Əli Mustafa: "Görünür, Paşinyan bununla bağlı Aİ-nin yeni istəkləri ilə razılaşıb"
Avropa Komissiyasının prezidenti Ursula Fon der Lyayen Brüsseldə Aİ-ABŞ-Ermənistan üçtərəfli görüşü çərçivəsində Ermənistana Rusiyanın sanksiyalardan yayınmasının qarşısını almaq istiqamətində Aİ-nin səylərinə qoşulduğu üçün təşəkkür edib:
"Xüsusilə ölümcül texnika və texnologiyaların Rusiya ordusunda bitməməsinə əmin olmaq. Bu, Ermənistanın və Aİ-nin ortaq dəyərləri və ortaq maraqları olduğunu göstərir. Bu, Ermənistanla Avropa İttifaqı arasında artan yaxınlaşmanı, iki tərəfin məqsəd və maraqlarının üst-üstə düşdüyünü nümayiş etdirir".
Ursula Fon der Lyayenin açıqlamasından belə məlum olur ki, faktiki olaraq Ermənistan Rusiyanın əleyhinə fəaliyyət göstərir və sanksiyaların mexanizminin icrasına dəstək verir. O baxımdan maraqlıdır, Ursulanın bu açıqlamasından sonra Rusiyanın Ermənistana münasibəti hansı formada dəyişə bilər? Ümumiyyətlə, bundan sonra iki ölkə münasibətlərində nə gözlənilir?
"Ermənistan praktiki olaraq buna gedərsə, bu, Moskva-İrəvan münasibətlərini daha da gərginləşdirə bilər"
Sözügedən məsələni "Bakı-Xəbər"ə şərh edən Demokratik Dəyişim Partiyası Təşkilat Komitəsinin sədri Əli Mustafa buna bir neçə aspektdən yanaşdı: "Üçtərəfli görüşdə Avropa Komissiyasının prezidenti Ursula Fon der Lyayenin Ermənistanla bağlı açıqlaması doğrudan da maraqlıdır. Yəni o qeyd edir ki, Rusiyanın sanksiyalardan yayınmasının qarşısının alınması istiqamətində Avroittifaqın səylərinə qoşulmasına görə Ermənistana təşəkkür edir. Bu o deməkdir ki, göstərilən məsələlərlə bağlı Ermənistan Rusiyaya qarşıdır və Aİ bunu rəsmən təsdiq edir. İlk baxışdan belə təəssürat yaranır. Ancaq hesab edirəm ki, Ursulanın bu açıqlaması obyektiv deyil. Xüsusən də iqtisadi müstəvidə. Ona görə ki, ötən il Ermənistanla Rusiyanın ticarət dövriyyəsinin dinamikasına baxsaq tamam fərqli mənzərə ortaya çıxır. Söhbət ondan gedir ki, ötən il Ermənistanın Rusiyaya ixracatı 7,3 milyard dollar olub. Bu isə o deməkdir ki, Ermənistan Rusiyanın sanksiyalardan yan keçməsinə birbaşa kömək edib. Çünki birdən-birə Ermənistan kimi balaca ölkə bu qədər məhsulu Rusiyaya ixrac edə bilməz. Ən azından ona görə ki, hazırda Ermənistanın belə bir imkanı yoxdur. Deməli, Ermənistan Rusiyaya qadağan olunmuş məhsulları ötürmək hesabına belə böyük göstərici əldə edib. Ursula hərbi təyinatlı məhsullara eyham vurur. Ancaq nəzərə almaq lazımdır ki, mikro çiplər də hərbi təyinatlı məhsulların hazırlanmasında istifadə edilir. Rusiyaya çip ixrac edən ölkələrdən biri elə Ermənistandır. Ancaq o da ola bilər ki, görünür, Paşinyan bununla bağlı Aİ-nin yeni istəkləri ilə razılaşıb. Bu səbəbdən Ursula belə bir açıqlama ilə çıxış edib. Söhbət hərbi sənayedə istifadə olunan hansısa yüksək texnologiyalardan gedə bilər. Güman ki, bundan sonra Ermənistan həmin məhsulların Rusiyaya ötürülməsinə imkan verməz. Yoxsa birdən-birə Ursula bu məsələyə toxunmazdı. Ermənistan praktiki olaraq buna gedərsə, bu, Moskva-İrəvan münasibətlərini daha da gərginləşdirə bilər".
Vidadi ORDAHALLI
