Məhərrəm Zülfüqarlı: "Bu gün ukraynalı deputatlar buna açıq etiraz edir, sabah başqa bir ölkədən etirazların olması gözləniləndir"
Artıq tarixin zibilliyinə yuvarlanıb yoxa çıxan saxta rejimin "dövlət naziri" olmuş erməni əsilli Rusiya milyarderi Ruben Vardanyanın ətrafında oyun quran, onu Bakı türməsindən çıxarmaq istəyən qüvvələr nə qədər fəallaşsa da, istəklərinə nail ola bilmirlər.
Vardanyan barədə min-bir mif uyduran bu dəstə hətta onun Nobel Sülh Mükafatı almasına da çalışırlar. Harda görülüb separatçı, bölücü, şovinist, cinayətkar birisinə belə bir ödül verilsin?
Vardanyanın bu mükafata namizəd kimi göstərilməsinə artıq dünyadan narazılıqlar gəlməyə başlayıb. Sülhlə, barışla heç bir əlaqəsi olamayan bir separatçının "Nobel" alması bu mükafatın mahiyyətinə kölgə salar.
Bu arada yayılan xəbərlərə görə, Ukrayna Ali Radasının deputatları erməniəsilli milyarder, keçmiş qondarma rejimin "dövlət naziri" olmuş separatçı Ruben Vardanyanın adını Nobel Sülh Mükafatına namizədlər siyahısından çıxarmağa çağırıb.
Ukrayna siyasətçiləri sosial şəbəkələrdə paylaşımlarında adı korrupsiya qalmaqallarında hallanan Vardanyanın Nobel Mükafatı laureatları siyahısına daxil edilməsinin yolverilməz olduğunu bildiriblər.
Ali Radanın deputatı Yuri Kamelçuk Nobel Komitəsinə məktub yazaraq, Ruben Vardanyanın potensial Nobel Sülh Mükafatı laureatı kimi namizədliyini rədd etməyə çağırıb.
Qeyd edək ki, bu yaxınlarda keçmiş qondarma rejimin "dövlət naziri" olmuş, hazırda Azərbaycan Respublikası Dövlət Təhlükəsizliyi Xidmətinin İstintaq təcridxanasında həbsdə olan separatçı Ruben Vardanyanın çirkli pulları hesabına ona bağlı bir qrup tərəfindən Nobel namizədliyinin irəli sürülməsi istiqamətində iş aparıldığı haqda məlumat yayılıb.
Ruben Vardanyan 2023-cü ilin sentyabrında Azərbaycanın hüquq-mühafizə orqanları tərəfindən Qarabağdan qaçmaq istəyərkən saxlanılıb. O, Azərbaycan Respublikası Cinayət Məcəlləsinin terrorçuluğu maliyyələşdirmə, qanunvericiliklə nəzərdə tutulmayan silahlı birləşmələrin və ya qrupların yaradılmasında və fəaliyyətində iştirak, Azərbaycan Respublikasının dövlət sərhədini qanunsuz olaraq keçmə maddələri ilə ittiham olunur. Hazırda barəsində istintaq-əməliyyat tədbirləri davam etdirilir.
"Nobel komissiyası bu ciddi mesajlara əhəmiyyət verib o cinayətkarın adını siyahıdan çıxarmalıdır"
AVCİYA-nın vitse-prezidenti, professor Məhərrəm Zülfüqarlı "Bakı-Xəbər"ə şərhində bildirdi ki, bu məsələ ilə bağlı etirazların başlanması tamamilə yerindədir və bir separatçının, terroru maliyyələşdirən cinayətkarın bu mükafatı alması dünyanın özünə utanc gətirər. "Bugünkü Ukrayna bir qədər başqa respublikalardan fərqlidir. Hakimiyyətdə təmsil olunanların milli tərkibinə baxsaq, dünənə qədər bu ölkənin daxili ilər naziri milliyyətcə erməni idi, prezidenti yəhudidir, digər yüksək vəzifələrdə krım tatarı və sair təmsil olunur. Orada vəzifəyə təyin edilən insanların milliyəti elə bir rol oynamadığına görə, insanlar buna çox diqqət etmirlər. Amma bizim kimi respublikalar, uzun müddət ermənilərlə müharibədə, münaqişədə olan bir ölkə həmişə belə şeylərə diqqət edir...
Ruben Vardanyanın kim olduğunu, hansı əməllər törətdiyinu Ukraynada da yaxşı bilirlər. Ola bilsin, onun orada biznes ortaqları olub, pul atdığı adamlar var. Onun terroru, terrorçuları maliyyələşdirdiyi də gizlin deyil. Bu baxımdan ukrynalı deputatların Vardanyanın adının Nobel mükafatına namizdlər siyahısından çıxarılnası üçün müraciətləri onların obyektiv düşüncələrindən xəbər verir. Ukraynadan olan deputatlar onunla bağlı məsələyə tənqidi yanaşırlar.
Bilirsiz ki, demokratiya mürəkkəb məsələdir. Demokratiyadan bu cür sui-istifadə halları da var. İndi kimlərsə çalışır ki, Rubeni "qəhrəman, sülh aşiqi" kimi qələmə versin. Bunlar hamısı absurddur. Onun adını o siyahıya salanların məkrli məqsədləri var, onun puluna görə belə edirlər. Amma Vardanyanın cinayətləri barədə faktlar ortadadır. Bu gün ukraynalı deputatlar buna açıq etiraz edir, sabah başqa bir ölkədən etirazların olması gözləniləndir. Hesab edirəm ki, ukraynanın obyektiv deputatlarının çağırışı nəticəsiz qalmayacaq. Nobel komissiyası bu ciddi mesajlara əhəmiyyət verib o cinayətkarın adını siyahıdan çıxarmalıdır.
Vardanyan qatı cinayətkardır və cəzasını lazımı şəkildə çəkir, çəkəcək də, onu bu cür oyunlarla xilas etmək mümkünsüzdür"-deyə M.Zülfüqarlı qeyd etdi.
İradə SARIYEVA
