Ermənistanın baş naziri Nikol Paşinyanın sonuncu mətbuat konfransında səsləndirdiyi fikirlərin Moskva-İrəvan münasibətlərinə növbəti zərbə olacağı barədə səslənən fikirlər artıq özünü doğruldur. Kreml təmsilçiləri Ermənitanın yanaşmasına gözlənildiyi kimi sərt reaksiya verir.
Xatırladaq ki, Paşinyan avqust ayında Rusiya sərhədçilərinin İrəvanda "Zvartnots" aeroportunu tərk edəcəyini bəyan edib. Onun sözlərinə görə, bu siyasi deyil, işgüzar prosesdir: "Biz Rusiya tərəfini qəbul edilən qərarla bağlı məlumatlandırmışıq. Avqustun 1-dən "Zvartnots" aeroportunda erməni sərhədçilər fəaliyyətə başlayacaq". Paşinyan bu xüsusda müvafiq məktubun Rusiya tərəfinə təqdim olunduğunu da bildirib. Amma Rusiya Xarici İşlər Nazirliyinin rəsmi nümayəndəsi Mariya Zaxarova qeyd edir ki, Moskva Rusiya sərhədçilərinin İrəvan aeroportundan çıxarılması ilə bağlı diplomatik kanalları vasitəsilə ilə heç nə almayıb. Onun sözlərinə görə, İrəvan aeroportundan Rusiya sərhədçilərinin çıxarılacağı ilə bağlı Ermənistan tərəfindən qurum bildirişi gəlib: "Hesab edirik ki, bütün qərarlar qurumlararası çalışmaların yekununda qəbul ediləcək. Xatırlatmaq istəyirəm ki, məlum elan rəsmi İrəvan tərəfindən qeyri-dost addımlar və bəyanatların fonunda edilib. Çətin ki, bu cür təşəbbüslər Ermənistanın və onun təhlükəsizliyinin maraqlarına cavab versin". Mariya Zaxarova onu da vurğulayıb ki, Ermənistan KTMT platforması ilə bağlı konkret razılaşmadan yayınır və bu, təəccüb doğurur: "Moskva hazırda Ermənistan rəhbərliyinin bu təşkilatla bağlı çox vaxt səsləndirdiyi səmərəsiz, ultimativ və bəzən isə təhqiramiz ritorikasından narahatdır". Bu arada maraqlı məqamlardan biri də Avropa Parlamentinin Ermənistanın Avropa İttiofaqı üzvlüyünə namizədlik imkanlarını nəzərdən keçirən qətnamə qəbul etməsidir. Qətnamə layihəsində deyilir: "Əgər Ermənistan namizəd statusu almaqda maraqlı olsa və demokratiyanı gücləndirən islahatlar yolu ilə getməyə davam edərsə, bu, Aİ-Ermənistan münasibətlərində transformasiya mərhələsi üçün əsas ola bilər". Parlamentarilər icra strukturlarına Avropa İttifaqı ilə Ermənistan arasında əlaqələri gücləndirməyi tövsiyə ediblər. Avropa Parlamenti İrəvanın Kollektiv Təhlükəsizlik Müqaviləsi Təşkilatında iştirakının dayandırılmasına istinad edib. Avropa Parlamentinin qətnamələri hüquqi qüvvəyə malik deyil və tövsiyə xarakteri daşıyır, lakin Aİ-də konkret siyasi mövqelərin təşviqi və yayılması üçün istifadə olunur. Bundan əvvəl Ermənistanın baş naziri Nikol Paşinyan "France 24" telekanalına müsahibəsində İrəvanın KTMT-də iştirakını dayandırdığını bildirib. O, Minskdə keçirilən KTMT sammitində də iştirak etməyib. Zaxarova isə diqqəti ona da yönəldib ki, Fransanın Ermənistanın təhlükəsizliyini təmin etməyə qadir olduğuna inanmaq sadəlövhlükdür. Onun sözlərinə görə, Fransanın elə imkanları olsaydı, Parisin müqavilə öhdəlikləri olduğu ölkələrdə onu tətbiq edərdi: "Hansı ki, Fransa bunu etməyə məcbur idi, çünki buna görə pul alırdı. Bu, Afrika qitəsidir. Fransanın bu ölkələrdəki missiyası çox uğursuz olub. Buna səbəb hansısa siyasi anlaşılmazlıq olub. Ona görə ki, Fransa öz tərəfdalarını həmin ölkələr üçün ən kritik məqamda tək qoyub, onları atıb. Həmin ölkələr Fransa mövcudiyyətini əvəz edəcək, onların təhlükəsizliyini təmin edəcək ölkə axtarmağa başlayıblar. Fransanın Saxara regionunda apardığı sülhməramlı və vasitəçilik missiyasının necə uğursuzluqla başa çatdığını unutmamağa dəyər. Bu, mənə elə gəlir ki, çox parlaq nümunədir".
