Fransanın müstəmləkələrindən biri olan Korsika əsarətdən xilas olmaq istiqamətində fəaliyyətini genişləndirir. Artıq bütün bunları Fransada nəzərə almağa məcburdurlar. Məlumata görə, Korsikanın yerli hökuməti adanın gələcəyinə dair qanun layihəsini müzakirə edib.
Fransanın daxili işlər naziri Jerar Darmanin bildirib ki, qanun layihəsində adanın Fransa daxilində muxtariyyəti tanınır. Layihə növbəti mərhələdə müzakirə üçün Korsika Milli Assambleyasına təqdim edilməlidir.
Bununla belə, nazir bildirib ki, layihədə heç bir halda adanın Fransadan ayrılmasından söhbət getmir. Sənəddə "Korsika xalqı" deyil, "mədəni icma" termini yer alır. Qanun Korsikanın yerli parlamentində qəbul edildikdən sonra Fransa parlamentinin hər 2 palatasında təsdiq olunmalıdır. Amma hesab olunur ki, baş verənlər Korsikanın müstəqilliyə gedən yolunda ilk addımlardan biridir. Burada, ümumiyyətlə, Fransa istilasına qarşı fəaliyyət genişlənir. Bu arada xatırladaq ki, 2024-cü il yanvarın 28-də Korsikada 700-ə yaxın insan müstəqillik uğrunda mübarizə aparan strukturları və fəalları birləşdirən, Fransa müstəmləkə hökmranlığına qarşı mübarizəyə sadiqliyini təsdiqləyən yeni "Nazione" hərəkatını təsis edib. Başqa ölkələrin daxili işlərinə kobud müdaxilələr etməyə çalışan, kağız üzərində demokratik adlanan rəsmi Paris Korsikada insanların fikirlərini azad şəkildə ifadə etmək hüququna hörmət göstərməyərək, hərəkatın yaranmasından iki gün sonra "Nazione"nin fəallarına qarşı təqiblərə başlayıb. Yanvarın 30-da "Nazione"nin iki fəalı Fransa Milli Terrorla Mübarizə Prokurorluğunun göstərişi ilə həbs edilərək, əvvəlcə Borgu hərbi düşərgəsinə, oradan isə terrorçu kimi Parisə aparılıb. Fransa polisi "Nazione"nin fəallarının evlərinə hücum çəkərək qapıları partlayıcılarla dağıdıb, uşaqlarının gözü önündə atalarına fiziki zor tətbiq edib, evlərini dağıdıb. Qeyd edək ki, Bakı Təşəbbüs Qrupu "Nazione" hərəkatının Baş Təsis Yığıncağının uğurla keçirilməsindən sonra Fransa polisi tərəfindən hərəkatın müstəqillik tərəfdarı olan fəallarının və onların ailə üzvlərinin qeyri-qanuni saxlanılmasını qətiyyətlə pisləyib. Bildirilib ki, fəalları tutmaq üçün Fransanın axtarış və əməliyyat qrupu tərəfindən seçilmiş metodlar: sındırılmış qapılar, dağıdılmış evlər, yerə atılan və bunun yarada biləcəyi xəsarət risqi ilə övladlarının gözü qarşısında saxlanılan valideynlər özünü insan hüquqlarının vətəni kimi təqdim edən bir ölkə üçün biabırçılıqdır. Polisin qanunsuz təqibləri davam edir və Korsika xalqını qorxutmaq məqsədi daşıyır. Keçmiş siyasi məhbusları bir araya gətirən "Patriotti" kollektivi və siyasi dustaqları müdafiə edən "Associu Sulidarita" assosiasiyaları Korsika xalqını bunlara qarşı etiraza çağırır. "Patriotti" kollektivinin sözçüsü Jan-Filip Antolini bildirib: "Korsika xalqının elementar, fundamental hüquqlarının tanınmasını tələb edirik. Bu gün bu hüquqlar tanınmır. Xalqımızın ona məxsus bu torpaqlarda ləyaqətlə işləməsini tələb edirik. Fransa dövləti Korsikaya miqrantlar yerləşdirməklə adanın demoqrafik tərkibini dəyişir. Son illər ərzində Korsikanın əhalisinin sayı 40 faiz artıb və bu, yalnız miqrantların gəlməsi hesabına baş verib. Hansı ölkə belə vəziyyəti qəbul edər?! Bu, xalqımızın, onun dilinin, mədəniyyətinin yoxa çıxmasına aparır. Ona görə xalqımızın hüquqlarının tanınmasını istəyirik".
Hazırda Korsika adasında azadlıq tələbi ilə Fransa hökumətinə qarşı etirazlar davam edir. Emmanuel Makron hökuməti qəti şəkildə korsikalıların azadlıq tələbini rədd edir. Buna görə də müstəqillik tələb edən hərəkat üzvlərinə qarşı həbslər və təzyiqlər artırılıb. Onu da qeyd edək ki, BMT Baş Assambleyasının dekolonizasiya ilə bağlı qətnamələrinin qəbulundan 60 ildən çox müddət keçsə də, Korsika, Melaneziya, Polineziya, Karib və Antil adalar qrupunda yaşayan xalqlar bu gün də fransız kolonializmi və neokolonializmdən əziyyət çəkir. Onu da xatırladaq ki, 150 mindən artıq insanın danışdığı Korsika dilini məhv etmək siyasəti yürütməklə Korsika xalqının milli kimliyini unutdurmağa çalışan Fransa hökuməti yerli parlamentdə müzakirələr, parlament üzvlərinin debatları zamanı Korsika dilindən istifadəni qadağan edib. Bu siyasət universal insan haqları və milli azlıqların hüquqları ilə bağlı Fransanın beynəlxalq öhdəliklərinin açıq-aşkar və güc tətbiqi ilə pozulmasıdır. Fransa öz ərazisində yaşayan xalqların milli kimliyini inkar edir, yalnız "fransız" anlayışını qəbul edir ki, bunun özü şovinizmdir. Korsikada yerli dildən istifadə hüququnu ləğv etməklə Fransa özünün də qoşulduğu beynəlxalq sənədlərin tələblərini, götürdüyü öhdəlikləri pozub. Bu sənədlər içərisində 1789-cu il böyük Fransa inqilabının fərdi insan hüquqlarını təyin edən ən vacib sənədi olan "İnsan və vətəndaş hüquqları bəyannaməsi" də var. Həmçinin "Mülki və siyasi hüquqlar haqqında Beynəlxalq Pakt", "Uşaq hüquqları Konvensiyası", "İnsan hüquqlarının və əsas azadlıqlarının müdafiəsi haqqında Avropa Konvensiyası", "Əsas hüquqlar üzrə Avropa Xartiyası", "Dilçilik Hüquqlarının Ümumdünya Bəyannaməsi", UNESCO-nun mədəni müxtəlifliyə dair universal Bəyannaməsi, Mədəni İfadə Müxtəlifliyinin Qorunması və Təşviqi üzrə Konvensiyası, "Regional və ya Azlıqların Dilləri üçün Avropa Xartiyası" və sair də buraya daxildir.
Tahir TAĞIYEV
