Elşad Həsənov: "Məqsədyönlü şəkildə Tehran bu məsələdə susqun mövqe tutdu"
Aprelin 5-də Brüsseldə keçirilən məlum görüş öncəsi regionun, demək olar ki, bütün dövlətlərinin rəsmi şəxsləri həmin tədbirə münasibət bildirdilər.
Sözsüz ki, ilk reaksiya rəsmi Bakıdan gəldi. Azərbaycan hesab edir ki, bu cür təşəbbüslər İrəvanı yeni təxribatlara şirnikləndirə bilər. Rusiya və Türkiyə də rəsmi səviyyədə bəyanat yayaraq 5 aprel görüşünü pisləyib.
Bir sözlə, Qərbin Cənubi Qafqazda status-kvonu dəyişmək planının müzakirə olunduğu 5 aprel görüşü region dövlətləri tərəfindən narazılıqla qarşılanıb. Bu fonda "kənar qüvvələrin regiona gətirilməsi "qırmızı xəttimizdir" deyən İran isə susmaqda davam edir. Reallıq odur ki, İran Qərbin regiona gəlişindən daha çox, güclü Azərbaycan faktorundan çəkinir. Bu günlərdə - martın sonundan etibarən İran Hava Yollarına məxsus yük təyyarələrinin Ermənistana silah daşıması haqda yayılan məlumata İranın Azərbaycandakı səfirliyi hələ də aydınlıq gətirməyib. Çünki İran bölgədə güclü Azərbaycan dövlətinin olmasını istəmir. Ona görə də, 5 aprel görüşünə, Qərbin regiona gəlməsinə reaksiya vermir. Həm təyyarələri ilə Ermənistana silah daşıtdırır, həm də Qərbin bölgəyə gəlməyinə reaksiya vermir. Burada ümumi hədəf güclü Azərbaycanı görmək istəməməkdir.
"İran ona görə Brüssel görüşünü görməzdən gəldi ki, hansısa bəyanat siyasi baxımdan ölkəmizin xeyrinə olardı"
Sözügedən məsələni "Bakı-Xəbər"ə şərh edən siyasi ekspert Elşad Həsənovun fikrincə, İran həmişə Azərbaycanın zəifləməsini istəyib: "Ölkəmizin inkişafına dözməyib. Ermənistan Azərbaycan ərazilərini işğal edəndən daim ermənilərin yanında olub. İşğal dövründə ermənilər məscidlərimizi dağıdanda, təhqir edəndə İran bunu pisləməyib. 44 günlük Vətən müharibəsində Azərbaycan öz ərazi bütövlüyünü təmin edəndə İran bundan narahat olmağa başlayıb. Xüsusən də İran hər vasitə ilə Zəngəzur dəhlizinə qarşı çıxıb bunu özünün qırmızı xətti hesab edib. Aşırı siyasi həyasızlıq edir. Bu gün kənar qüvvələr Ermənistana gəlir, ABŞ-Aİ bununla bağlı vahid mövqedən çıxış edir, amma Tehranın səsi çıxmır. Çünki İranın indiki hakimiyyəti Qərbin öz planıdır. Xomeyni Fransanın himayəsi ilə Tehrana gəldi və hakimiyyətə yiyələndi. Ona görə də bu gün Qərbin dediyi ilə hərəkət edirlər. Baxmayaraq ki, İran sözdə Qərbi söyür. Görünən odur ki, onlar məhz Qərbin tapşırıqlarını yerinə yetirirlər. Bu gün Ermənistanda möhkəmlənmək istəyən başlıca ölkə Fransadır. İran ona görə Brüssel görüşünü görməzdən gəldi ki, hansısa bəyanat siyasi baxımdan ölkəmizin xeyrinə olardı. İstər-istəməz Ermənistanı çətin durumda saxlaya bilərdi. O üzdən, məqsədyönlü şəkildə Tehran bu məsələdə susqun mövqe tutdu. Molla rejimi Ermənistanı dirçəltmək üçün ora silah daşınmasına şərait yaradır. İran təyyarələri İrəvana silah daşıyır. Hindistandan alınan silahlar İran vasitəsi ilə Ermənistana ötürülür. O üzdən, bütün bunlar molla rejiminin məkrli siyasətinin nəticəsidir".
Vidadi ORDAHALLI
