Bədrəddin Quliyev: "Bu prosesə başqa nə reaksiya vermək olar?"
Qazaxın 4 kəndinin hərbi müdaxilə olmadan Azərbaycana qaytarılmasına operativ beynəlxalq reaksiyalar verilib. Dünyanın bir çox aparıcı ölkəsi bu prosesi alqışlayıb.
Bu məsələyə verilən belə müsbət reaksiyaların səbəbi nə ilə bağlıdır?
Müstəqil siyasətçi Bədrəddin Quliyev "Bakı-Xəbər"ə açıqlamasında bildirdi ki, kəndərimizin azad edilməsinə verilən reaksiyaların obyektiv səbəbləri var: "Avropa İttifaqı müşahidəçilərlə orada təmsil olunur. Belə rəy yaratmışdılar ki, güya Azərbaycan Ermənistanın suveren ərazisinə hücum etməyə çalışır. Ancaq heç kim bizim kəndlərimizin hələ də Ermənistanın işğalında olduğundan söz açmırdı. Ortaya çıxdı ki, heç bir müşahidəçi, vasitəçi olmadan iki ölkə konkret nəticələr əldə etməyə qadirdir. Bu prosesə başqa nə reaksiya vermək olar? Ermənistan reallığı dərk edib doğru addım atırsa, ona başqa nə ad verə bilərlər? Deyəcəkdilər ki, niyə öz kəndlərini özlərinə qaytarırsan? Azərbaycanın başına açılan bütün oyunlar böyük ölkələrin dəstəyi ilə olub. Ermənistan adlı dövlət də bizim ərazilərimizdə yaranıb. Bilirdilər ki, kəndlərin qaytarılmasını öhdəlik kimi Paşinyan öz üzərinə götürüb. Əks təqdirdə Azərbaycan hərbi yolla həmin kəndləri geri qaytarmaq hüququna malikdir. Beynəlxalq aləm bilir ki, bura vacib regiondur. Rusların da Qarabağı tərk etməsi rəqabəti qızışdırıb. Hesab edirlər ki, burada mövqe tutmaq üçün bir qədər obyektiv olmaq gərəkdir. Sülhə aparan yol sərhədlərin tanınmasından keçir. Kəndləri işğalda saxlamaqla irəliləyişə nail oluna bilinməz. Gələcək gərginlik Rusiya ilə Ermənistan arasında olacaq. Biz öz işlərimizin böyük hissəsini görmüşük. Belə də davam etməliyik. Erməni tərəfi Azərbaycanın əvvəlki qələbələrini göz önünə alaraq, qeyd-şərtsiz Azərbaycana məxsus olan kəndləri əldə saxlaya bilməzdi. Əgər müharibə olsa idi, Ermənistan həm hərbi, həm də siyasi cəhətdən uduzmaqla yanaşı, beynəlxalq aləmdə daha pis duruma düşəcəkdi. Təbii ki, kəndlərin qaytarılması zəminində Ermənistanla Azərbaycan arasında qurulacaq münasibətlər də gündəmdədir. Paşinyan hökumətinə müxalif qüvvələr, habelə xarici təsirlər öz maraqlarına alət edib dalana aparırdı. Bir müddət vaxtı uzatmaqla özlərinə nəfəslik axtardılar, ancaq gördülər ki, zaman ziyanlarına işləyir. Bir az da keçsə, Azərbaycan onlara verdiyi möhləti və sülh təklifini kənara qoya bilər. Xarici təhrikçilər isə Ermənistanı xilas edə bilməz. Artıq delimitasiya və demarkasiya prosesləri tamamlanıb və növbəti proseslərə keçmək zamanıdır. Ermənistan cığallıq və revanşist niyyətlərlə inkişafdan, sülhdən kənar qalmaqla təcrid olunacağını anlamağa başladı və şansın itirilicəyindən narahat olaraq buna rəvac verdi. Eyni zamanda, başqa alternativ yolu qalmadığını gördü, kəndləri sakitcə verib bu addımdan maksimum yararlanmaq məqsədi güddü".
Qeyd edək ki, prosesə sevinənlər arasında Ermənistana havadarlıq edənlər də az deyil. Onlar bilir ki, bu addımla Ermənistan özünü növbəti təhlükədən xilas etdi. Yaxşı olardı ki, Zəngəzur dəhlizi ilə bağlı da Ermənistan konkret və obyektiv mövqe tutsun və yolun açılmasına şərait yaratsın.
Məhəmmədəli QƏRİBLİ
