Bünyamin Qəmbərli: "Müxtəlif ölkələrə bağlı olub hakimiyyətdə mövqe tutan bəzi adamlar…"
Naxçıvan Muxtar Respublikası Nazirlər Kabinetinin tabeliyində olan "Naxçıvan" Beynəlxalq Hava Limanı "Azərbaycan Hava Yolları" Qapalı Səhmdar Cəmiyyətinin (AZAL) tabeliyinə verilib. Bununla bağlı Baş nazir Əli Əsədov qərar imzalayıb.
Qərara əsasən, AZAL, Rəqəmsal İnkişaf və Nəqliyyat Nazirliyi, İqtisadiyyat Nazirliyi və Naxçıvan Muxtar Respublikasının Nazirlər Kabineti bu Qərardan irəli gələn məsələləri qanunvericiliyin tələblərinə uyğun olaraq həll etməlidir. Naxçıvan Ali Məclisinin sabiq sədri Vasif Talıbov vəzifəsi ilə vidalaşandan sonra müxtəlif istiqamətlərdə Naxçıvanın Bakıya inteqrasiyası davam edir. Bir il üç aydır ki, bu proses bitməyib. Naxçıvan mərkəzi hakimiyyətdən nə dərəcədə ayrılmışdı ki, inteqrasiya prosesi bu müddətdir gedir və hələ də qurtarmır?
27 il ərzində, yəni 1996-2023-cü illər arasında Naxçıvanın idarəçiliyini Azərbaycanın idarəçiliyindən sırf subyektiv mülahizələrlə ayıranlar Azərbaycan dövlətinə nə qədər ziyan vurdular və bu işdə cinayət məsuliyyəti varmı?
Əslən Naxçıvandan olan müstəqil siyasətçi Bünyamin Qəmbərli "Bakı-Xəbər"ə açıqlamasında bildirdi ki, bu prosesə inteqrasiya demək olmaz: "Çünki inteqrasiya bir qədər ağır termindir. Təbiidir ki, orada ciddi boşluqlar mövcud idi. Onların aradan qaldırılması, nizamsızlıqların nizama salınması prosesi gedir. Bu da niyə uzun çəkir? Elə məsələlər var ki, onlarla bağlı Azərbaycanın digər regionlarında da boşluqlar mövcuddur. Onları yoluna qoymadan, Naxçıvanda da nəyəsə nail olmaq mümkün deyil. Naxçıvan aeroportunun AZAL-a verilməsi, düşünmürəm ki, nəyisə dəyişəcək. Çünki biz AZAL-ın monopolist mövqedən doğan qiymət siyasətini görürük. Ölkədə bir neçə fərqli hava şirkəti olsa, rəqabət yaranar və bunun qiymətlərə də müsbət təsiri olar. Bir şirkət isə o deməkdir ki, insanlar məcbur olur məhz onunla uçsun. Bu illər ərzində idarəçilikdə yaranan boşluqların müxtəlif səbəbləri var. Hesab edirəm ki, müxtəlif ölkələrə bağlı olub hakimiyyətdə mövqe tutan bəzi adamlar illər ərzində Azərbaycan dövlətinin güclənməsinə, qərar və fərmanların icrasına açıq-açığına mane olublar. Bunun bir adı da sabotajdır. Bu səbəbdən biz zaman və əlavə enerji itirmiş oluruq. Bütün bunların qarşısının alınması üçün ölkədə milli dövlətçiliyin ciddi priqramı və strategiyası hazırlanmalıdır. Buna əməl olunmaqla sabatajçılarla bağlı sərt tədbirlər görülməlidir".
Ümidvarıq ki, verilən yeni qərar Naxçıvan Hava Limanında tətbiq olunsa bəzi yersiz qadağalara da son qoyacaq. Məsələn, taksi sürücülərinə avtomobili tərk etmək qadağan olunub. Bu qaydanı pozanlar cərimələnir, yaxud bir daha hava limanına buraxılmırlar. Bu haqda bir qrup taksi sürücüsü məlumat verib. Sürücülər deyir ki, onlara maşında oturub, müştəri çağırmaq da qadağan olunub.
Sürücülər deyir ki, buna bənzər qadağa Vasif Talıbovun zamanında da olub, lakin yeni hakimiyyət bunu yersiz sayıb, aradan qaldırıbmış. Son dövrlər isə, bütün əvvəlki qadağalar kimi, bu qadağa da daha sərt formada tətbiq edilməyə başlayıb.
Şərurdan olan taksi sürücüsü Eldəniz Məmmədov da son vaxtlar hava limanında qoyulan qadağadan şikayət edir:
"Bizə deyirlər avtomobildən düşmə, şüşəni qaldırıb, sərnişin çağırma. Otur maşınında, müştəri yaxınlaşıb deyəndə ki, məni filan yerə aparar, o zaman cavab verərsən. Əvvəl çağırırdıq, daha tez müştəri tapırdıq. Müştəri görəndə ki, mənim 2 adamım var, gözləməmək üçün dərhal avtomobilə otururdu və biz yola düşürdük. İndi həm biz, həm müştəri saatlarla gözləməli olur. Həm də çox zaman qonaq gələn hansı taksinin hansı rayona işlədiyini bilmir. Başqa bölgədən olan taksilər onları baha aparır. Çünki onlar gedib geri də qayıtmalıdırlar."
Məhəmmədəli QƏRİBLİ
