Arzuxan Əlizadə: "Bu onu göstərir ki, Azərbaycanın etibarlı partnyor olmasına xüsusi dəyər verilir"
Rusiya xarici işlər naziri Sergey Lavrovun sədrliyi ilə nazirliyin "Cənubi Qafqazda Rusiyanın maraqlarının təşviqi" mövzusunda kollegiya iclası keçirilib.
Kollegiya iclasında "Rusiyanı strateji məğlubiyyətə uğratmaq" naminə Ukraynanın ardınca kollektiv Qərbin postsovet məkanının digər hissələrində, o cümlədən Cənubi Qafqazda vəziyyəti destabilləşdirməyə, Rusiyanı region ölkələri ilə birləşdirən müttəfiqlik və tərəfdaşlıq münasibətlərinə xələl gətirməyə, mövcud kollektiv təhlükəsizlik və iqtisadi tərəfdaşlıq mexanizmlərini məhv etməyə çalışdığı vurğulanıb.
Qeyd olunub ki, sırf "sıfır məbləğli oyunlar" məntiqi ilə idarə olunan qərblilərdən fərqli olaraq, Rusiya üçün Cənubi Qafqazda sabitliyin, təhlükəsizliyin və rifahın təmin edilməsi həmişə prioritet olub və belə də qalır.
Azərbaycan, Ermənistan və Rusiya arasında üçtərəfli sazişlər kompleksinin tam yerinə yetirilməsi, o cümlədən Bakı ilə İrəvan arasında sülh müqaviləsinin razılaşdırılması, Ermənistan-Azərbaycan sərhədinin delimitasiyası və regionda nəqliyyat kommunikasiyalarının açılması üçün səylərin davam etdirilməsi zəruri hesab edilib.
Görünən odur ki, Rusiya XİN-i Cənubi Qafqazda vəziyyətlə bağlı xüsusi müzakirəyə başlayıb. Həmçinin yeni siyasətə başlayıb. Həm də bunun Prezident Əliyevin Moskva səfərindən sonraya təsadüf etməsi də diqqət çəkicidir. Çünki artıq Cənubi Qafqazda Rusiyanın ən etibarlı partnyoru qismində artıq Azərbaycan təsdiqlənir.
"Sülhməramlıların vaxtından əvvəl Qarabağı tərk etməsi Rusiyaya etimadın yaranmasına səbəb olub"
Sözügedən məsələni "Bakı-Xəbər"ə şərh edən AMİP sədri Arzuxan Əlizadənin fikrincə, bütün bunları şərtləndirən bir sıra faktorlar var: "Başlıca faktor ondan ibarətdir ki, Azərbaycan heç vaxt regionda poliqon rolunu oynamayıb. İmkan verməyib ki, ölkə ərazisindən hansısa dövlətlərə qarşı istifadə edilsin. Region dövlətlərinin maraqları nəzərə alınıb. Çünki Azərbaycan unikal coğrafi mövqedə yerləşir. Azərbaycan həm Qərblə, həm də Rusiya ilə etibarlı tərəfdaşlıq münasibətləri qurub. Enerji layihələri ilə bağlı Qərblə bağlanan kontraktları vaxtında yerinə yetirir, həmin sazişlərə yenidən baxılmır və s. Rusiya ilə bağlı münasibətlərə gəldikdə isə, şimal qonşumuzun maraqları nəzərə alınır. Baxmayaraq ki, Azərbaycan nə KTMT-də, nə də Avrasiya Birliyində təmsil olunur. Ancaq Ermənistan, Rusiya ilə eyni birliklərdə təmsil olunmağına rəğmən, Moskvanın maraqlarına qarşı gedir və hər fürsətdə Kremli oyundankənar vəziyyətdə saxlamağa çalışır. Digər tərəfdən, Rusiya sülhməramlılarının vaxtından əvvəl Qarabağı tərk etməsi çox önəmli hadisə idi. Bu, müsbət mənada Rusiyaya etimadın yaranmasına səbəb olub. Çünki sülhməramlıların regionu tərk etməyəcəyi ilə bağlı bir narahatlıq var idi. Prezident Əliyevin Moskva səfərindən sonra Rusiya XİN-in məlum mövzuda müzakirələrə başlaması təsadüfi deyil. Bu onu göstərir ki, Azərbaycanın etibarlı partnyor olmasına xüsusi dəyər verilir. Başqa bir tərəfdən, "Şimal-Cənub" nəqliyyat dəhlizinin reallaşdırılması istiqaməsində görülən işlər ölkəmizin dəyərini artırır. Həmçinin Rusiyada belə bir rəy formalaşır ki, Ermənistanda Qərbə doğru gedən proseslər geridönməzdir. O üzdən, Azərbaycanla tərəfdaşlıq münasibətlərini daha da inkişaf etdirmək istəyirlər".
Vidadi ORDAHALLI