Baş verənləri şərh edən erməni politoloq Argişti Kiviryan bildirir ki, Rusiya indi ona görə hərəkətə keçmir ki, Ermənistan vasitəsilə Qərbin sanksiyalarından yayınır: "Paşinyan Rusiyanın Ermənistan vasitəsilə Qərbin sanksiyalarından yan keçməsinə imkan verməsə, "qırmızı xətt"i keçəcək". Onun sözlərinə görə, bu, Saakaşvilinin taleyinin təkrarlanması üçün ilk addım olacaq: "Əgər Rusiya Ermənistandan hərbi bazasını çıxarmaq istəmirsə, deməli, onu çıxarmayacaq və bu, Ermənistanın hakimiyyətindən asılı deyil". Kiviryan bildirib ki, Paşinyan sülh dövrü elan edib, amma əbədi müharibə dövrünü açıb: "Paşinyanın siyasəti sülhə aparmır, 44 günlük müharibə latent formada davam edir, o, sülh dövrü elan etsə də, əbədi müharibə dövrü açıb". Bunlar fonunda rusmeylli qüvvələr də Ermənistanda hərəkətə keçib. Məsələn, Erməni Apostol Kilsəsinin Şirak yeparxiyasının rəhbəri, arxiyepiskop Mikael Acapayan maraqlı bəyanatla çıxış edib. O, təhlükəsizlik qüvvələrini Ermənistanda hərbi çevrilişə çağırıb: "Ölkənin fəlakətə doğru getdiyini görən bu vətənpərvər qüvvələr, təhlükəsizlik qüvvələri müəyyən addımlar atmalıdırlar. Əgər təhlükəsizlik qüvvələri bunu görüb baş verənlərin qarşısını almırsa, deməli, ölkəni düşünmürlər. Mən ölkəni xilas etməkdən danışıram, kimisə cəzalandırmaqdan danışmıram". Baş verənlərlə bağlı "armenianreport" portalı yazır ki, Rusiyaya bağlı qüvvələr indi daha fəal olub. Serj Sarkisyanın rəhbəri olduğu Respublikaçılar Partiyası isə xalqı yenidən inqilaba səsləyir: "İndiki hakimiyyət ideal deyil, onların çoxlu uğursuzluqları var və onları tənqid etmək üçün bir şey var. Və biz də bunu edirik. Amma eyni zamanda, indikiləri əvvəlkilərlə müqayisə etmək olmaz. Şübhəsiz ki, əvvəlkilər dünyanın ən əxlaqsız, ən dəyərsiz, ən hiyləgər, ən həyasız hakimiyyətləri idi. Onların bütün varlığı yalnız bir şeyə - şəxsi zənginləşməyə yönəlmişdi. Bu, xaç atası Serj Sarkisyanın başçılıq etdiyi oliqarxlar ölkəsi idi. O, öz sələfinin işini davam etdirən - Ermənistandakı bütün bəlaların səbəbkarına çevrilən klan-oliqarx sistemini ən azğın formada gücləndirən ölkə qulduru, hakimiyyəti qəsb edən şəxs idi. Serj Sarkisyan, onun qardaşları və yaxın əyanları kiçik və orta biznesi xarabalığa çevirdilər, yüz minlərlə insan qonaq işçiyə çevrilməyə məcbur oldu. Köçəryan və Sarkisyanın dövründə Ermənistanda korrupsiya sistemli xarakter alıb və geniş vüsət alıb. Dövlət büdcəsini isə açıq şəkildə və ya eyni rejimə yaxın adamların udduğu saxta tenderlər yolu ilə talan etdilər. Hələ Serj Sarkisyanın ailə üzvlərinin, ilk növbədə Saşikin fəal iştirak etdiyi ofşor şirkətləri və əmlakın yenidən bölüşdürülməsinin kobud üsullarını demirik. Və bütün bunlardan sonra onun partiya funksionerləri hələ də ağızlarını açmağa cəsarət edirlər? Onların xalqı inqilaba səsləməsi yalnız öz maraqlarından qaynaqlanır və burada xarici sifariş də olmamış deyil".
Tahir TAĞIYEV
