitasiya proporsional qaydada aparılsın, Azərbaycan da Ermənistan ərazilərini qaytarsın. Paşinyan cavab verib ki, hazırda bu məqbul variant deyil, Azərbaycan bunu qəbul etməyəcək". Noyemberyan merinin müavini isə nəşrə bildirib ki, görüşdən sonra bizim üçün təhlükənin olduğunu anladıq, biz bunu birtərəfli güzəşt hesab edirik, ona görə prosesdə iştirak etməyəcəyik.
Azərbaycan Ermənistandan yalnız anklav kəndləri tələb edir. Bunların da adları bəllidir. Onda niyə belə çaşdırıcı məlunat yayırlar? Məqsəd, Paşinyanı bu prosesdən çəkindirmək, daxili audutoriyanı ona qarşı səfərbər edib, işləri sabotaj etmək ola bilərmi?
Müstəqil siyasətçi Əli Mustafa "Bakı -Xəbər"ə açıqlamasında bildirdi ki, bu gün Ermənistanda baş verən hadisələr olduqca mürəkkəbdir: "Hətta Paşinyan komandasının özündə belə fərqli yanaşmalar var. Ola bilsin ki, bütün bunlar hamısı beşinci kolonun fəaliyyəti ilə əlaqəlidir. Rusiya Ermənistanda olan bütün narazı qüvvələri bir araya gətirib, Paşinyanı hakimiyyətdən uzaqlaşdırmağa çalışır. Ona görə də, onlar hər bir fürsətdən istifadə edirlər. Paşinyanın hər bir hərəkəti, xüsusilə Azərbaycanla anlaşmağa çalışması, kəndləri qaytarmaq istəməsi və digər qanuni, haqlı tələblərimizi təmin etmə səyləri bir növ xəyanət kimi qiymətləndirilir. Onlar ictimai rəyi zəhərləyirlər. Burda kilsə, diaspora, beşinci kolon iştirak edir. Bütün bunlar hamısı onu göstərir ki, Rusiyanın orada olan uzantılarının hamısı səfərbərliyə cəlb olunub, koordinasiyalı fəaliyyət həyata keçirir. Odur ki, bütün bunları eyni zamanda təxribat elementləri də hesab etmək olar. Yəni hər xırda şeydən bəhanə kimi istifadə edirlər. Xüsusilə proporsional yanaşma - ermənilərin bizə kəndləri qaytarması, əsgərlərimizin sərhəddən çəkilməsi Azərbaycanın qəbul etməyəcəyi bir şeydir. Haqlı olaraq, Azərbaycan geri çəkilə bilməz. Çünki o ərazilərin hələ kimin olması müəyyənləşməlidir. Mən də hesab edirəm ki, bu gün Ermənistanda baş verən proseslərin əhəmiyyətli bir hissəsi qərəzli olaraq Paşinyanın hakimiyyətdən getməsinə, ümumiyyətlə onun hakimiyətinin devrilməsinə istiqamətlənən addımlardır. Hər halda bu, Azərbaycan üçün də müəyyən risqlər yaradır. Amma bütün hallarda, Paşinyan həm Azərbaycanla uzlaşmalı, həm də daxili risqlərini, problemlərini aydınlaşdırmalıdır".
Məhəmmədəli QƏRİBLİ
