Kremlin bütün cəhdlərinə baxmayaraq, Ermənistan Rusiyanı Qərbə dəyişməkdə israrlı olduğunu baş nazir Nikol Paşinyanın son mətbuat konfransında verdiyi açıqlamalar fonunda bir daha təsdiqləmiş oldu. Paşinyan Rusiya əleyhinə fəaliyyətini genişləndirməklə yanaşı, həm də açıq şantaj siyasətinə keçib.
Məsələn, o, Kollektiv Təhlükəsizlik Müqaviləsi Təşkilatında (KTMT) iştirakla bağlı açıq hədəyə keçib: "Ermənistan Kollektiv Təhlükəsizlik Müqaviləsi Təşkilatında iştirakını dondurub və görüşlərdə iştirak etmir. Hüquqi məsələləri hüquqi proseslərlə qarışdırmaq lazım deyil. İndi İrəvan yalnız bir sual barədə düşünür: təşkilatın Ermənistanda məsuliyyət sahəsi nədir? Bütün problemlər İrəvanın bu məsələni qaldırdığı andan başlayıb".
Paşinyan Ermənistanın KTMT-dən konkret olaraq nə vaxt çıxacağını açıqlamayıb. Bununla belə, o, bunun yeni ilədək ola biləcəyini istisna etməyib. Beləliklə, Paşinyan ilin sonuna kimi Rusiyaya vaxt verdiyini nümayiş etdirir. Bundan başqa, Paşinyan avqust ayında Rusiya sərhədçilərinin İrəvanda "Zvartnots" aeroportunu tərk edəcəyini bəyan edib. Onun sözlərinə görə, bu siyasi deyil, işgüzar prosesdir: "Biz Rusiya tərəfini qəbul edilən qərarla bağlı məlumatlandırmışıq. Avqustun 1-dən "Zvartnots" aeroportunda erməni sərhədçilər fəaliyyətə başlayacaq. "Zvartnots" hava limanındakı erməni sərhədçiləri artıq kifayət qədər təcrübə toplayıblar və burada sərhəd xidmətinin Rusiya tərəfinin köməyi olmadan həyata keçirilməsini təmin edə bilərlər". O qeyd edib ki, Ermənistan tərəfi Rusiya Sərhəd Xidməti ilə əlaqə saxlayıb, onlara müstəqilliyin əvvəlindən indiyədək göstərdikləri xidmətə və sərhədlərin mühafizəsinə nəzarətdə göstərdiyi köməyə görə təşəkkür edib. Onun sözlərinə görə, Ermənistanın dövlət institutları inkişaf edir və müstəqil xidmət göstərmək üçün artıq təcrübə toplayıb. Xatırladaq ki, Ermənistan Təhlükəsizlik Şurasının katibi Armen Qriqoryan bildirib ki, ölkəsi "Zvartnots" hava limanından Rusiya hərbçilərinin çıxarılması ilə bağlı Moskvaya rəsmi müraciət ünvanlayıb. O, həmçinin, KTMT-ni Ermənistanın sərhədlərini tanımamaqda qınayıb. Təbii ki, bu addımlar Rusiyada xoş qarşılanmır. Məsələn, Kremlin mətbuat katibi Dmitri Peskovun sözlərindən belə bəlli olur ki, Ermənistan rəhbərliyinin idialarına baxmayaraq, "Zvartnots" hava limanından Rusiya hərbçilərinin çıxarılması ilə bağlı məsələ hələ müzakirə edilir: "Rusiya Federasiyası Ermənistandan Rusiya sərhədçilərinin İrəvan hava limanında işini dayandırması barədə bildiriş alıb. Həqiqətən də bununla bağlı quruma məktub daxil olub və hazırda qurumların xətti ilə təmaslar həyata keçirilir. İndi daha çox deyə bilmirəm. Təbii ki, bütün mümkün səviyyələrdə təmaslar davam edəcək".
