Hikmət Babaoğlu: "Cənubi Qafqaz regionunda sabitliyin və təhlükəsizliyin təmin olunması hər bir milli dövlətin bir nömrəli vəzifəsidir"
2020-ci ilin mart ayında bütün dünyanın dəhşətli kabusuna çevrilən koronavirus pandemiyası səbəbilə Azərbaycan da öz quru sərhədlərini bağladı. Ölkədə sərt karantin rejimi tətbiq edildi.
İnsanlara evlərindən çıxmağa belə qadağa qoyulduğu bir zamanda, təbii ki, quru sərhədlərinin bağlı olması heç kimi narahat etmirdi. Amma zamanla pandemiya, virusun kütləviliyi azaldı, dünya sözün əsl mənasında pandemiyaya alışdı. Demək olar ki, bütün dövlətlər öz quru sərhədlərini açdılar, Azərbaycandan başqa. Azərbaycanda quru sərhədlərindən bu gün də ancaq xüsusi icazə ilə keçmək mümkündür. Quru sərhədlərin açılmaması zamanla müzakirələrə səbəb olub. Bu müzakirələrə bu günlərdə Prezident İlham Əliyev son qoydu. Azərbaycan Prezidenti ADA Universitetində keçirilən "COP29 və Azərbaycan üçün Yaşıl Baxış" adlı beynəlxalq forumda Polşanın Şərq Tədqiqatları Mərkəzinin baş elmi işçisi Voijeç Goreçkinin sualını cavablandırarkən deyib ki, biz təhlükəsizlik, regional inkişaf risqləri və sair haqqında danışırdıq: "Ətrafımızda qeyri-sabitliyin müxtəlif sahələrini görürük. Quru sərhədinin bağlı saxlanması qərarı COVID səbəbi ilə verilib. Biz hələ də formal olaraq karantin mərhələsindəyik, amma eyni zamanda, açıq deməliyik ki, sərhədlərin bağlı qalması qərarı təkcə buna əsaslanmır. Biz indi görürük ki, artıq bir müddət keçdikdən sonra sərhədlərin bağlı olması Azərbaycanda təhlükəsizliyi gücləndirib. Əvvəlki dövrlərdə belə hallar çox olub, bəziləri açıqlanıb, digərlərini ictimaiyyətləşdirməmişik. Kənardan ciddi təhlükə və problemlərlə üzləşirdik. Bütün potensial risqlərimizin kənardan ola biləcəyini deyəndə, məhz bunu nəzərdə tuturdum".
Prezidentin bu çıxışından aydın olur ki, ölkənin təhlükəsizliyi üçün quru sərhədlərin hələ bağlı qalması uyğundur.
"Azərbaycan quru sərhədi vasitəsilə ideoloji və terror təxribatı ilə üz-üzə gələ bilər, bu səbəbdən də…"
Millət vəkili Hikmət Babaoğlu "Bakı-Xəbər"ə şərhində bildirdi ki, Cənubi Qafqaz regionunda sabitliyin və təhlükəsizliyin təmin olunması hər bir milli dövlətin bir nömrəli vəzifəsidir: "Nəzərə almaq lazımdır ki, Ermənistan və Azərbaycan arasında sülh hələ də əldə olunmayıb. Sonuncu pozitiv dönüşə baxmayaraq, bu prosesin necə nəticələnəcəyi hələ bəlli deyil. Azərbaycan dövlətini, onun təhlükəsizliyini təhdid edən hər cür təhlükələrə qarşı özünü qorumalıdır. Azərbaycan reallıqlarını qəbul etməyən ölkələr var".
Millət vəkili onu da əlavə etdi ki, Azərbaycan quru sərhədi vasitəsilə ideoloji və terror təxribatı ilə üz-üzə qala bilər: "Xatırladım ki, Azərbaycanda olan üçüncü ölkələrin səfirliklərinə hücumun qarşısı alınıb. Bu səbəbdən də Azərbaycan Prezidenti ictimaiyyətin diqqətini ölkənin təhlükəsizliyinə çəkmək istəyir. Təhlükəsizlik məsələsi tam həll olunmayana qədər müəyyən məhdudiyyətlər qala bilər".
Günel CƏLİLOVA
