Brüssel görüşü ərəfəsində Ermənistan Aİ və ABŞ-da Azərbaycanın silahlanmasına dair "sənədlər" təqdim edib. Bu barədə Politiko saytı yazıb.
Bu da o qənaətə gəlməyə imkan verir ki, görünür, görüş ərəfəsində Brüsseldə hərbi məsələnin müzakirə ediləcəyi barədə deyilənlər yalan deyilmiş. Düzdür, Brüssel görüşünün təşkilatçıları bunu inkar etsə də, 5 aprel görüşündə hərbi komponent var.
Ermənistan Brüssel görüşündən əvvəl Azərbaycan barədə Qərbə nə sənədlər verib?...
Mətin Məmmədli: "Brüssel görüşündən əvvəl də..."
Beynəlxalq Münasibətlərin Təhlili Mərkəzinin eksperti, siyasi elmlər üzrə fəlsəfə doktoru Mətin Məmmədli "Bakı-Xəbər"ə şərhində "Brüssel görüşündən əvvəl də bu görüşdə hərbi və təhlükəsizlik məsələrinin müzakirə olunacağı söylənilirdi. Hətta Ermənistana Qərb tərəfindən təhlükəsizlik zəmanətinin veriləcəyi də deyilirdi. Bunlar baş verməsə də, hər halda, böyük ehtimalla, qapalı görüşdə Ermənistanın təhlükəsizlik məsələsi də, Azərbaycanın hərbi gücü də və sair mövzuda digər məsələlər də müzakirə olunub. Düşünürəm ki, hər halda qarşıdakı perspektivdə Ermənistanın təhlükəsizliyi məsələsi Qərb tərəfindən yenidən gündəmə gətirilə bilər. İndi bu məsələ gündəliyə çıxarılmadı və hər hansı razılaşmanın qəbul olunduğu bildirilmədi. Hesab edirəm ki, gələcəkdə bu məsələ ola bilər"-deyə bildirdi.
M.Məmmədlinin sözlərinə görə, nəzərə almaq lazımdır ki, Ermənistan son aylarda Qərbin aparıcı dövlətlərindən biri olan Fransa tərəfindən silahlandırılır. "Digər Qərb dövlətləri də Ermənistana silah satışında maraqlı olduğunu bəyan edib. Hər halda düşünürəm ki, Ermənistanın silahlandırılması məsələsi Qərbin gündəliyində aktuallaşa bilər"-deyə M.Məmmədli qeyd etdi.
Akif Nağı: "Ehtimal etmək olar ki, Ermənistan Azərbaycanla bağlı saxta, əsassız məlumatlar təqdim edib"
Azad Vətən Partiyasının sədri Akif Nağı da bu barədə fikirlərini "Bakı-Xəbər"lə bölüşdü.
"Avropa strukturlarının, təşkilatlarının, bəzi dövlətlərin təmislçiləri də, o cümlədən, ABŞ-ın, Fransanın nümayəndələri də dolayısı ilə təsdiq edirlər ki, Brüsseldəki 5 aprel görüşündə hərbi məsələlər də gündəmdə olub. Sadəcə onu gizlədirlər. Məlumatın gündəliyə gəlməsindən, ortaya çıxmasından çəkinirlər. Çünki bilirlər ki, Azərbaycan narazı qalacaq. Bilirsiz ki, həmin görüş ərəfəsində ABŞ-ın dövlət katibinin və Aİ-nin rəsmi nümayəndəsinin Prezident İlham Əliyevə zəng vurmaları təsdüfi deyildi. Belə başa düşürəm ki, orada hərbi məsələlərin, eləcə də Ermənistana hərbi yardım göstərilməsi, Ermənistanın müharibəyə hazırlaşdırılması ilə bağlı müzakirlər aparılacağına dair Azərbaycanın əlində faktlar, məlumatlar vardı. Ehtimal ki, Azərbaycan da əlində olan faktları müxtəlif kanallarla onların diqqətinə çatdırıb. Ona görə də dərhal Blinken Azərbaycan Prezidentini arxayınlaşdırmaq üşün ona zəng etdi. Düzdür, arxayınlaşdırmaq sözü də yerinə düşmür. Çünki Azərbaycan Prezidenti əmin olmadığı məsələni onların qarşısında qaldırmaz. Onlar Azərbaycan Prezidentinin bildiyi faktların üzərində Azərbaycanla söhbət apardılar. Belə dəyərləndirirəm ki, onlar Azərbaycanın iradlarını qəbul etdilər və ona görə dalbadal zəng vurdular. Yəqin ki, mövqelərindən xeyli geri çəkildilər də. Amma yenə də qapalı şəkildə hərbi məslələri müzakirə etdilər. O danışıqlardan sonra əgər Ermənistan cəbhə bölgəsində, şərti sərhəd xəttində davamlı şəkildə atəşkəsi pozursa, Azərbaycana qarşı təxribatlar törədirsə, sülh prosesini pozursa, demək onların bəd niyyətləri var, Azərbaycana qarşı hansısa ən azından lokal hərbi əməliyyat həyata keçirmək istəyirlər. Ola bilsin, bundan istifadə edib Rusiyaya qarşı hansısa addımlar atsınlar, Rusiyanın hərbi bazasını oradan çıxarmaq üçün hansısa addım atsınlar. Amma bizi maraqlandıran burada Azərbaycana dəyəcək zərərdir, Azərbaycanın mövqeyinə zərbə vura bilərlər. Deyək ki, Azərbaycanın Şərqi Zəngəzur istiqamətində mövqelərini təhlükə altına ala, təhdid edə, Qarabağ istiqamətində də hər hansı bir təxribat törədə, diversant qruplar göndərə bilərlər. Ermənistanda Azərbaycana qarşı çoxvariantlı təhlükə mənbələri var"-deyə A.Nağı bildirdi.
