Rəşad Bayramov: "Paşinyan "son dərəcə əla" kimi dəyərləndirdiyi perspektivsiz görüşün ona vuracağı zərbələrin acı nəticələrini yaxın zamanda görəcək"
Brüsseldə ABŞ Dövlət katibi Entoni Blinken, Avropa Komissiyasının Prezidenti Ursula fon der Lyayen və Ermənistanın baş naziri Paşinyan arasında görüş başa çatsa da, onun nəticələri hələ uzun müddət müzakirə olunacaq.
Əvvəla ondan başlayaq ki, Ermənistanın Belçikadakı səfirliyində keçirilən görüş, gözlənildiyinin əksinə olaraq sönük olmaqla yanaşı, beynəlxalq diqqəti özünə cəlb etməyib. Yəni Ermənistanın təqdim etdiyi kimi ajiotaj doğurmayıb. Görüşlə bağlı yayılan xəbərlər, səslənən bəyanatlar da bunu deməyə əsas verir. Ermənistan üçün müsbət nəticə sadəcə ayrılacaq növbəti sədəqə tranşı ola bilər. Təbii ki, bu da əvəzsiz olmayacaq. Ermənistan çox ciddi və nəticələri fəlakətə gətirib çıxara biləcək ssenarilər yaşaya bilər. Ən əsası, bu üçtərəfli görüşü anti-Rusiya qüvvələrinin triumfu kimi qiymətləndirmək olar. Bu qüvvələr Ermənistanı öz riyakar və məkrli oyunlarının iştirakçısına çevirməyə müvəffəq olublar. Səslənən bəyanatların və təşəbbüslərin də əksəriyyəti ancaq buna yönəlib.
Təəccüblüdür ki, Ermənistan siyasi elitası və mediasının görüşdən əvvəl yaratdıqları ajiotaj özünü doğrultmadı. Bundan belə qənaətə gəlmək olar ki, ABŞ və Qərb ölkələri Ermənistana hərtərəfli dəstək verməklə bağlı tam qənaətə gəlməyiblər. Ancaq Paşinyan özünün sosial şəbəkə hesabında görüşlə bağlı təəssüratını belə bölüşüb: "Son dərəcə əla görüş oldu". Paşinyanın heç bir ciddi nəticəsi olmayan görüşü belə eyforik dəyərləndirməsi nə ilə bağlıdır?
Politoloq Rəşad Bayramov "Bakı-Xəbər"ə açıqlamasında bildirdi ki, görüşün necə nəticələndiyi, hansı rezonansı doğurduğunu ona verilən beynəlxalq reaksiyalardan görmək olar: "Ermənistana təsir imkanları olan ölkələrin heç biri bu görüş barədə müsbət fikir səsləndirmir. Məsələn, Türkiyə Xarici İşlər Nazirliyi Brüsseldə keçirilən görüşə dair bəyanat yayıb. Qardaş ölkənin XİN-i birmənalı şəkildə bildirib ki, həmin görüşün keçirilməsi regiondakı mürəkkəb problemlərin həlli üçün əsas götürülməli olan neytrallıq yanaşmasına zərbə vuracaq.
Rusiya Xarici İşlər Nazirliyinin Ermənistan–ABŞ–Aİ formatında görüşlə bağlı bəyanatında Rəsmi Moskva İrəvanı Qərbin onu aldatmasına və Ermənistanı yanlış yola salmasına imkan verməməyə çağırır. Bəyanatda qeyd edilir ki, Rusiya Ermənistan–ABŞ–Aİ görüşünü Qərbin Cənubi Qafqazı geosiyasi qarşıdurmaya sürükləmək üçün növbəti cəhdi kimi qiymətləndirir: "Regiondankənar qüvvələrin Cənubi Qafqazın işlərinə dağıdıcı müdaxiləsi ən mənfi nəticələrlə sonlana bilər. Qərb Ermənistanı Cənubi Qafqazda son dərəcə təhlükəli planlarını həyata keçirmək üçün alətə çevirmək istəyir".
Azərbaycanın da mövqeyi məlumdur. Belə olan təqdirdə hansı yüksək nəticədən danışmaq olar? Paşinyan bununla öz səriştəsizliyini ört-basdır edir. Gərgin olan daxili auditoriyanı sakitləşdirməyə çalışır.
Brüssel görüşünün təşkilatçıları Cənubi Qafqazda müəyyən etdikləri ayırıcı xəttin əsasını qoydular. Bu cür təhlükəli ayırımçılıq gələcəkdə region ölkələri ilə yanaşı, Azərbaycanın da dövlət maraqlarını təhdid edə biləcək zəhərli toxumların indidən səpilməsi deməkdir. Ayrı-seçkiliyin səbəblərinə gəldikdə isə, bəziləri bunu yalnız mürəkkəb geosiyasi proseslərlə və dünyanı parçalamaq gücündə olan böyük dövlətlərin maraqları ilə izah etməyə çalışır. İstənilən halda, Ermənistsn bu məsələdə alət seçilib. Paşinyan "son dərəcə əla" kimi dəyərləndirdiyi perspektivsiz görüşün ona vuracağı zərbələrin acı nəticələrini yaxın zamanda görəcək. Bunun Ermənistana heç bir faydası olmayacaq".
Məhəmmədəli QƏRİBLİ