KTMT və Rusiya ilə yollarını ayırmağa hazırlaşan Nikol Paşinyan onu da bildirib ki, Avropa İttifaqının Ermənistandakı missiyasının mandatı daha iki il uzadıla bilər. Buna isə BMT Təhlükəsizlik Şurasının iclasında Rusiyanın bu qurumdakı daimi nümayəndəsinin birinci müavini Dmitri Polyanski olduqca sərt bir cavab verib: "Avropa İttifaqının Ermənistan, Moldova və hətta Afrika da daxil olmaqla, hər yerdə tətbiq etdiyi "antirusiya geosiyasi optikası" təkcə Ukrayna deyil, digər ölkələrə də yüz minlərlə həyat bahasına başa gələcək. Avropa İttifaqı, əlbəttə ki, hər cür yolla özünü sülhməramlı və vasitəçi kimi göstərməyə çalışır, hətta Ukraynaya münasibətə də bu cür don geyindirməyə çalışır. Bəs Avropa İttifaqı bu ölkədəki münaqişənin bitməsini istəyirmi?". O, bu sualı "əsas mənbəyə", yəni şuranın iclasında iştirak edən Avropa İttifaqının diplomatiyasının rəhbəri Jozep Borrellə yönəltməyi təklif edib: "2023-cü ilin iyununda Qərb Ukraynaya hərbi dəstəyini dayandıracağı təqdirdə Ukraynadakı münaqişənin bir neçə həftə ərzində bitəcəyini etiraf etdikdən sonra Borrell qeyd etdi: "Məsələ bu müharibəni bitirməkdə deyil, onu necə bitirməkdədir". Yəni Avropa İttifaqı Ukraynada, dolayı yolla da olsa, mahiyyətcə müharibə edən tərəf kimi münaqişənin həllinə deyil, onun vasitəsilə Rusiyaya maksimum ziyan vurmağa, ən yaxşı halda isə strateji məğlubiyyətinə nail olmağa çalışır". Ermənistanın "Ümumerməni Cəbhəsi" hərəkatının lideri, ölkənin keçmiş müdafiə naziri Arşak Karapetyan isə bildirir ki, Ermənistan hakimiyyətinin KTMT və Avrasiya İqtisadi İttifaqı istiqamətində atdığı addımlar dövlət üçün fəlakətli nəticələr verə bilər. Karapetyan qeyd edib ki, 44 günlük müharibədən əvvəl Ermənistan regionda məsələni həll etmək hüququna malik idi, indi isə bu regionda nüfuzunu qorumaq üçün yalnız bir rıçaqa sahibdir və bu, Ermənistan ərazisində yerləşən Rusiya hərbi bazası, yəni KTMT üzvü olmaq halıdır: "Rusiya hərbi bazası buradan çıxan kimi Ermənistanla heç kim maraqlanmayacaq". Sabiq erməni nazir əlavə edib ki, Paşinyan hakimiyyətinin apardığı siyasətin nəticələri Ermənistan üçün fəlakətli ola bilər. Ermənistanın "Past" nəşri də yazır ki, indi Qərbə, o cümlədən Fransa və Britaniyaya güvənərək Rusiyaya qarşı çıxmaq İrəvan üçün dağıdıcı nəticələr vəd edir: "Vəssalam, artıq xilas olmuşuq. Böyük Britaniyanın silahlı qüvvələr üzrə dövlət katibi Ceyms Hippi bəyan edib ki, Böyük Britaniya Rusiyanın cavab təhdidləri halında Ermənistanı dəstəkləmək üçün Avro-Atlantik müttəfiqləri ilə işləyəcək. Ceyms Hippi Ermənistanın KTMT-dəki üzvlüyünün "dondurulması"nın qurumdan rəsmi çıxmaq demək olmadığını qeyd edərək, Rusiyanın cavab hədələri olacağı təqdirdə NATO müttəfiqləri ilə Ermənistanı dəstəkləməkdən danışıb. Məlum olur ki, hökumətin müxtəlif təbliğat platformalarında ciddi simalarla oxşar tezisləri yayan və ya təbliğ edən dairələr var. Bu, kifayət qədər sadə məzmunlu təbliğat olsa da, bəzi soydaşlarımıza təsir edir. Göründüyü kimi, Britaniya gəmiləri Ermənistanın dağlarına qalxmaq qərarına gəlib". O da qeyd edilir ki, ölkə sürətlə böyük güclərin toqquşma məkanına çevrilir.
Samirə SƏFƏROVA
