Elxan Şıxəliyev: "Ermənistan bu xəbərdarlıqdan anlamalıdır ki, olduqca təhlükləi proseslərə qədəm qoyub"
Kollektiv Təhlükəsizlik Müqaviləsi Təşkilatının (KTMT) baş katibi İmanqali Tasmaqambetov katibliyin analitiklərinin məlumatlarına əsaslanaraq müsahibəsində deyib ki, Ermənistan KTMT-dən çıxacağı təqdirdə Cənubi Qafqazda güc balansı dəyişə bilər, lakin bu halda regional təhlükəsizliyin təsirini indi proqnozlaşdırmaq və hesablaması kifayət qədər çətin olan faktorlar işə düşəcək:
"Ermənistanla KTMT arasında qarşıdurma ehtimalını müzakirə edərkən, tərəflərin resurs bazası və real imkanlarını nəzərə almaq lazımdır, ona görə də bu məsələ təsnif edilə bilməz, təhlil tələb edir".
Tasmaqambetov qeyd edib ki, sürətlə dəyişən dünyada suverenlik əlavə dəyər qazanır və səmərəli müttəfiqliyin əsas meyarlarından birinə çevrilir. Bu baxımdan, onun fikrincə, KTMT bu amilin tam nəzərə alındığı bir assosiasiyadır.
O xatırladıb ki, Ermənistan KTMT-nin işində iştirakını məhdudlaşdırıb, bununla belə, əsas qarşılıqlı fəaliyyət mexanizmləri işləyir və təşkilatın gündəliyi üzərində iş davam edir. Tasmaqambetov əlavə edib ki, təşkilatın Ermənistan qarşısında bütün öhdəlikləri onun nizamnaməsindəki məqsəd və prinsiplərinə tam uyğun olaraq qalır.
Maraqlıdır, Baş katib "regional təhlükəsizliyin təsirini indi proqnozlaşdırmaq və hesablaması kifayət qədər çətin olan faktorlar işə düşəcək", - deməklə Ermənistana hansı məzmunda xəbərdarlıq etmək istədi?
Hərbi-siyasi ekspert, ehtiyatda olan polkovnik-leytenant Elxan Şıxəliyev "Bakı-Xəbər"ə açıqlamasında bildirdi ki, ABŞ və Qərb koalisiyası Ermənistan üzərindən Rusiyaya qarşı açıq mübarizə aparır: "5 aprel görüşündən sonrakı mərhələdə ABŞ və Qərb Ermənistanı Rusiyadan tam qoparmağa çalışır. Bunu da Ermənistanın təhlükəsizliyinin təmin olunması zərurəti ilə izah edirlər. Bu öhdəliyin əsasında Ermənistan Rusiyanın 102-ci hərbi bazasını və sərhədçilərini ölkədən çıxarmalıdır. KTMT-dən uzaqlaşmaqla bağlı isə konkret addım atıb. Oradakı fəaliyyətini dondurub. KTMT-dən verilən siqnallar Ermənistana ünvanlanan son xəbərdarlıqlar ola bilər. Demək istəyirlər ki, bu, açıq qarşıdurmaya gətirib çıxaracaq. Hətta Ukraynada yaşananların təkrarlana biləcəyinə işarə edirlər. Hələ ki, informasiya müharibəsi var gücü ilə gedir. Hava limanından sərhədçiləri çıxarandan sonra Rusiyanın davranışlarını test edəcəklər. Əslində bu proses NATO-nun Şərqə doğru genişlənməsidir. Bu da Rusiya üçün "qırmızı xətdir" və müharibəyə səbəb olur. 2008-ci ildə bu, Gürcüstanda oldu, Ukraynada buna görə müharibə edir. İndi də hədəf kimi Ermənistanı seçiblər. NATO istəyir Rusiya yeni bir problemə düşsün ki, Ukraynadakı gücü zəifləsin. Rusiyanın da əks planları var. Məsələn, daxildən Paşinyanı devirmək planını işə sala bilər. Onun fiziki məhvi də nəzərdən keçirilmiş olar. Müharibə də baş tuta bilər, çünki artıq bu toxumlar tam cücərib. Region ölkələri bundan çox ehtiyatlanırlar. Ermənistan bu xəbərdarlıqdan anlamalıdır ki, olduqca təhlükləi proseslərə qədəm qoyub".
Məhəmmədəli QƏRİBLİ
