Bəhruz Quliyev: "Bu beynəlxalq təşkilat haqlı olaraq Fransının insan hüquq və azadlıqları siyasətini tənqid edir, onu sistemli irqçi adlandırır"
Özünü həmişə süddən çıxmış ağ qaşıq sayan Fransanın paxırı bir-bir açılır. Təbii, Azərbaycan Fransanın bütün şər əməllərini gündəmə gətirib ifşa edir. Son vaxtlara qədər Fransanın dövlət siyasətinə çevrilən irqi ayrıseçkilik, insan haqlarının pozulması, ksenofobiya kimi əməllərini dünya görməzdən gəlsə də, artıq görməyə başlayıb.
Belə ki, Beynəlxalq Amnistiya Təşkilatı - Amnesty İnternational Fransanı nümayiş hüququnu məhdudlaşdırmaqda ittiham edir.
Təşkilat illik hesabatında Fransada pensiya islahatlarına etiraz nümayişləri zamanı həbslər, qadağalar və güc tətbiqi kimi qeyri-qanuni hallara diqqət çəkərək, Fransa hakimiyyətini bir çox hallarda nümayiş hüququna həddindən artıq qeyri-mütənasib və qeyri-qanuni məhdudiyyətlər qoymaqda günahlandırıb. Bütün ilboyu çox sayda nümayişçinin həbs edildiyini xatırladaraq, təhlükəsizlik avadanlıqlarının, bannerlərin, dinamiklərin və digər əşyaların aqressiv şəkildə müsadirə olunduğunu qeyd edib.
Beynəlxalq təşkilat etiraz aksiyaları zamanı yerli hakimiyyət orqanlarının "ictimai asayişi pozmaq təhlükəsi" adı altında nümayişlərə qoyulan qadağaları, eləcə də nümayişləri dağıtmaq üçün güc tətbiqini, xüsusilə də dəyənəklərdən istifadəni sərt şəkildə qınayıb. Həmçinin irqçi, ksenofob xarakterli vandalizm aktları - məscidlərə, sinaqoqlara və qəbiristanlıqlara hücumlar pislənib.
Hesabatda müsəlman qadın və qızlara qarşı sistemli irqçilik və davamlı dini ayrı-seçkilikdən təəssüf ifadə olunub. Qeyd edilir ki, bir həftədə onlarla müsəlman qızın təhsil hüquqları pozulub və onlar məktəbə buraxılmayıb.
Eyni zamanda, Amnesty İnternational vurğulayır ki, qaradərili və ya ərəb gənclərə qarşı ayrıseçkilik xarakterli şəxsiyyət yoxlamaları institusional və sistemli irqçiliyin təzahürü olaraq yolverilməzdir. Hökumətin yanvar ayında təqdim etdiyi "irqçilik, antisemitizm və mənşəli ayrı-seçkiliklə mübarizə üzrə Milli Plan" isə bu çağırışlara cavab vermir.
Bu təşkilat Fransanı sistemli irqçi adlandırıb.
"Fransada irqi və dini ayrıseçkilik adi hala çevrilib"
"Son dövrlər müxtəlif beynəlxalq təşkilatlar öz hesabatlarında haqlı olaraq Fransanı tənqid edirlər. Təkcə 2023-cü və 2024-cü illərin ilk aylarını götürdükdə Fransada kütləvi şəkildə hakimiyətə qarşı yüzlərlə aksiya keçirilib. Aksiyaların səbəbləri pensiyaların, nəqliyyat, enerji, səhiyyə, təhsil və s. sahələrdə çalışanların əməkhaqlarının azlığıdır". Bu fikirləri "Bakı-Xəbər"ə şərhində SƏS Media Qrupunun rəhbəri, fəlsəfə üzrə fəlsəfə doktoru Bəhruz Quliyev deyib.
Bəhruz Quliyev sözlərinə belə davam edib: "2023-cü ildə Fransanın bir sıra şəhər və əyalətlərində kütləvi aksiyalar keçirilib. Fransa hakimiyyəti isə onları dinləmək əvəzinə aksiyalara qarşı ən sərt tədbirlər həyata keçirir. Aksiyada iştirak edən dinc vətəndaşlara qarşı ən sərt, amansız cəza üsulları tətbiq edir. O cümlədən, dəyənəklər, itlər, gözyaşardıcı qazlar və su təzyiqlərindən istifadə olunur. Bütün bunlar onu göstərir ki, orada insan hüquq və azadlıqlarının pozulması adi hala çevrilib.
Təkcə 2024 -cü ildə müxtəlif əyalətlərdə 200 aksiya keçirilib. Bu onu göstərir ki, hakimiyyət idarəolunmaz vəziyyətdədir. Amma buna baxmayaraq, Fransa hökuməti xaricdə öz istəyini həyata keçirmək üçün müxtəlif yollarla terroru, işğalçılığı və separatçılığı dəstəkləyir. Bu o deməkdir ki, Fransanın xaricdə və daxildə apardığı siyasət sıfırdır, məhvə məhkumdur. Yəni bu beynəlxalq təşkilat haqlı olaraq Fransının insan hüquq və azadlıqları siyasətini tənqid edir, onu sistemli irqçi adlandırır.
Fransada irqi və dini ayrıseçkilik adi hala çevrilib. Hətta bununla bağlı misal olaraq qeyd edim ki, dəfələrlə məscid, məbəd, qəbiristanlıq və sinoqoqlara hücumlar olub. Hakimiyyətin özünün hazırladığı qruplar tərəfindən bu cür hadisələr törədilir.
Bunların hamısını vurğulamaqla demək istəyirəm ki, beynəlxalq təşkilatlar hər zaman bu cür elementləri araşdıraraq Fransanı tənqid ediblər. Amma Fransa tənqiddən heç bir nəticə çıxarmır. Əksinə, daha da azğınlaşır və dünyada yeni münaqişə ocaqları yaratmağa çalışır, baş verən müharibələri dəstəkləyir, müharibəni qızışdırmaq üçün kütləvi yardımlar edir. Elə Ermənistana da maddi və mənəvi dəstək verməklə yeni bir münaqişə ocağı yaratmaq istəyir. Bu onun simasıdır. Fransa bu üsulla dünyada reytinqini get-gedə azaldır. O özünü "demokratiyanın beşiyi" adlandırsa da, diktator dövlət kimi tarixə öz imzasını atıb".
İradə SARIYEVA
