Xəyal Bəşirov: "Ermənistan tərəfin dedikləri tamamilə absurddur"
Məlum olduğu kimi, Azərbaycan Televizası Bakıda həbsdə olan erməni separatçılarının rəhbərlərindən müsahibə alıb. Amma hələ silsilə müsahibələr yayımlanamayıb. Müsahibənin elanı Ermənistanda naharatlığa səbəb olub və bu üzdən erməni mediasında bəzi absurd iddialar irəli sürülməyə başlayıb. Bununla bağlı Ermənistanın İnsan Hüquqları Müdafiəsi Bürosu məlumat da yayıb.
Sözügedən qurum iddia edir ki, guya bu videoçarxın nümayiş etdirilməsi "beynəlxalq standartlara ziddir".
Erməni ombudsmanın iddiasına görə, həbsdəki erməni separatçılarından müsahibə alıb onu efirə vermək olmaz, guya bu, "beynəlxalq standartlara ziddir" və onlar "ictimai marağın obyekti olmamalıdır".
Bu adamlar Azərbaycan dövlətinin ərazisində separatçılıqla məşğul olublar, əlləri azərbaycanlıların qanına batıb, ərazimizdə terrorçuluqla, separatizmlə məşğul olublar, bu halda əlbəttə, onların öz cinayətlərini etiraf etməsi bizim cəmiyyətimiz üçün böyük maraq kəsb edir.
Bu halda onlar necə maraq obyekti olmamalıdırlar?
"Cinayətkarların müsahibələrinin yayımlanması, çap edilməsi artıq ənənəvi hal almış bir tendensiyadır, burada qanunazidd bir şey yoxdur"
Siyasi və Hüquqi Araşdırmalar Mərkəzinin rəhbəri Xəyal Bəşirov "Bakı-Xəbər"ə bildirdi ki, Ermənistan tərəfi hər bir məsələyə öz marağından, öz kontekstindən yanaşaraq münasibət bildirir. "Onlar, ümumiyyətlə, bütün məsələlərə öz təxəyyüllərinə, öz təfəkkürlərinə, düşüncələrinə uyğun reaksiya verirlər, münasibət sərgiləyirlər. Keçmiş münaqişənin həllindən sonra baş verən proseslərə onlar öz maraqlarına uyğun şəkildə yanaşırlar. 10 noyabr 2020-ci ildə imzalanan üçtərəfli bəyanatın mətni göz önündədir, internet resurslarında mövcuddur, bütün dünya bunu oxuyur, amma Ermənistan tərəfi onun tam mahiyyətinə və məzmununa zidd şərhlər verməyə çalışırdı. Çox təəssüflər olsun ki, rəsmi şəxslər də bu şəkildə reaksiya ortaya qoyurdular. İndi də baş verən proseslərə özlərinə məxsus formada şərhlər verirlər, münasibət sərgiləyirlər. Necə olur ki, o cinayətkar ünsürlər zamanında Fransaya, Rusiyaya, digər dövlətlərə gedib orada televizyalara, mətbuata Azərbaycan əleyhinə silsilə müsahibələr verirdilər, onların müsahibələri canlı şəkildə yayımlanırdı? Necə ola bilirdi ki, keçmişdə Ermənistana rəhbərlik edən cinayətkar ünsürlərdən biri Serjik Sarkisyan Xocalı faciəsi ilə bağlı İngiltərədə müsahibə verib "azərbaycanlılar düşünürdülər ki, ermənilər mülkü şəxsləri öldürməzlər, onlara əl qaldırmazlar" sindromunu qırmaq kimi qələmə verib onunla öyünürdü? Bunu beynəlxalq hüquqa uyğun hesab etmək olar, amma Azərbaycan tərəfin həmin o cinayətkar ünsürlərin törətdikləri cinayətləri öz dillərindən ifadə etməsini yayımlaması qanuna uyğun sayılmır? Ermənistan tərəfin dedikləri tamamilə absurddur. Əslində bu, beynəlxalq aləmdə qəbul edilmiş bir qaydadır ki, cinayətkarların öz cinayət əməllərini etiraf etməsi və peşmançılıqlarını ictimaiyyətin diqqətinə çatdırması üçün onlar danışdırılır, müsahibələri informasiya resurslarında yayımlanır. Cinayətkarların müsahibələrinin yayımlanması, çap edilməsi artıq ənənəvi hal almış bir tendensiyadır, burada qanunazidd bir şey yoxdur. Bunu ilk dəfə Azərbaycan etmir. Bu məsələnin bir tərəfidir, digər tərəfdən isə həmin o cinayətkar ünsürlərlə bağlı Azərbaycana qarşı əsassız ittihamlar səsləndirilir. Həmin o cinayətkar ünsürləri Fransa kimi dövlətlər "demokratik üsulla seçilmiş" şəxslər kimi qələmə verməyə çalışırlar. Həmin o şəxslərin Azərbaycan