Kuçma Rusiya ilə Ukraynanı Qabil və Habilə bənzətdi – Qardaş xalq idik, indi isə düşmənik...
SSRİ-nin dağılmasından sonra Ukraynanın ikinci prezidenti olan Leonid Kuçma Yaponiyanın Kyodo agentliyinə deyib ki, Rusiya və Ukrayna qardaş xalq olduqları halda, indi düşməndirlər. O, bu vəziyyətə görə prezident Vladimir Putin şəxsən məsuliyyət daşıdığını deyib.
Kuçma iki ölkə arasındakı əlaqələrindən danışarkən İncildən Qabil və Habilin hekayəsini nümunə kimi çəkib: "İncil dünyanın ilk iki qardaşı Qabil və Habilin hekayəsindən bəhs edir. Qabil Habili öldürdü. Ukraynanın artıq qardaşı yoxdur. Rusiya Qabildir. Qardaş düşmən olmaq xəyanətdən də pisdir", - deyə o əlavə edib.
Kuçma 1994-2005-ci illərdə Ukrayna prezidenti olub. 85 yaşlı Kuçma 2015-2018 və 2019-2020-ci illərdə Donbasdakı münaqişənin həlli üzrə təmas qrupunun sədri olub. Kuçma da atəşkəsin zəruriliyinə şübhə etdiyini bildirib və iddia edib ki, Rusiya rəsmiləri atəşkəsdən Qərb ölkələrini Ukraynaya silah tədarükünü dayandırmağa məcbur etmək və bu arada yeni hücum üçün qüvvə toplamaq üçün istifadə edəcək.
TAHİR
