Bəhruz Quliyev: "Hesab edirəm ki, baza prinsipləri əsas götürülməklə ilkin razılaşma ola bilər"
COP29-dan əvvəl Azərbaycanla Ermənistan arasında sazişə nail olmaq, ən azı baza prinsipləri üzrə razılığa gəlmək tam real görünür. Bu barədə Prezident İlham Əliyev ADA Universitetində keçirilən "COP29 və Azərbaycan üçün Yaşıl Baxış" mövzusunda beynəlxalq forumda çıxışı zamanı bildirib.
Dövlət başçısı əlavə edib ki, baza prinsipləri üzərində razılığa gəlmək də variant hesab olunur, sonra isə müddəaların təfərrüatlarına vaxt sərf etmək olar. "Hətta sazişin layihəsi hazır ola bilər. Düşünürəm ki, bunun üçün hər iki tərəf sadəcə" ürəkdən çalışmalıdır", - deyə Prezident diqqətə çatdırıb.
"Amma bir şərtlə ki, Ermənistan səmimi olmalıdır və sülhə gedən yolda əngəl törətməməlidir"
Sözügedən məsələni "Bakı-Xəbər"ə şərh edən "SƏS" Media Qrupunun rəhbəri, politoloq Bəhruz Quliyev hesab edir ki, Emənistan bu fürsətdən düzgün istifadə etməlidir: "Cənab Prezident "COP29 və Azərbaycan üçün Yaşıl Baxış" mövzusunda keçirilən beynəlxalq forumda çıxışında çox maraqlı nüanslara toxundu. Onlardan biri də Ermənistanla Azərbaycan arasında olan müharibə fazasından sonra sülh danışıqları prosesi haqqında oldu. Prezident qeyd etdi ki, hələ indiyə qədər sülhə bu qədər yaxın olmamışıq. Sözün əsl mənasında illərlə sülh danışıqları prosesinə bizim tərəfdən cəhd göstərilsə də, təəssüflər olsun ki, müxtəlif beynəlxalq güclərin təzyiqi ilə Ermənistan heç vaxt danışıqlar prosesində səmimi olmayıb. Bölgədə sülhün tərəfdarı olmayıb. İşğalçı dövlət kimi özünü aparıb və işğalçı siyasətini də davam etdirib. Məhz ona görə də bölgədə sülh və əminamanlığa nail ola bilməmişik. Amma artıq zaman yetişib. Bu gün beynəlxalq güclər regionda sülhə mane ola biləcək sərt davranışları nümayiş etdirə bilmirlər. Ona görə ki, artıq vəziyyət, dünyada baxış dəyişib. Beynəlxalq münasibətlər sistemində fərqli baxışlar mövcuddur. Cənubi Qafqaza baxmayaraq maraq artıb, amma dərk edirlər ki, regionda sülhə nail olmaq üçün üçüncü qüvvəyə ehtiyac yoxdur".
Politoloq B.Quliyevin fikrincə, bəzi qüvvələr özünü üçüncü tərəf kimi görür: "Amma cənab Prezident bütün çıxışlarında son dövrlərdə qeyd edir ki, sülhə nail olmaq üçün hər iki tərəfin ciddi addım atmağına ehtiyac var. Üçüncü tərəfə ehtiyacımız yoxdur. Artıq praktikada bir neçə dəfə Azərbaycan və Ermənistan tərəfləri birbaşa əlaqəyə çıxıb, hər hansı məsələnin müzakirəsini ediblər. Bu faktlar göstərir ki, qarşılıqlı razılığa gəlmək olar. Məlum olduğu kimi, rus sülhməramlıları da bölgədən çıxdılar. Bu o deməkdir ki, iki tərəf qalıb. Biz istəsək də, istəməsək də bu qonşuluğu etməyə məcburuq. Qonşuluq etmək üçün də regionda sülhə nail olmaq lazımdır. Ona görə ki, sülhdən sonra böyük layihələr, dəyişikliklər, müsbət formada planlar, proqramlar var. Onu birgə həyata keçirmək üçün bəzi məqamlarda Ermənistan da hər hansı formada bu layihələrdə iştirak edə bilər. Amma bir şərtlə ki, Ermənistan səmimi olmalıdır və sülhə gedən yolda əngəl törətməməlidir. Hesab edirəm ki, sülhə yaxınıq. Paşinyanın son çıxışlarından da belə nəticəyə gəlmək olar ki, Ermənistan rəhbərliyi artıq proesi dərk edir. Dərk edir ki, Ermənistanın rifahı Cənubi Qafqazda sülhün olmasından keçir. Ermənistan bölgədə sülhün tərəfdarı olsa, bir çox layihələrin iştirakçısı olacaq. Bu yaxınlarda Paşinyan da qeyd etdi ki, Azərbaycanda COP29-un keçirilməsini dəstəkləyirik. COP29-un Azərbaycanda keçirilməsi çoxsaylı qonaqların Qafqaza gəlməsi deməkdir. Bu, Ermənistan üçün də müsbətdir. Ona görə də Ermənistan özünü normal aparsa, burada onun da müxtəlif payı var. Təkcə Azərbaycan üçün yox, Qafqazın da qonağı sayılır bu qonaqlar. Prezident də qeyd etdi ki, COP29-un keçirilməsinə qədər birinci məsələ bizim baza prinsiplərinə əsasən razılığa gəlməyimizdir. Hesab edirəm ki, baza prinsipləri əsas götürülməklə ilkin razılaşma ola bilər".
Vidadi ORDAHALLI