tərəfindən terrorçu, cinayətkar kimi saxlanılıb ədalət mühakiməsinə təhvil verilməsi məsələsi ilə bağlı Azərbaycana qarşı səfərbərliklər elan olunub, hücum kampaniyaları təşkil olunub. Həmin cinayətkar ünsürlərin əli Azərbaycan xalqının qanına batıb. Onların bir çoxu hətta saxlanılmazdan əvvəl, hələ İkinci Qarabağ müharibəsi dönəmində Azərbaycanın müharibə zonası ilə heç bir əlaqəsi olmayan, müharibə bölgəsində yerləşməyən şəhərlərinə, mülki vətəndaşlarına qarşı terror hücümları təşkil etdiklərini özləri etiraf etmişdilər. Onlar həmin o hücumları təşkil etməkləri ilə öyünürdülər. Yəni gələcəkdə bir daha Azərbaycana, eyni zamanda ayrı-ayrı dövlətlərə qarşı törədiləcək belə cinayətlərin məntiqi sonluğunun bu şəkildə olacağını beynəlxalq aləmin diqqətinə çatdırmaq əhəmiyyətlidir. Cinayəti təyin etmək məsələsinə gəlincə, ümumiyyətlə, cinayət qanunvericiliyində, beynəlxalq aləmdə qəbul edilmiş aksiomalardan biridir ki, cəzanı təyin etmək digər şəxslərin də növbəti mərhələlərdə belə qanunazidd, hüquqazidd addımlardan çəkindirilməsi xarakteri daşıyır"-deyə X.Bəşirov bildirdi.
X.Bəşirov qeyd etdi ki, işğaldan azad edilmiş ərazilərimizdə üç il yarımdan sonra kütləvi məzarlıqlar aşkarlanır ki, o kütləvi məzarlıqlar belə cinayətkar ünsürlərin Azərbaycan vətəndaşlarına qarşı törətdikləri kütləvi cinayətlərin nəticəsidir, onun məhsuludur. "Bu gün də Azərbaycan azad edilmiş ərazilərində həmin o kütləvi məzarlıqların aşkar edilməsi prosesini həyata keçirir. Bu şəxslərin törətdikləri cinayətlərin detallarının həm cəmiyyətimizin, həm beynəlxalq ictimaiyyətin, eyni zamanda Ermənistan cəmiyyətinin diqqətinə çatdırılmasında əhəmiyyətli məqamlar var. Nəyə görə? Çünki Ermənistan cəmiyyəti də bu cinayətkar ünsürlərin əməllərinin bəlkə də hələ tam mahiyyəti ilə tanış deyil. Qoy onlar da tanış olsunlar, onlar da görsünlər ki, 30 illik bir müddət ərzində Qarabağ mövzusunu bəhanə gətirərək onları bu mövzu ətrafında özlərinin maraqlarına qurban verən şəxslər əslində nəyə xidmət ediblər. Yəni bilsinlər ki, onların əsas məqsədləri heç də Ermənistan xalqının, Ermənistan dövlətinin maraqlarına xidmət etmək xarakteri daşımayıb. Onların əsas məqsədi Azərbaycanın ərazilərini işğal edib həmin ərazilərdə belə cinayətlər törədib, vəhşiliklər, vandalizmlər nəticəsində əldə edilmiş var-dövləti öz aralarında bölüşdürmək olub. Yəni bunun Ermənistanın vətəndaşlarına, onların rifahının, həyat şəraitinin yüksəldilməsinə heç bir aidiyyəti olmayıb. Düşünürəm ki, əslində bu, Azərbaycanın daxili məsələsidir. Daha sonra burada qanuna və hüquqazidd heç bir addım yoxdur, beynəlxalq hüquqa qarşı heç bir addım atılmır. Eyni zamanda bu, həm beynəlxalq, həm də daxili hüquq baxımından Azərbaycan dövlətinin atacağı addım olacaq ki, bu yolla Azərbaycan öz vətəndaşlarına, xalqına, dövlətimizin özünə qarşı törədilmiş cinayətlərin izlərini bir daha beynəlxalq aləmdə ifşa edəcək. Azərbaycan dövləti onları beynəlxalq aləmdə ifşa etməklə, əslində Ermənistan toplumunun özü haqqında, yaxud onun havadarları olan Fransa kimi dövlətin onlar barədə yaratdıqları "ən qədim xalq", "ən qədim mədəniyyətə, svilizasiyaya sahib olan xalq", "sülhpərvər", "qurub yaradan xalq" mifini darmadağın etmək prosesinə xidmət edəcək. Çünki reallıq tamam başqa mənzərəni əks etdirir. Əslində reallıq ondan ibarətdir ki, Ermənistan toplumu Ermənistana rəhbərlik edən şəxslərin təsiri, iradəsi altında Cənubi Qafqaz regionunda yalnız pozuculuq siyasəti həyata keçirir"-deyə X.Bəşirov qeyd etdi.
İradə SARIYEVA
