Yadigar Məmmədli: "Bunu sübut etməkdən ötrü min cür canfəşanlıq edirlər, amma onların təbliğatı alınmır"
Məlum olduğu kimi, 5 apreldə Brüsseldə keçirilən Ermənistan-Avropa İttifaqı-ABŞ görüşü Azərbaycanın maraqlarına qarşı olan bir tədbir idi. Məqsəd Cənubi Qafqazda status-kvonu dəyişmək və Qərbin regiona daxil olmasını təmin etmək idi.
Bu görüşü təbliğ edən dairələrdən biri də "5-ci kolonu" təmsil edən qüvvələr idi. Xaricdə fəaliyyət göstərən "5-ci kolon" nümayəndələri əllərindəki media resursları ilə hər vasitə ilə 5 aprel görüşünü təbliğ edirdilər və bunun guya Azərbaycanın maraqlarına qarşı olmadığını iddia edirdilər. Bu qüvvələrin də başında əsasən Qənimət Zahid və Sevinc Osmanqızı dayanırdı. Xüsusən bu şəxslər onlara məxsus media platformalarında bunun əsas təbliğatçısı rolunda çıxış edirdilər. Fransada, ABŞ-da məskunlaşan "5-ci kolon" təmsilçiləri Azərbaycanın 5 aprellə bağlı mövqeyini tənqid edirdilər. Azərbaycan deyəndə ki, 5 aprel görüşü Ermənistana dəstək məqsədi daşıyır, onlar ölkəmizi tənqid edirlər. O baxımdan buna nə ad vermək olar?
"5-ci kolon" ona görə canfəşanlıq edir ki, ağaları onlara belə təlimat verib"
Məsələ ilə bağlı "Bakı-Xəbər"ə açıqlama verən media eksperti Yadigar Məmmədlinin fikrincə, 5 aprel görüşünün ciddi müzakirələrə səbəb olacağı gözlənilən idi: "Hələ görüş başlamazdan əvvəl bu ciddi müzakirələrə səbəb oldu. Ona görə ki, bu, Azərbaycanın mənafeyinə qarşı yönəlmiş bir tədbir idi. Çünki regionla bağlı Azərbaycanın iştirakı olmadan Ermənistanla birgə tədbir keçirilirsə, aydın məsələdir ki, bu, xoş niyyətdən xəbər vermir. Təsadüfi deyil ki, görüş başlamazdan əvvəl Türkiyə Xarici İşlər Nazirliyi bəyanatla çıxış etdi. Bu onu göstərirdi ki, məlum tədbir həm Azərbaycanın, həm də rgion dövlətlərin maraqlarına uyğun deyil. Ən azından ona görə ki, elə Brüsselin təşəbbüsü ilə bir neçə dəfə üçtərəfli formatda görüş keçirilib. 5 apral görüşü növbəti sülh danışıqları formatına zərbə vurdu. Brüsselin tərəfsizliyini şübhə altına aldı. Bütün bunlarla yanaşı, Azərbaycana qarşı dövlətlərin əlaltıları olan "5-ci kolonun" təmsilçiləri 5 aprel görüşünün ölkəmizin maraqlarına təhdid olmadığı iddiası ilə çıxış edirlər. Bütün internet resurslarında onu təbliğ edirlər ki, guya bu, Azərbaycana qarşı deyil. Bunu sübut etməkdən ötrü min cür canfəşanlıq edirlər, amma onların təbliğatı alınmır. Ona görə ki, cəmiyyətimiz hər şeyi yaxşı bilir. "5-ci kolon" ona görə canfəşanlıq edir ki, ağaları onlara belə təlimat verib. Məhz Qərbin tezislərindən çıxış edərək belə kampaniya aparırlar. İndiyə qədər onları maliyyələşdirən dairələrin məqsədi o olub ki, "5-ci kolon" Azərbaycanda ictimai rəyə təsir etsin. Cəmiyyəti dövlətə qarşı qaldırsınlar. Ancaq onların bütün bu cəhdləri nəticə verməyəcək. Çünki hamı kimin kim olduğunu çox yaxşı bilir".
Vidadi ORDAHALLI
