Mübariz Göyüşlü: "Ermənipərəstlərin separatçı Vardanyanla bağlı qurduqları yeni əsassız təbliğat da, təbii ki, iflasa uğrayacaq"
Separatçı "Arsaxın" "dövlət naziri" olmuş Ruben Vardanyan keçən ilin sentyabr ayının 28-də sərhəddən Ermənistana qaçarkən Azərbaycan Dövlət Təhlükəsizlik Xidmətinin əməkdaşları tərəfindən həbs edildi.
Onun həbsindən dərhal sonra həyat yoldaşı da daxil olmaqla bir sıra şəxslər, o cümlədən də Ermənistan mediası Vardanyanın "günahsız" olduğu barədə iddialar irəli sürməyə başladılar, belə rəy yaratmağa çalışdılar ki, guya keçmiş separatçı "dövlət nazirinin" separatçılıqla heç bir əlaqəsi yoxdur, o, terroru maliyələşdirməyib və sair. Amma məlumdur ki, onların dedikləri tamamilə yalandır və Vardanyan separatçıların ayaqda qalması üçün böyük-böyük vəsaitlər xərcləyib.
İndi də ortaya Rain TV-nin jurnalisti Aleksandr Atasuntsev düşüb. O, "Reportyor" Teleqram kanalında müxtəlif absurd iddialar irəli sürüb. Xüsusən də Vardanyanı "aydan arı sudan duru" kimi qələmə verməyə çalışıb. Guya Vardanyanın həbsi "qanunsuzdur". Üzdəniraq jurnalist elə qələmə verir ki, guya Vardanyanın günahı yoxdur. İddia edir ki, Vardanyan separatist qərarlar verməyib, müharibə çağırışları etməyib. Yazır ki, Vardanyan "Qarabağa elə bir vaxtda gəlmişdi ki, artıq "Artsaxın" taleyi həll olunmuşdu, vəziyyət həddən artıq ağır idi. Onsuz da bundan pis vəziyyət yox idi. Vardanyan "bəlkə birdən yaxşı oldu" prinsipi ilə Qarabağa gəlmişdi" - kimi cəfəng fikirlər irəli sürən jurnalistin əsas məqsədi Vardanyanı müdafiə etməkdir. Əslində, bu cür adamlar Vardanyan kimilərinin çirkli pullarından qidalanıb özünə yaxşı şərait quranlardır. Separatizmi müdafiə edənlərin əksəriyyətinin muzdlulardan ibarət olduğu məlumdur.
Bunların yürütdüyü əsas məsələ odur ki, bunlar Vardanyanı təmizə çıxarmaq istəyirlər. Onların açdığı xəttə görə, Vardanyanın guya nə separatizmdə, nə də müharibədə barmağı var. Bununla onlar Vardanyanın mühakiməsinə təsir göstərmək istəyirlər. Halbuki, bütün bu məsələlərdə Vardanyanın iştirakı da olub, pul da xərcləyib. Yeri gəlmişkən, Vardanyan Azərbaycan Cinayət Məcəlləsinin terrorçuluğu maliyyələşdirmə, qanunvericiliklə nəzərdə tutulmayan silahlı birləşmələrin və ya qrupların yaradılmasında və fəaliyyətində iştirak etmə və Azərbaycanın dövlət sərhədini qanunsuz olaraq keçmə maddələri ilə ittiham olunur.
"Bu iddialar Vardanyanın üzərindən Azərbaycan dövlətinə qarşı işlədiyi cinayəti qaldıra, onu xilas edə bilməz"
Müasir İnkişaf Birliyinin sədri, siyasi şərhçi Mübariz Göyüşlü "Bakı-Xəbər"ə bildirdi ki, Vardanyanın "günahsız" kimi qələmə verilməsi yolverilməzdir. Vardanyanı digər separatçılardan ayırmaq, fərqləndirmək kimi məsələlərin absurd olduğunu deyən M.Göyüşlü qeyd etdi ki, o açıq-aşkar şəkildə terrorçuları maliyələşdirib, qanunsuz silahlı birləşmələrin təşkil edilməsində iştirak edib. "Hesab edirəm ki, bu iddialar əsassızdır. Bu iddialar Vardanyanın üzərindən Azərbaycan dövlətinə qarşı işlədiyi cinayəti qaldıra, onu xilas edə bilməz. Çünki o, həm separatçı və terrorçudur, terroru maliyyələşdirəndir, həm də militaristdir.
Vardanyan konkret olaraq Azərbaycan ərazisinə qanunsuz gəlib. O, həmçinin separatizmi dəstəkləyən, Azərbaycanın ərazi bütövlüyünə, suverenliyinə qarşı çıxan bir şəxs olub. Özlərinin dediyi kimi, o Qarabağa gələndə "Arsaxın" sonu idi. Bu situasiya onu məsuliyyətdən azad etmir. "Arsaxın" sonunun gəldiyi bir vaxta onun qanunsuz yollarla Qarabağda peyda olması, burada "dövlət naziri" postunu tutması və sair kimi məsələlər bu adamın hansı yuvanın quşu olduğunu bir daha təsdiqləyir. Bizim torpaqlarda nə gəzirdi? Bu məsələdə Vardanyan da digər separatçılar kimi böyük məsuliyyət daşıyır. Hesab eidrəm ki, Azərbaycan dövləti onu da digər separatçılar kimi ən ağır cəzaya məhkum edə bilər. Veriləcək ən ağır cəza belə separatçılar üçün az sayıla bilər" - deyə M.Göyüşlü vurğuladı.
M.Göyüşlünün sözlərinə görə, Vardanyan əvvəlcədən Qarabağda situasiyanın nədən ibarət olduğunu bilirdi, anlayışlı şəkildə, bilə-bilə gəlib orda Azərbaycan xalqının, Azərbaycan dövlətinin əleyhinə dövləti cinayətdə iştirak etməyi seçmişdisə, bilməli idi ki, bunun sonu ağır olacaq. "Onlar Azərbaycan dövlətinin belə bir addım atacağını, belə bir gücünün olduğunu elə də təxmin etmirdilər. Amma gözləmədikləri halda həbs olundular. Onları çox ağır şəkildə cəzalandırmaq lazımdır ki, başqalarına da görk olsun, bu fikrə düşənlər yollarından qayıtsınlar. Bir daha anlasınlar ki, Azərbaycan Respublikasının ərazisində separatizmə yer yoxdur, burada separatizmlə məşğul olmaq istəyən şəxslər sərt cəzalandırılır və bu işin sonu yoxdur.
Ermənipərəstlərin separatçı Vardanyanla bağlı qurduqları yeni əsassız təbliğat da, təbii ki, iflasa uğrayacaq. Burada başqa yol da yoxdur" - deyə M.Göyüşlü əlavə etdi.
İradə SARIYEVA
