Brüsseldə ABŞ-Avropa İttifaqı-Ermənistan üçtərəfli görüşü keçirilib. Görüş Avropa Komissiyasının Prezidenti Ursula Fon der Lyayen, ABŞ dövlət katibi Antoni Blinken və Ermənistan baş naziri Paşinyanın iştirakı edib. Görüşdə həmçinin, Avropa İttifaqının xarici siyasət və təhlükəsizlik məsələləri üzrə Ali nümayəndəsi Cozep Borrell də iştirak edib.
Avropa Komissiyasının rəhbəri Ursula fon der Leyen görüşdə Avropa İttifaqının Ermənistanın islahatlarını qabaqcıl texniki və maliyyə vasitələri ilə dəstəkləməyə davam edəcəyini deyib.
"Bu kontekstdə, Baş nazir, çağırışlara baxmayaraq, demokratik islahatların həyata keçirilməsində göstərdiyiniz səylərə görə sizi təbrik etmək istəyirəm.
Mən Ermənistanın Rusiyaya qarşı sanksiya rejiminin saxlanması istiqamətində atdığı addımları, xüsusən də öldürücü texnika və texnologiyaların Rusiya silahlı qüvvələrinə düşməməsini təmin etmək addımını alqışlayıram.
Bu o deməkdir ki, Avropa İttifaqı və Ermənistan eyni dəyərləri və maraqları bölüşür. Bu gün biz daha geniş tərəfdaşlıq imkanlarına baxacağıq və onu yeni və iddialı gündəmlə irəli aparacağıq.
Biz Qarabağdan köçkün düşmüş erməniləri unutmamışıq. Ermənistanda qaçqınlarla bağlı humanitar vəziyyət prioritet olaraq qalır. Onları dəstəkləmək üçün biz sentyabr ayından bəri 30 milyon avrodan çox yardım etdik və onların uzunmüddətli inteqrasiyasını dəstəkləmək üçün daha çox şey etməyə hazırıq", - deyə Fon der Leyen bildirib.
Sonda tərəflər görüşün yekunlarına dair birgə bəyanat yayıblar.
Bu arada, Rusiya Xarici İşlər Nazirliyi bəyanat yayaraq bildirib ki, Brüsseldəki görüş Cənubi Qafqazı geosiyasi qarşıdurmaya çəkmək üçün növbəti cəhddir.
"Biz 2024-cü il aprelin 5-də Brüsseldə keçirilən Ermənistan-ABŞ-Aİ formatında yüksək səviyyəli görüşü "kollektiv Qərb"in Cənubi Qafqazı geosiyasi qarşıdurmaya çəkmək üçün növbəti cəhdi kimi qiymətləndiririk. Regiondankənar qüvvələrin Cənubi Qafqazın işlərinə məsuliyyətsiz müdaxiləsi, regionda sabitlik, təhlükəsizlik və iqtisadi inkişaf üçün ən mənfi nəticələrə gətirib çıxara bilər, yeni ayırıcı xətlərin yaranmasına, eləcə də gərginliyin artmasına səbəb olur", - bəyanatda deyilir.
Rusiya XİN-in fikrincə, Qərb Ermənistanı Cənubi Qafqazda son dərəcə təhlükəli planlarının həyata keçirilməsi üçün alətə çevirmək istəyir.
"Biz bilirik ki, Vaşinqton və Brüssel Ermənistanın KTMT və Aİİ-dən çıxmasına, Rusiya hərbi bazası və sərhədçilərinin çıxarılmasına çalışır. Biz İrəvan rəhbərliyini Qərbin ölkəni təhlükəsizlik boşluğunun yaranması və iqtisadiyyatda ciddi problemlər ilə dolu olan yanlış yola yönəltməsinə imkan verməməyə çağırırıq", - bəyanatda deyilir.
XİN vurğulayır ki, Brüsseldə elan edilmiş qrant dəstəyinin həcmləri Ermənistanın Moskva ilə qarşılıqlı fəaliyyətdən, Aİİ və MDB çərçivəsində əldə etməkdə davam etdiyi çox milyardlıq fayda ilə müqayisə edilə bilməz.
"Məhz bu amillər son illərdə ticarət dövriyyəsinin dəfələrlə artmasını təmin etmişdir (2018-ci ildən 4 dəfə). Biz ümumi inteqrasiya birlikləri vasitəsilə fundamental ikitərəfli sənədlərdə və sazişlərdə təsbit olunmuş prinsiplər əsasında Ermənistanla münasibətləri hərtərəfli dərinləşdirmək və genişləndirmək öhdəliyimizi təsdiq edirik. Əminik ki, Rusiya-Ermənistan müttəfiqliyinin mütərəqqi inkişafı Rusiya və Ermənistan xalqlarının fundamental maraqlarının həyata keçirilməsinə, regional təhlükəsizliyin və sabitliyin möhkəmləndirilməsinə töhfə verəcək", - Rusiya XİN-in bəyanatında deyilir.
XİN-dən bildirilib ki, Qərb Ermənistan-Azərbaycan normallaşmasının fundamental əsasını – Rusiya, Ermənistan və Azərbaycan liderlərinin 2020-2022-ci illərdə nəqliyyat və iqtisadi blokadanın aradan qaldırılması üçün tədbirləri nəzərdə tutan üçtərəfli bəyanatlar toplusunu məhv etmək cəhdlərindən əl çəkmir.
"Məhz Vaşinqton və Brüsselin təzyiqi ilə rəsmi İrəvan bu sazişlərin icrasını dayandırdı, bir çoxları üzrə, xüsusən də qarşılıqlı nəqliyyat blokadasının aradan qaldırılması məsələsində tərəflər qarşılıqlı məqbul həll yollarına yaxın idi. Moskva Azərbaycan və Ermənistan arasında çoxdan gözlənilən sülhə nail olmaq üçün hər cür kömək etməyə hazırdır.
Cənubi Qafqazda həm regional, həm də ikitərəfli xarakter daşıyan problemli məsələlər 2023-cü il oktyabrın 23-də Tehranda keçirilən "3+3" Məşvərət Platformasının ikinci iclasında razılaşdırılan "regional məsuliyyət" prinsipinə uyğun olaraq həllini tapmalıdır. Biz xarici oyunçuları bu razılaşmalara hörmətlə yanaşmağa, İrəvan hakimiyyətini isə öz xarici siyasət xəttini qurarkən qonşu dövlətlərin narahatlığını nəzərə almağa çağırırıq", - Rusiya XİN-dən bildiriblər.
TAHİR