Partiya sədri vurğuladı ki, biz də bu təxribatlara qarşı işimzi qurmalıyıq. "Brüssel görüşü ərəfəsində Ermənistanın Azərbaycanla bağlı hansı sənədi təqdim etdiyinə gəlincə, bu qapalı bir məsələdir, demək olar ki, heç kəsin bundan məlumatı yoxdur. Ehtimal etmək olar, Ermənistan Azərbaycanla bağlı saxta, əsassız məlumatlar təqdim edib. Qərbə yalan, əsası olmayan məlumat ötürə bilərlər ki, guya Azərbaycan silahlanır. Əslində isə bu boş və mənasız bir iddiadır. Azərbaycan normal şəkildə öz planlarına uyğun olaraq, heç kəslə razılaşmadan özünün müdafiə qüdrətini artırmaq üçün müəyyən dövlətlərlə hərbi sahədə müqaviləsi olub, var da, bu istiqamətdə işləri davam edir. Bunun da nə Ermənistana, nə Qərbə, nə də hansısa beynəlxalq təşkilata, dövlətə dəxli var, Azərbayan heç kəsin qarşısında cavab verməli deyil. Silahlanma ilə bağlı müəyyən beynəlxalq normalar var, bugünə qədər də Azərbaycan həmin o beynəlxalq normalara, kvotaya tam şəkildə əməl edib. Beynəlxalq qurumların özlərinin peyk vasitəsilə istənilən ölkədə silahla, yerdəyişmələrlə bağlı izləmə aparmaq imkanları var və onlar izləyirlər, çünki məlumatları dərc edirlər. Ermənistanın onlara nəsə bir fakt təqdim etməsi, bunun da yeni bir sensasiya olması kimi bir şey yoxdur. Onların deyəcəyi və beynəlxalq təşkilatlarən bilmədiyi bir məsələ yoxdur ki, Ermənistan nəyisə çatdırsın. Onların apardığı hansısa bir saxta sənəddən Qərbin, beynəlxalq qurumların Azərbaycana qarşı istifadə etməsi qeyri-realdır. Bu sübut olunmayan bir məsələdir. Heç kəsin Azərbaycana göstəriş verməyə ixtiyarı yoxdur. Azərbaycan beynəlxalq normaıara həmişə riayət edib. Ermənistanın iddia etdiyi nədirsə, o birinci Azərbaycanla müzakirə olunmalıdır ki, ermənilər onun haqda ortaya hansısa iddia qoyub. Yəni məsələnin mahiyyəti bundan ibarətdir. Son olaraq məsələni belə dəyərləndirmək olar ki, Ermənistan sakit dayanmaq istəmir, Azərbaycana qarşı hansısa təxribatlar törətmək istəyir..."-deyə A.Nağı bildirdi.
Azərbaycan öz torpaqlarını işğaldan azad edib, amma Ermənistan süni şəkildə o əraziləri öz əraziləri kimi qələmə verməyə çalışır. Eyni zamanda Qazaxın kəndləri ilə bağlı da ermənilərin yanlış təsəvvür yaratmaq istədiyini deyən A.Nağı qeyd etdi ki, bununla bağlı təxribat həyata keçirir, guya o kəndlərin ermənilərə aid olduğunu göstərməyə cəhd edirlər. "Faktlar ortadır. Sovet dövrünə aid xəritələr var, o dövrdə inzibati bölgülər vardı. O kəndlərin hər birində azərbaycanlılar yaşayırdı və onlar Qazaxın inzibati ərazi vahidləri idi. Amma dünya bunu görmək istəmir, bu fakta diqqət yetirmir, ermənilərin yalanlarını əsas götürürlər. Faktların hamısı onu göstərir ki, Ermənistan təxribat törətməyə hazırlaşır. Azərbaycan bu təxribatlara qarşı hazır olmalıdır, buna qarşı elə addımlar atmalıdır ki, onlar peşman olsunlar"-deyə A.Nağı bildirdi.
İradə SARIYEVA
